தமிழகத்தில் நவீன வசதிகளுடன் 25 மாதிரி பதிவு மையங்கள்: சார்-பதிவாளர் அலுவலகங்களில் நெரிசலைக் குறைக்க அரசு அதிரடித் திட்டம்

தமிழகத்தில் சார்-பதிவாளர் அலுவலகங்களில் கூட்ட நெரிசலைக் குறைக்க 25 மாதிரி பதிவு மையங்கள் அமைக்கப்படும் என வணிகவரித் துறை அமைச்சர் டி. லோகேஷ் தமிழ் செல்வன் அறிவித்துள்ளார்.

தமிழகத்தில் உள்ள சார்-பதிவாளர் அலுவலகங்களில் பொதுமக்கள் சந்திக்கும் நீண்ட நேர காத்திருப்பு மற்றும் கூட்ட நெரிசலைக் குறைக்கும் நோக்கில், மாநில அரசு முக்கிய நடவடிக்கைகளை மேற்கொண்டுள்ளது. இது குறித்து சட்டப்பேரவையில் விரிவாகப் பேசிய வணிகவரி மற்றும் பதிவுத்துறை அமைச்சர் டி. லோகேஷ் தமிழ் செல்வன், மாநிலம் முழுவதும் முதற்கட்டமாக 25 மாதிரி பதிவு மையங்கள் (Model Registration Hubs) அமைக்கப்படும் என்று அறிவித்துள்ளார். இந்த மையங்கள் வடக்கு சென்னை, மத்திய சென்னை, தென் சென்னை, செங்கல்பட்டு மற்றும் கோவை வடக்கு ஆகிய பகுதிகளில் தொடங்கப்படவுள்ளன. பொதுமக்களுக்குச் சிறந்த சேவையை வழங்கும் வகையில், டெண்டர் மூலம் தேர்ந்தெடுக்கப்படும் சேவை நிறுவனங்கள் மூலம் இந்த மையங்கள் இயக்கப்படும்.

டிஜிட்டல் மயமாக்கலை மேம்படுத்தும் முயற்சியின் ஒரு பகுதியாக, பல்வேறு சான்றிதழ்களை உடனடியாக இணையம் வழியாகப் பெறும் வசதியை அரசு அறிமுகப்படுத்துகிறது. இதன்படி, 2018-ஆம் ஆண்டு முதல் பதிவு செய்யப்பட்ட திருமணச் சான்றிதழ்கள், சங்கங்கள் மற்றும் சீட்டு நிறுவனங்களின் பதிவுச் சான்றிதழ்கள், அத்துடன் இதற்கு முன்பு வழங்கப்பட்ட பிறப்பு மற்றும் இறப்புச் சான்றிதழ்களின் சான்றொப்பமிட்ட நகல்களை நிர்ணயிக்கப்பட்ட கட்டணத்தைச் செலுத்தி உடனடியாகப் பெற்றுக்கொள்ளலாம். குன்றத்தூர் மற்றும் அவிநாசி போன்ற அதிக ஆவணப் பதிவுகள் நடைபெறும் அலுவலகங்களில் கூடுதலாக பணியாளர்கள், கணினிகள் மற்றும் அதிவேக ஸ்கேனர்கள் வசதிகள் ஏற்படுத்தப்படும். பதிவு செய்யப்படும் ஆவணங்கள் உடனடியாக ஸ்கேன் செய்யப்பட்டு விண்ணப்பதாரர்களிடம் ஒப்படைக்கப்படும்.

பதிவுத்துறையின் ஸ்டார் (STAR) மென்பொருளின் செயல்பாடு, பாதுகாப்பு மற்றும் நிலைத்தன்மையை மேம்படுத்த ஐஐடி மெட்ராஸ் தொழில்நுட்ப ஆலோசகராக நியமிக்கப்பட்டுள்ளது. இதற்காக 1.66 கோடி ரூபாய் நிதி ஒதுக்கீடு செய்யப்பட்டுள்ளது. மேலும், பதிவாளர் அலுவலகத்தில் 1.5 கோடி ரூபாய் செலவில் புவியியல் தகவல் அமைப்பு (GIS) மற்றும் தரவு பகுப்பாய்வு வசதிகளுடன் கூடிய கணினி மையம் அமைக்கப்படும். இதன் மூலம் மாநிலம் முழுவதிலும் உள்ள பதிவுத் தரவுகள், வழிகாட்டி மதிப்பீடுகள் மற்றும் புவியியல் தகவல்கள் பகுப்பாய்வு செய்யப்பட்டு, எதிர்காலக் கொள்கை முடிவுகள் எடுக்க உதவும். மோசடியான சொத்துப் பதிவுகளைத் தவிர்க்க, அறநிலையத்துறை மற்றும் வக்ப் வாரியத்தின் கட்டுப்பாட்டில் உள்ள தடைசெய்யப்பட்ட நிலங்களின் விவரங்கள், ஏபிஐ (API) ஒருங்கிணைப்பு மூலம் ஸ்டார் மென்பொருளில் நேரடியாகப் புதுப்பிக்கப்படும்.

சொத்துப் பதிவுகளின் போது சமர்ப்பிக்கப்படும் இறப்புச் சான்றிதழ் மற்றும் வாரிசுச் சான்றிதழ் விவரங்கள், சம்பந்தப்பட்ட துறைகளுடன் நிகழ்நேரத்தில் சரிபார்க்கப்படும். வங்கிகள் மற்றும் வங்கி சாரா நிதி நிறுவனங்கள் வழங்கும் கடன் தொடர்பான அடமானப் பத்திரங்கள் செப்டம்பர் 15 முதல் நேரடி வருகையின்றி ஆன்லைன் மூலம் பதிவு செய்யப்படும். மேலும், செட்டில்மென்ட், விடுதலை, பாகப்பிரிவினை மற்றும் ரத்து போன்ற குடும்ப ஆவணங்களை வரும் அக்டோபர் 15 முதல் முற்றிலும் காகிதமில்லா மின்னணு முறையில் மட்டுமே பதிவு செய்ய வேண்டும் என்று அரசு உத்தரவிட்டுள்ளது.