நாகார்ஜுனாவின் 100-வது திரைப்படத்தில் வில்லனாக களமிறங்கும் அசோக் செல்வன்

நடிகர் நாகார்ஜுனாவின் 100-வது திரைப்படமான கிங்100-இல் வில்லனாக அசோக் செல்வன் ஒப்பந்தம் செய்யப்பட்டுள்ளார்.

தெலுங்கு திரையுலகின் முன்னணி நட்சத்திரமான நாகார்ஜுனா, தனது திரைப்பயணத்தில் ஒரு மிக முக்கியமான மைல்கல்லை எட்ட உள்ளார். அவரது 100-வது திரைப்படமாக உருவாகி வரும் கிங்100 திரைப்படம், சினிமா ரசிகர்களிடையே பெரும் எதிர்பார்ப்பை ஏற்படுத்தியுள்ளது. தெலுங்கு சினிமாவில் என்.டி.ஆர், ஏ.என்.ஆர், கிருஷ்ணா, சோபன் பாபு மற்றும் கிருஷ்ணம் ராஜு போன்ற மூத்த நட்சத்திரங்களின் வரிசையில், இப்போது நாகார்ஜுனாவும் இந்த 100 படங்கள் என்ற சாதனையை நெருங்கியுள்ளார்.

இந்த பிரம்மாண்டமான படைப்பை நாகார்ஜுனாவின் சொந்த தயாரிப்பு நிறுவனமான அன்னபூர்ணா ஸ்டுடியோஸ் தயாரிக்கிறது. தமிழ் திரைப்பட இயக்குனர் ரா கார்த்திக் இந்த படத்தை இயக்குகிறார். ஒரு அதிரடி ஆக்ஷன் திரைப்படமாக உருவாகும் இதில், நாகார்ஜுனாவின் பிறந்தநாளை முன்னிட்டு வெளியிடப்பட்ட முன்னோட்டம் ஏற்கனவே ரசிகர்களிடையே வரவேற்பைப் பெற்றது. இப்படம் வரும் டிசம்பர் 24-ம் தேதி திரைக்கு வரும் என அதிகாரப்பூர்வமாக அறிவிக்கப்பட்டுள்ளது.

இந்த திரைப்படத்தின் கூடுதல் சுவாரசியமான விஷயமாக, தமிழ் நடிகர் அசோக் செல்வன் இப்படத்தில் வில்லனாக நடிக்க ஒப்பந்தம் செய்யப்பட்டுள்ளார். இப்படத்தை தெலுங்கு மற்றும் தமிழ் என இரு மொழிகளிலும் வெளியிடும் திட்டத்தில் இருப்பதால், முன்னணி தமிழ் நடிகரை வில்லன் கதாபாத்திரத்தில் நடிக்க வைக்க படக்குழுவினர் முடிவு செய்துள்ளனர். அசோக் செல்வன் ஏற்கனவே இப்படத்திற்கான படப்பிடிப்பில் கலந்து கொள்ளத் தொடங்கிவிட்டதாக தகவல்கள் வெளியாகியுள்ளன.

நீண்ட இடைவெளிக்குப் பிறகு நடிகை தபு, நாகார்ஜுனாவுடன் இணைந்து இப்படத்தில் ஒரு முக்கிய கதாபாத்திரத்தில் நடிக்கிறார். இருவரும் இணைந்து நடித்த 'நின்னே பெல்லடாத்தா' பெரும் வெற்றி பெற்ற நிலையில், 28 ஆண்டுகளுக்குப் பிறகு மீண்டும் திரையில் இவர்களது கூட்டணியைக் காண ரசிகர்கள் ஆர்வமாக உள்ளனர். தேவி ஸ்ரீ பிரசாத் இசையமைக்கும் இந்தத் திரைப்படம், நாகார்ஜுனாவின் கரியரில் ஒரு மறக்க முடியாத படைப்பாக இருக்கும் என்று எதிர்பார்க்கப்படுகிறது.