திருநெல்வேலி: குடியிருப்புக்குள் புகுந்த கரடி பிடிபட்டது; வனத்துறை அதிரடி நடவடிக்கை

திருநெல்வேலி அருகே குடியிருப்பு பகுதிக்குள் புகுந்து பொதுமக்களை அச்சுறுத்தி வந்த கரடி கூண்டு வைத்து பிடிக்கப்பட்டு அடர்ந்த வனப்பகுதிக்குள் விடப்பட்டது.

திருநெல்வேலி மாவட்டம், பாபநாசம் சரகத்திற்கு உட்பட்ட அனவன்குடியிருப்பு கிராமப் பகுதியில் கடந்த சில நாட்களாக கரடிகளின் நடமாட்டம் அதிகரித்து காணப்பட்டது. இதனால் அப்பகுதி மக்கள் பெரும் அச்சத்தில் இருந்து வந்தனர். உணவு மற்றும் தண்ணீரைத் தேடி அடிக்கடி குடியிருப்புப் பகுதிகளுக்குள் புகுந்த கரடியைப் பிடிக்க வனத்துறையினர் தீவிர நடவடிக்கை எடுத்தனர். இதற்காகப் பொருத்தப்பட்ட கூண்டில் சிக்கிய கரடி, புதன்கிழமை இரவு பத்திரமாக மீட்கப்பட்டு வனத்துறை வாகனத்தின் மூலம் பாதுகாப்பாக அழைத்துச் செல்லப்பட்டது.

களக்காடு முண்டந்துறை புலிகள் காப்பகத்தின் (KMTR) கீழ் செயல்படும் வனத்துறை அதிகாரிகள் இந்த நடவடிக்கையை ஒருங்கிணைத்தனர். பிடிபட்ட கரடியை வன கால்நடை மருத்துவ அதிகாரி டாக்டர் மனோகரன் முன்னிலையில் பரிசோதனை செய்தனர். பின்னர், அந்த கரடி முண்டந்துறை சரகத்திற்கு உட்பட்ட கோடமடி வனப்பகுதியில் உள்ள அடர்ந்த காட்டிற்குள் விடப்பட்டது என்று வனத்துறை அதிகாரிகள் தரப்பில் தெரிவிக்கப்பட்டுள்ளது. பொதுமக்களின் பாதுகாப்பு கருதி மேற்கொள்ளப்பட்ட இந்த நடவடிக்கை அப்பகுதி மக்களிடையே நிம்மதியை ஏற்படுத்தியுள்ளது.

அனவன்குடியிருப்பு மற்றும் அதனைச் சுற்றியுள்ள பகுதிகளில் கடந்த சில காலங்களாக வனவிலங்குகளின் நடமாட்டம் அதிகமாக இருப்பது கண்டறியப்பட்டுள்ளது. சமீபத்தில் கணேசமூர்த்தி என்ற கட்டுமானத் தொழிலாளி ஒருவரை கரடி தாக்கியதாகக் கூறப்படுகிறது. மேலும், கிராமவாசிகள் தங்களது செல்போன்களில் கரணி நடமாட்டத்தைப் படம் பிடித்த சம்பவங்களும் நடந்தன. கடந்த ஜூலை 31-ஆம் தேதி பாபநாசம் அருகே உள்ள மேல ஆம்பூர் கிராமத்தில் 61 வயது விவசாயி கரடி தாக்கியதில் உயிரிழந்தார். இதனைத் தொடர்ந்து ஆகஸ்ட் மாதம் மற்றொரு கரடி பிடிபட்ட சம்பவங்களும் நடந்தேறியுள்ளன.

இந்த சூழலில், வனவிலங்குகளின் நடமாட்டத்தைக் கண்காணிப்பது மற்றும் பொதுமக்களின் பாதுகாப்பை உறுதி செய்வது குறித்து களக்காடு முண்டந்துறை புலிகள் காப்பகத்தின் கள இயக்குநர் மற்றும் வனப்பாதுகாவலர் எஸ்.முருகன் செவ்வாய்க்கிழமை அனவன்குடியிருப்பு பகுதியில் நேரில் ஆய்வு செய்தார். அங்கு வைக்கப்பட்டுள்ள கூண்டுகளை ஆய்வு செய்த அவர், வனத்துறை ஊழியர்களுடன் கலந்துரையாடி முன்னெச்சரிக்கை நடவடிக்கைகள் குறித்து ஆலோசனை நடத்தினார். மேலும், அப்பகுதி மக்களிடமும் வனவிலங்குகள் நடமாட்டம் குறித்து கேட்டறிந்து உரிய பாதுகாப்பு நடவடிக்கைகளைத் தீவிரப்படுத்துமாறு அதிகாரிகளுக்கு உத்தரவிட்டார்.