ஆல்ஃபிரட் ஹிட்ச்காக்கின் தி பேர்ட்ஸ்: புதிய வெப் தொடரில் சாரா ஸ்னூக் முதன்மை வேடத்தில் நடிப்பு

புகழ்பெற்ற தி பேர்ட்ஸ் திரைப்படத்தின் புதிய தொடரில் சக்ஸஷன் தொடர் புகழ் சாரா ஸ்னூக் நடிக்க உள்ளார்.

ஹாலிவுட்டின் புகழ்பெற்ற இயக்குனர் ஆல்ஃபிரட் ஹிட்ச்காக்கின் கிளாசிக் திரைப்படமான தி பேர்ட்ஸ் மீண்டும் ஒரு புதிய வடிவில் இணையத் தொடராகத் தயாராக உள்ளது. இந்தத் தொடரில் எமி விருது பெற்ற சக்ஸஷன் தொடர் நட்சத்திரமான சாரா ஸ்னூக் முதன்மை வேடத்தில் நடிக்க ஒப்பந்தமாகியுள்ளார். டாஃப்னி டு மௌரியரின் நாவலை அடிப்படையாகக் கொண்டு உருவாகும் இந்தத் தொடரை எச்பிஓ நிறுவனம் தயாரிக்கிறது. சக்ஸஷன் தொடரின் பிரம்மாண்ட வெற்றிக்குப் பிறகு, சாரா ஸ்னூக் மீண்டும் எச்பிஓ நிறுவனத்துடன் இணைந்து பணியாற்றுவது ரசிகர்களிடையே பெரும் எதிர்பார்ப்பை ஏற்படுத்தியுள்ளது.

இந்த புதிய தொடர், 1963-ல் வெளியான ஹிட்ச்காக்கின் திரைப்படத்தை நவீன காலத்திற்கு ஏற்ப முற்றிலும் மாறுபட்ட கோணத்தில் காட்சிப்படுத்துகிறது. இதில் மர்மமான கொலை வழக்கு மற்றும் அதனைச் சுற்றியுள்ள மர்மமான பறவைகளின் தாக்குதல் ஆகியவை மையக்கருத்தாக அமைக்கப்பட்டுள்ளன. கதையின் நாயகியான மைரா மேசி, தனது மகளின் காப்பாளர் உரிமை குறித்த சட்டப் போராட்டத்திற்குப் பிறகு சொந்த ஊர் திரும்புகிறார். அங்கு தனது நீண்டகால நண்பரின் திடீர் மறைவை விசாரிக்கத் தொடங்கும் அவர், ஒரு கொலையாளியின் அச்சுறுத்தலையும், பறவைகளின் மர்மமான தாக்குதலையும் எதிர்கொண்டு தனது மகளைக் காக்க போராடுவதே இந்தத் தொடரின் விறுவிறுப்பான கதைக் களமாகும்.

இந்தத் தொடரின் முதல் அத்தியாயத்திற்கான திரைக்கதையை டாம் ஸ்பெஷாலி எழுதியுள்ளார். இவர் ஏற்கனவே தி லெஃப்ட் ஓவர்ஸ் மற்றும் வாட்ச்மேன் போன்ற புகழ்பெற்ற தொடர்களில் பணியாற்றிய அனுபவம் கொண்டவர். சாரா ஸ்னூக் மற்றும் டாம் ஸ்பெஷாலி ஆகியோர் தயாரிப்புப் பணிகளிலும் முக்கியப் பங்கு வகிக்கின்றனர். இவர்களுடன் டேவிட் ஹேமேன் மற்றும் ஜெனிபர் கேப்லர் ராவ்லிங்ஸ் ஆகியோர் இணைந்து இந்தத் தொடரைத் தயாரிக்கும் பணிகளை மேற்கொண்டுள்ளனர். யுனிவர்சல் குளோபல் டெலிவிஷன் நிறுவனம் இந்தப் படைப்பில் முக்கிய பங்கு வகிக்கிறது, மேலும் ஹிட்ச்காக்கின் அசல் திரைப்பட உரிமைகளையும் இதன் தயாரிப்பாளர்கள் பெற்றுள்ளனர்.

இந்தத் திட்டம் கடந்த ஓராண்டுக்கும் மேலாக தயாரிப்புப் பணிகளில் இருந்து வருகிறது. முன்னதாக 2007-ல் நவோமி வாட்ஸ் நடிப்பில் ஒரு மறுதயாரிப்பு முயற்சி மேற்கொள்ளப்பட்டது, மேலும் 2017-ல் பிபிசி நிறுவனம் சார்பில் ஒரு தொடர் முயற்சி எடுக்கப்பட்டது, ஆனால் அவை பல்வேறு காரணங்களால் கைவிடப்பட்டன. தற்போது எச்பிஓ நிறுவனத்தின் கீழ் சாரா ஸ்னூக்கின் நடிப்பில் தி பேர்ட்ஸ் தொடர் மீண்டும் உயிர் பெற்றுள்ளது. நவீன தொழில்நுட்பம் மற்றும் விறுவிறுப்பான திரைக்கதையுடன் உருவாகும் இந்தத் தொடர், ஹிட்ச்காக்கின் கிளாசிக் படத்தைப் புதிய தலைமுறை ரசிகர்களிடம் கொண்டு செல்லும் முக்கிய முயற்சியாகப் பார்க்கப்படுகிறது.