பெசன்ட் நகர் நில விவகாரம்: கல்வி அறக்கட்டளைக்கு சாதகமாக சென்னை உயர்நீதிமன்றம் அதிரடி தீர்ப்பு

பெசன்ட் நகரில் உள்ள கல்வி அறக்கட்டளைக்கு சொந்தமான 7.44 ஏக்கர் நிலத்தை கையகப்படுத்த பிறப்பித்த உத்தரவை சென்னை உயர்நீதிமன்றம் ரத்து செய்துள்ளது.

சென்னை பெசன்ட் நகர் பகுதியில் உள்ள சுமார் 7.44 ஏக்கர் பரப்பளவிலான நிலத்தை, தமிழ்நாடு வீட்டு வசதி வாரியம் மீண்டும் கையகப்படுத்த வேண்டும் என தனி நீதிபதி பிறப்பித்த உத்தரவை சென்னை உயர்நீதிமன்றத்தின் முதல் அமர்வு ரத்து செய்துள்ளது. தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் ஆகியோர் அடங்கிய அமர்வு இந்த முக்கிய உத்தரவைப் பிறப்பித்துள்ளது. ராமச்சந்திரா கல்வி அறக்கட்டளைக்குச் சொந்தமான இந்த நிலம், கல்வி நோக்கங்களுக்காகப் பயன்படுத்தப்பட வேண்டும் என்ற நிபந்தனையுடன் வழங்கப்பட்டிருந்தது. ஆனால், அந்த நிலத்தில் வணிக ரீதியான செயல்பாடுகள் நடப்பதாகக் கூறி, கடந்த 2025-ஆம் ஆண்டு நவம்பர் 12-ஆம் தேதி தனி நீதிபதி ஒரு உத்தரவைப் பிறப்பித்திருந்தார். அந்த உத்தரவில், 1998-ஆம் ஆண்டு நிலத்தை அறக்கட்டளைக்கு வழங்க பிறப்பிக்கப்பட்ட அரசாணையை ரத்து செய்ததுடன், நிலத்திற்கு ஈடாக 33.46 கோடி ரூபாயை 6 சதவீத வட்டியுடன் வழங்கி, நிலத்தை வீட்டு வசதி வாரியம் மீட்க வேண்டும் என்றும் அறிவுறுத்தப்பட்டிருந்தது.

இந்த உத்தரவை எதிர்த்து ராமச்சந்திரா கல்வி அறக்கட்டளை தரப்பில் மேல்முறையீடு செய்யப்பட்டது. இந்த நிலம் 1980-களில் பெசன்ட் நகர் இரண்டாம் கட்ட திட்டத்திற்காக வீட்டு வசதி வாரியத்தால் கையகப்படுத்தப்பட்டது என்பது குறிப்பிடத்தக்கது. இதற்கிடையில், இந்த நிலத்தின் பங்குகளில் ஒரு பகுதியினருக்குச் சொந்தமான பரமேஸ்வரி என்பவர், தான் மைனராக இருந்தபோது இந்த விற்பனை பத்திரத்தில் கையெழுத்திடவில்லை என்று கூறி, தனது பங்கு நிலத்தை மீண்டும் வழங்கக் கோரி உயர்நீதிமன்றத்தில் மனு தாக்கல் செய்திருந்தார். எனினும், அவரது கோரிக்கையை தனி நீதிபதி நிராகரித்த நிலையில், நிலத்தை அரசு திரும்பப் பெற வேண்டும் என்ற உத்தரவை மட்டும் பிறப்பித்திருந்தார். இதை எதிர்த்தே தற்போது அறக்கட்டளை தரப்பில் மேல்முறையீடு தாக்கல் செய்யப்பட்டு தீர்ப்பு வந்துள்ளது.

வழக்கின் விசாரணையின் போது, அறக்கட்டளைக்குச் சொந்தமான அந்த வளாகத்தில் திருமண மண்டபம் வாடகைக்கு விடப்படுகிறதா அல்லது அதன் வருமானம் அறக்கட்டளை பணிகளுக்குப் பயன்படுத்தப்படுகிறதா என்பது போன்ற கேள்விகள் உண்மை தொடர்பானவை என்று நீதிபதிகள் சுட்டிக்காட்டினர். இதுபோன்ற விவகாரங்களை உரிய ஆதாரங்களுடன் மட்டுமே நிரூபிக்க முடியும் என்று நீதிமன்றம் தெளிவுபடுத்தியது. விற்பனை பத்திரத்தில் உள்ள நிபந்தனைகளை மீறி நிலத்தின் ஏதேனும் ஒரு பகுதி பயன்படுத்தப்பட்டிருந்தால், அது குறித்து நடவடிக்கை எடுக்க அரசுக்கோ அல்லது வீட்டு வசதி வாரியத்திற்கோ சட்டப்படி அதிகாரம் உண்டு என்றும் நீதிபதிகள் தங்கள் தீர்ப்பில் குறிப்பிட்டுள்ளனர்.

இந்த மேல்முறையீட்டு வழக்கில், அறக்கட்டளை தரப்பில் வழக்கறிஞர் முத்துச்சரண் சுந்தரேஷ் ஆஜராகி வாதங்களை முன்வைத்தார். தனி நீதிபதியின் உத்தரவு நடைமுறைச் சிக்கல்களைக் கொண்டதாக இருந்ததால், அதைத் தற்போது இரு நீதிபதிகள் கொண்ட அமர்வு ரத்து செய்துள்ளது. இந்தத் தீர்ப்பு கல்வி அறக்கட்டளைகளுக்குச் சொந்தமான நிலங்கள் தொடர்பான சட்ட ரீதியான சர்ச்சைகளில் மிக முக்கியமான ஒன்றாகக் கருதப்படுகிறது. நிலத்தைப் பயன்படுத்தும் விதம் குறித்த புகார்கள் எழுந்தால், அவற்றை சட்டப்பூர்வமான வழிமுறைகளின்படி மட்டுமே அணுக வேண்டும் என்பதை இந்த தீர்ப்பு மீண்டும் வலியுறுத்தியுள்ளது.