ஜாம்ஷெட்பூர் எஃப்சி விலகல்: டாட்டா குழுமத்திடம் ஏஐஎஃப்எஃப் தலைவர் உருக்கமான வேண்டுகோள்

இந்தியன் சூப்பர் லீக் போட்டிகளில் இருந்து ஜாம்ஷெட்பூர் எஃப்சி விலகும் முடிவை மறுபரிசீலனை செய்ய டாட்டா குழுமத்திடம் ஏஐஎஃப்எஃப் தலைவர் கல்யாண் சௌபே வேண்டுகோள் விடுத்துள்ளார்.

இந்தியன் சூப்பர் லீக் (ஐஎஸ்எல்) கால்பந்து தொடரிலிருந்து ஜாம்ஷெட்பூர் எஃப்சி (JFC) அணி வெளியேறும் முடிவை மறுபரிசீலனை செய்யுமாறு அகில இந்திய கால்பந்து கூட்டமைப்பின் (ஏஐஎஃப்எஃப்) தலைவர் கல்யாண் சௌபே, டாட்டா குழுமத்திடம் வலியுறுத்தியுள்ளார். டாட்டா குழுமத்தின் இந்த திடீர் முடிவு கால்பந்து வட்டாரத்தில் பெரும் அதிர்ச்சியை ஏற்படுத்தியுள்ள நிலையில், இந்திய கால்பந்தின் நலனைக் கருத்தில் கொண்டு அந்நிறுவனம் தனது முடிவை மாற்றிக்கொள்ள வேண்டும் என அவர் கேட்டுக்கொண்டுள்ளார்.

டாட்டா ஸ்டீல் நிறுவனத்தின் பெருநிறுவன சேவை துணைத் தலைவர் டி.பி. சுந்தர ராமன் கூறுகையில், இந்த விலகல் என்பது முற்றிலும் திட்டமிடப்பட்ட ஒரு மூலோபாய முடிவு என்றும், நிறுவனம் மீண்டும் தனது அடிப்படை இலக்கான அடிமட்ட அளவிலான கால்பந்து மேம்பாட்டில் கவனம் செலுத்த விரும்புகிறது என்றும் குறிப்பிட்டுள்ளார். ஐஎஸ்எல் தொடரின் தற்போதைய சூழலுக்கும் இதற்கும் தொடர்பில்லை என்று அவர்கள் திட்டவட்டமாகத் தெரிவித்தாலும், ஏஐஎஃப்எஃப் இந்த விஷயத்தில் ஒரு மாற்றத்தை எதிர்பார்க்கிறது.

இது குறித்து பேசிய கல்யாண் சௌபே, டாட்டா போன்ற ஒரு பாரம்பரியமிக்க நிறுவனம் கால்பந்திலிருந்து விலகுவது விளையாட்டு வீரர்களுக்குப் பாதிப்பை ஏற்படுத்தும் என்று சுட்டிக்காட்டினார். மேலும், ஏஐஎஃப்எஃப் நிர்வாகம் டாட்டா குழுமத்தின் ஆலோசனைகளை வரவேற்கத் தயாராக இருப்பதாகவும், அவர்களது குறைகளை நிவர்த்தி செய்து மீண்டும் அவர்களைத் தொடரில் நீடிக்க வைக்க அனைத்து முயற்சிகளையும் மேற்கொள்ளத் தயாராக இருப்பதாகவும் அவர் தெரிவித்தார். ஜாம்ஷெட்பூர் எஃப்சி வெளியேறினாலும், அந்த அணி வீரர்களின் ஒப்பந்தங்களை மதித்து, அவர்கள் வேறு கிளப்புகளில் சேர உதவி செய்யப்படும் என்று டாட்டா நிறுவனம் உறுதியளித்துள்ளது.

1987 முதல் செயல்பட்டு வரும் டாட்டா கால்பந்து அகாடமி (TFA) மூலம் இந்திய கால்பந்துக்கு அந்நிறுவனம் செய்துள்ள அளப்பரிய பங்களிப்பை சௌபே நினைவு கூர்ந்தார். தானும் அந்த அகாடமியில் பயிற்சி பெற்றவர் என்பதையும், ஏறக்குறைய 275-க்கும் மேற்பட்ட வீரர்கள் அங்கிருந்து உருவாகி சாதனை படைத்துள்ளதையும் அவர் சுட்டிக்காட்டினார். லாப நோக்கத்திற்காக மட்டுமே விளையாட்டை அணுகாத டாட்டா குழுமம், இத்தகைய கடினமான முடிவை எடுத்ததற்குப் பின்னால் உள்ள காரணங்களை ஆராய வேண்டியுள்ளது என்று கூறிய அவர், வீரர்களின் எதிர்காலத்திற்காக டாட்டா மீண்டும் களத்திற்கு வர வேண்டும் என்பதே அனைவரின் விருப்பம் என வலியுறுத்தினார்.