விழுப்புரம் அருகே கண்டெடுக்கப்பட்ட பழமையான பல்லவர் கால மூத்ததேவி மற்றும் சோழர் கால விநாயகர் சிலைகள்

விழுப்புரம் அருகே கோரலூர் பகுதியில் பல்லவர் கால மூத்ததேவி மற்றும் சோழர் கால விநாயகர் சிலைகள் கண்டறியப்பட்டுள்ளன.

விழுப்புரம் அருகே உள்ள கஞ்சனூர் மற்றும் கோரலூர் இருளர் குடியிருப்புப் பகுதிக்கு அருகில் உள்ள ஒரு குளக்கரையில், வரலாற்று ஆய்வாளர்கள் குழுவினர் மேற்கொண்ட கள ஆய்வின்போது பல்லவர் காலத்தைச் சேர்ந்த மூத்ததேவி சிலை மற்றும் சோழர் காலத்தைச் சேர்ந்த விநாயகர் சிலை கண்டறியப்பட்டுள்ளன. இந்த அரிய சிலைகளைக் கண்டறிந்த குழுவிற்கு, விழுப்புரம் அறிஞர் அண்ணா அரசு கலைக் கல்லூரியின் வரலாற்றுத் துறை ஆய்வு மாணவர் சி.இம்மானுவேல் தலைமை தாங்கினார். இந்த வரலாற்றுத் தடயங்கள் அப்பகுதியின் தொன்மையை மீண்டும் பறைசாற்றும் வகையில் அமைந்துள்ளன.

கண்டறியப்பட்டுள்ள மூத்ததேவி சிலை சுமார் 1,200 ஆண்டுகள் பழமையானது எனக் கணிக்கப்பட்டுள்ளது. இது ஒரு பெரிய கருங்கல்லில் செதுக்கப்பட்டுள்ளது. சுமார் 3.5 அடி உயரமும் 2.5 அடி அகலமும் கொண்ட இந்தச் சிலையில், தேவி கரண்ட மகுடம், மகர குண்டலங்கள் மற்றும் சரப்பணி எனும் ஆபரணங்களை அணிந்த நிலையில் காட்சி அளிக்கிறார். சிலையில் தேவியின் வலது பக்கம் அவளது மகன் மந்தனும், இடது பக்கம் மகள் மந்தினியும் செதுக்கப்பட்டுள்ளனர். தேவியின் சின்னமான காகம் மற்றும் அவள் ஏந்தியிருக்கும் துடைப்பம் போன்றவை சிலையின் மேல்பகுதியில் நேர்த்தியாக வடிக்கப்பட்டுள்ளன.

இந்தச் சிலை குறித்து விளக்கிய ஆய்வு மாணவர் சி.இம்மானுவேல், இப்பகுதி மக்கள் நீண்டகாலமாக இந்தச் சிலையை 'கொற்றவை' என்று கருதி வழிபட்டு வந்ததாகக் குறிப்பிட்டார். மூத்ததேவி நீரையும் நிலத்தையும் பாதுகாக்கும் தெய்வமாக கிராமப்புறங்களில் வழிபடப்பட்டவர். குளங்கள், ஏரிகள் மற்றும் விவசாய நிலங்களுக்கு அருகே இத்தகைய சிலைகள் நிறுவப்படுவது வழக்கம். 15-ஆம் நூற்றாண்டு வரை மக்கள் மத்தியில் மூத்ததேவி வழிபாடு சிறப்பாக இருந்ததாகவும், அதன் பின்னர் காலப்போக்கில் அது குறைந்துவிட்டதாகவும் ஆய்வுகள் தெரிவிக்கின்றன.

மூத்ததேவி என்பவர் லக்ஷ்மி தேவிக்கு முன்பே தோன்றியவர் என்பதால் மூத்ததேவி அல்லது மூத்தாள் என்று அழைக்கப்படுகிறார். இது காலப்போக்கில் 'மூதேவி' என்று மருவியது. சமஸ்கிருதத்தில் 'ஜ்யேஷ்டா தேவி' என்று அழைக்கப்படும் இவளுக்கு, காக்கை சின்னமாகவும், கழுதை வாகனமாகவும், துடைப்பம் ஆயுதமாகவும் குறிப்பிடப்படுகிறது. இந்த ஆய்வுக் களப்பணியில் செஞ்சியில் உள்ள ஸ்ரீ ரங்கபூபதி கல்வியியல் கல்லூரியைச் சேர்ந்த மாணவர்களும் பங்கேற்றனர். வரலாற்றுச் சிறப்புமிக்க இந்தச் சிலைகள் இப்பகுதியின் கலாச்சார மற்றும் வரலாற்றுப் பின்னணியை மெருகூட்டும் வகையில் அமைந்துள்ளதாக ஆய்வாளர்கள் கருத்து தெரிவித்துள்ளனர்.