சென்னை புழல் சிறையில் அதிரடி சோதனை: பேனாவிற்குள் மறைத்து வைக்கப்பட்டிருந்த கஞ்சா பறிமுதல்

சென்னை புழல் சிறையில் கைதி ஒருவருக்கு பேனா ரீஃபில் மூலம் கஞ்சா கடத்த முயன்ற வழக்கில் வழக்கறிஞர் மற்றும் கைதி மீது வழக்குப்பதிவு செய்யப்பட்டுள்ளது.

சென்னை புழல் மத்திய சிறையில் கைதி ஒருவருக்கு கஞ்சா கடத்தி வரப்பட்ட சம்பவம் பெரும் பரபரப்பை ஏற்படுத்தியுள்ளது. சிறை நிர்வாகத்தினர் மேற்கொண்ட வழக்கமான சோதனையின் போது, தடைசெய்யப்பட்ட போதைப்பொருள் சிக்கியது தொடர்பாக கைதி மற்றும் வழக்கறிஞர் மீது காவல்துறையினர் வழக்குப்பதிவு செய்துள்ளனர். வில்லிவாக்கத்தைச் சேர்ந்த ஆதித்யா என்பவர், கஞ்சா கடத்தல் வழக்கில் கடந்த மே மாதம் திருநின்றவூர் காவல்துறையினரால் கைது செய்யப்பட்டு, புழல் சிறையில் அடைக்கப்பட்டிருந்தார்.

சிறை வளாகத்தில் கைதிகளின் உடைமைகளை சிறைக்காவலர்கள் ஆய்வு செய்தபோது, ஆதித்யாவின் வசம் இருந்த பேனாவை சோதனையிட்டனர். அந்த பேனாவின் ரீஃபில் பகுதியில் சந்தேகத்திற்குரிய வகையில் ஏதோ மறைக்கப்பட்டிருப்பதை கண்டறிந்த அதிகாரிகள், அதனைத் திறந்து பார்த்தபோது உள்ளே கஞ்சா பொட்டலம் மறைத்து வைக்கப்பட்டிருந்தது உறுதி செய்யப்பட்டது. உடனே அதிகாரிகள் அந்த போதைப்பொருளை பறிமுதல் செய்து விசாரணை மேற்கொண்டனர்.

மேற்கொள்ளப்பட்ட விசாரணையில், தன்னை சந்திக்க வந்த வழக்கறிஞர் கார்த்திகேயன் என்பவர் இந்த பேனாவை வழங்கியதாக கைதி ஆதித்யா ஒப்புக்கொண்டதாக சிறைத்துறை வட்டாரங்கள் தெரிவிக்கின்றன. வழக்கறிஞரின் வருகையைப் பயன்படுத்தி இத்தகைய சட்டவிரோத செயலில் ஈடுபட்டது சிறை நிர்வாகத்தினர் இடையே அதிர்ச்சியை ஏற்படுத்தியுள்ளது. சிறை விதிகளை மீறி கஞ்சாவை உள்ளே கொண்டு வர உதவியது தொடர்பாக சிறை அதிகாரிகள் அளித்த புகாரின் அடிப்படையில், வழக்கறிஞர் கார்த்திகேயன் மற்றும் கைதி ஆதித்யா மீது காவல் துறையினர் வழக்குப்பதிவு செய்து விசாரணை நடத்தி வருகின்றனர்.

இந்த கஞ்சா கடத்தல் சம்பவத்தில் வழக்கறிஞருக்கு வேறு யாராவது உடந்தையாக இருந்தார்களா அல்லது இத்தகைய கடத்தல்கள் இதற்கு முன்பும் நடந்துள்ளதா என்பது குறித்து விரிவான விசாரணை நடைபெற்று வருகிறது. சிறை பாதுகாப்பு நடைமுறைகளைத் தாண்டி, வழக்கறிஞர் என்ற போர்வையில் போதைப்பொருள் சிறைக்குள் கொண்டு வரப்பட்டது பாதுகாப்பு குறைபாடாகக் கருதப்படுகிறது. இது தொடர்பாக சிறைத்துறையினர் தீவிர கண்காணிப்பில் ஈடுபட்டு வருகின்றனர்.