வெளியானது ரிலீஸ் தேதி: ரசிகர்களை மகிழ்விக்க வரும் அர்ஜுன் அசோகனின் மெல்கோவ் பாண்டிச்சேரி

அர்ஜுன் அசோகன் நடிப்பில் உருவாகியுள்ள 'மெல்கோவ் பாண்டிச்சேரி' திரைப்படம் நவம்பர் 13-ம் தேதி திரையரங்குகளில் வெளியாகிறது.

மலையாளத் திரையுலகின் வளர்ந்து வரும் நட்சத்திரமான அர்ஜுன் அசோகன் நடிப்பில் உருவாகியுள்ள புதிய திரைப்படம் 'மெல்கோவ் பாண்டிச்சேரி'. இந்தத் திரைப்படம் வரும் நவம்பர் 13-ம் தேதி உலகமெங்கும் உள்ள திரையரங்குகளில் பிரம்மாண்டமாக வெளியாக உள்ளதாகப் படக்குழுவினர் அதிகாரப்பூர்வமாக அறிவித்துள்ளனர். அறிமுக இயக்குநர் நிகில் மோகன் இயக்கத்தில் உருவாகியுள்ள இந்தத் திரைப்படம், ரசிகர்களிடையே பெரும் எதிர்பார்ப்பை ஏற்படுத்தியுள்ளது.

இந்தத் திரைப்படத்தில் அர்ஜுன் அசோகனுடன் இணைந்து பாலு வர்கீஸ், அல்தாப் சலீம் மற்றும் சரத் சபா ஆகியோர் முக்கியமான கதாபாத்திரங்களில் நடித்துள்ளனர். அறிமுக நடிகை ஸ்ரீலட்சுமி விஜயன் கதாநாயகியாக அறிமுகமாகிறார். மேலும், தமிழ் ரசிகர்களுக்கு நன்கு பரிச்சயமான நடிகர் நான் கடவுள் ராஜேந்திரன் இந்தத் திரைப்படத்தில் முக்கிய வேடத்தில் நடித்துள்ளார் என்பது கூடுதல் சிறப்பம்சமாகும். இப்படம் ஒரு முழுமையான இளைஞர்களுக்கான பொழுதுபோக்கு திரைப்படமாக உருவாக்கப்பட்டுள்ளது.

படத்தின் கதைக்களம் குறித்துப் பார்க்கையில், கேரளாவிலிருந்து நண்பர்கள் குழு ஒன்று சுற்றுலாப் பயணமாகப் பாண்டிச்சேரிக்குச் செல்வதும், அங்கு எதிர்பாராத விதமாக அவர்களுக்கு நிகழும் சுவாரஸ்யமான மற்றும் விறுவிறுப்பான சம்பவங்களை மையமாகக் கொண்டு திரைக்கதை அமைக்கப்பட்டுள்ளது. படத்தின் தொழில்நுட்பக் குழுவில் ஒளிப்பதிவாளராக சனீஷ் ஸ்டான்லி, படத்தொகுப்பாளராக சாகர் தாஸ் மற்றும் இசையமைப்பாளராக எலக்ட்ரானிக் கிளி ஆகியோர் பணியாற்றியுள்ளனர்.

இப்படத்தை 'ராமலீலா' படத்தின் இயக்குநர் அருண் கோபி மற்றும் ஜஸ்டின் மேத்யூ ஆகியோர் இணைந்து தயாரித்துள்ளனர். அருண் கோபி எக்சைட்மெண்ட்ஸ் மற்றும் ஜஸ்டின் & மேத்யூ என்டர்டெயின்மெண்ட்ஸ் ஆகிய நிறுவனங்களின் சார்பில் இப்படம் தயாரிக்கப்பட்டுள்ளது. அர்ஜுன் அசோகன் தனது அடுத்தடுத்த படங்களிலும் மிகுந்த ஆர்வத்துடன் நடித்து வருகிறார். அந்த வகையில், உல்லாஸ் செம்பன் இயக்கத்தில் உருவாகியுள்ள 'டிஸ்கோ' திரைப்படம் நவம்பர் 6-ம் தேதி வெளியாகிறது. மேலும் சுவின் எஸ். சோமசேகரன் இயக்கத்தில் 'ஷானி' மற்றும் மனோஜ் கானாவின் 'ரேடியோ மாஸ்கோ' எனத் தொடர்ச்சியான படங்களில் நடித்து தனது கலைப்பயணத்தை அவர் உறுதிப்படுத்தியுள்ளார்.