தேசியவாதம் குறித்து பாஜக பாடம் எடுக்கத் தேவையில்லை: கார்த்தி சிதம்பரம் பதிலடி

வந்தே மாதரம் பாடல் குறித்து பாஜக பாடம் எடுக்கத் தேவையில்லை என காங்கிரஸ் எம்பி கார்த்தி சிதம்பரம் திட்டவட்டமாகத் தெரிவித்துள்ளார்.

வந்தே மாதரம் பாடலை பாடுவது குறித்த சர்ச்சைகளுக்கு காங்கிரஸ் கட்சியின் மூத்த தலைவரும், நாடாளுமன்ற உறுப்பினருமான கார்த்தி சிதம்பரம் கடும் கண்டனம் தெரிவித்துள்ளார். காங்கிரஸ் கட்சிக்கு நீண்ட கால சுதந்திரப் போராட்ட வரலாறு மற்றும் தேசபக்தி மரபு உண்டு என்று சுட்டிக்காட்டிய அவர், தேசியவாதம் குறித்து பாஜக எங்களுக்கு பாடம் எடுக்க வேண்டிய அவசியம் இல்லை என விமர்சித்துள்ளார். பாஜகவினர் ஆதாரமற்ற குற்றச்சாட்டுகளை முன்வைப்பதை தவிர்க்க வேண்டும் என்றும் அவர் கேட்டுக்கொண்டார்.

வந்தே மாதரம் பாடலின் இரண்டு சரணங்களை மட்டுமே பாடுவது குறித்த விமர்சனங்களுக்கு பதிலளித்த கார்த்தி சிதம்பரம், இந்த முடிவு சுதந்திரப் போராட்ட காலத்தில் மகாத்மா காந்தி, ஜவஹர்லால் நேரு, வல்லபாய் படேல் மற்றும் நேதாஜி சுபாஷ் சந்திரபோஸ் போன்ற தலைவர்களால் கூட்டாக எடுக்கப்பட்டது என்று விளக்கமளித்தார். அக்கால தலைவர்களின் தொலைநோக்குப் பார்வையிலும், விவேகத்திலும் இந்த இரண்டு சரணங்களே தேசிய பாடலுக்கு போதுமானது என்று முடிவு செய்யப்பட்டது என்பதை பாஜகவினர் வரலாற்றைப் படித்துப் புரிந்துகொள்ள வேண்டும் என்று அவர் வலியுறுத்தினார்.

இதற்கிடையில், தமிழக அரசியல் சூழல் மற்றும் காவிரி நதிநீர் விவகாரம் குறித்தும் தனது கருத்துகளைப் பகிர்ந்துகொண்டார். மேகதாது அணை விவகாரத்தில் தமிழகத்திற்கு உரிய நீர் கிடைப்பதை உறுதி செய்ய காவிரி மேலாண்மை வாரியம் நடவடிக்கை எடுக்க வேண்டும் என்று அவர் குறிப்பிட்டார். காவல்துறை விசாரணையில் நடைபெறும் மரணங்கள் குறித்த அச்சத்தைப் பகிர்ந்த அவர், காவல்துறையின் மனநிலையில் மாற்றம் தேவை என வலியுறுத்தினார். காலனித்துவ மனப்பாங்குடன் செயல்படும் காவல்துறையினர், விசாரணை முறைகளை மாற்றியமைக்க வேண்டும் என்றும், சிறப்புக் கவனம் செலுத்தும் வகையிலான பயிற்சிகள் அளிக்கப்பட வேண்டும் என்றும் அவர் குறிப்பிட்டார்.

மேலும், கௌரவக் கொலைகள் சமூகப் பிரச்சினையாக உருவெடுத்துள்ள நிலையில், சாதி அடிப்படையிலான பாகுபாடுகளைக் களைந்து சமூக நல்லிணக்கத்தை ஏற்படுத்த அரசியல் மற்றும் சமூக அமைப்புகள் ஒன்றிணைய வேண்டும் என்று அவர் கோரிக்கை விடுத்தார். தமிழக சட்டமன்ற உறுப்பினர்களுக்கு தனி வாகனங்கள் வழங்குவது குறித்த அரசின் அறிவிப்பு குறித்துப் பேசிய அவர், டெல்லி நாடாளுமன்றத்தைப் போல பொதுவான போக்குவரத்து வசதியை ஏற்படுத்தலாம் என்ற மாற்றுக் கருத்தையும் முன்வைத்தார். பிரதமர் பதவி குறித்த கேள்விக்கு பதிலளித்த கார்த்தி சிதம்பரம், 272 நாடாளுமன்ற உறுப்பினர்களின் ஆதரவைப் பெறும் எந்த ஒரு கூட்டணியின் தலைவரும் பிரதமராக முடியும் என்பதுதான் ஜனநாயகத்தின் அடிப்படை என்று தெளிவுபடுத்தினார்.