வத்திக்கானில் போப் லியோ XIV-ஐ சந்தித்த பாப் டிலான்: இசை மற்றும் ஆன்மிகப் பகிர்வு

புகழ்பெற்ற அமெரிக்க பாடகர் பாப் டிலான், வத்திக்கானில் போப் லியோ XIV-ஐ நேரில் சந்தித்து உரையாடினார்.

புகழ்பெற்ற அமெரிக்க பாடலாசிரியரும், கவிஞருமான பாப் டிலான், வத்திக்கானில் போப் லியோ XIV-ஐ சந்தித்து உரையாடியுள்ளார். இத்தாலியில் தனது இசை நிகழ்ச்சிகளுக்காக சுற்றுப்பயணம் மேற்கொண்டுள்ள பாப் டிலான், அதற்கிடையிலான இடைவேளையில் வத்திக்கானுக்கு வருகை தந்து போப் லியோவைச் சந்தித்தார். இந்த சந்திப்பு மிகச் சுருக்கமானதாக இருந்தபோதிலும், இருவருக்கும் இடையிலான உரையாடல் ஆழமானதாக அமைந்ததாக வத்திக்கான் தரப்பில் தெரிவிக்கப்பட்டுள்ளது. சந்திப்பின்போது, போப் லியோ XIV அவருக்கு ஒரு ஜெபமாலையை பரிசளித்தார். அதற்குப் பதிலாக, பாப் டிலான் தனது சுயசரிதை நூலான 'குரோனிகல்ஸ்: வால்யூம் ஒன்' (Chronicles: Volume One) புத்தகத்தை போப் லியோவுக்கு வழங்கினார்.

போப் லியோ XIV, பாப் டிலானின் பாடல்கள் மீது மிகுந்த ஈடுபாடு கொண்டவர் என்பது குறிப்பிடத்தக்கது. கடந்த 2026 ஆம் ஆண்டு வெளியான தனது 'டிஸ்ஆம்டு அண்ட் டிஸ்ஆமிங்: பீஸ் இஸ் எ கிஃப்ட்' (Disarmed and Disarming: Peace Is a Gift) என்ற புத்தகத்தில், 1963 ஆம் ஆண்டு பாப் டிலான் எழுதிய 'கோ அவே யூ பாம்' (Go Away You Bomb) என்ற எதிர்ப்புக் கவிதை வரிகளை போப் மேற்கோள் காட்டியிருந்தார். அணு ஆயுதப் போட்டியைத் தவிர்க்க வேண்டியதன் அவசியத்தை வலியுறுத்தும் வகையில், அந்தப் பாடலின் வரிகளை அவர் பயன்படுத்தியிருந்தார். இந்த சந்திப்பின் போது இருவருமே தனிப்பட்ட முறையில் சிறிது நேரம் உரையாடியுள்ளனர்.

பாப் டிலான் புனித அகஸ்டின் மீது அதிக பற்று கொண்டவர். இந்தச் சந்திப்பின் போது, வத்திக்கான் கலாச்சார அமைச்சக அதிகாரி அந்தோனியோ ஸ்படாரோ மற்றும் வத்திக்கான் செய்தித்தாளின் ஆசிரியரான ஆண்ட்ரியா மொண்டா ஆகியோர் உடன் இருந்தனர். பாப் டிலான், சிகாகோவைச் சேர்ந்த போப் லியோவின் பின்னணியையும், அவரது ஆன்மிகக் கொள்கைகளையும் அறிந்தவர் என்பதால், இந்தச் சந்திப்பு இருவருக்கும் இடையிலான ஒரு புரிதலை மேம்படுத்துவதாக அமைந்தது. குறிப்பாக, பாப் டிலான் தனது 1967 ஆம் ஆண்டு ஆல்பத்திற்காக புனித அகஸ்டினை மையப்படுத்தி பாடல் எழுதியிருந்தது குறிப்பிடத்தக்கது.

பாப் டிலானுக்கு இது முதல் போப் சந்திப்பு அல்ல. இதற்கு முன்னதாக 1997 ஆம் ஆண்டு இத்தாலியின் போலோக்னாவில் நடைபெற்ற மதக் கூட்டத்தில், மறைந்த போப் இரண்டாம் ஜான் பால் முன்னிலையில் அவர் இசை நிகழ்ச்சி நடத்தியுள்ளார். தற்போது 85 வயதைக் கடந்து இசைப் பயணத்தைத் தொடர்ந்து வரும் டிலான், மிலான் மற்றும் ரோமில் தனது இசை நிகழ்ச்சிகளைத் திட்டமிட்டுள்ளார். மிலனில் தனது நிகழ்ச்சியை முடித்துவிட்டு ரோமில் நிகழ்த்துவதற்கு இடைப்பட்ட நேரத்தில்தான் அவர் வத்திக்கானுக்குச் சென்று போப் லியோவைச் சந்தித்து தனது மரியாதையைச் செலுத்தியுள்ளார்.