சென்னையில் நீர்நிலைகளில் கலக்கும் கழிவுநீர்: 126 MLD நீர் சுத்திகரிப்பு நிலையங்களுக்குச் செல்லவில்லை என அதிர்ச்சி தகவல்

சென்னையில் தினசரி 126 மில்லியன் லிட்டர் கழிவுநீர் சுத்திகரிப்பு நிலையங்களுக்குச் செல்லாமல் நீர்நிலைகளில் கலப்பதாக மெட்ரோ வாட்டர் நிர்வாகம் தெரிவித்துள்ளது.

சென்னை மாநகரின் வடக்கு பகுதிகளில் உற்பத்தியாகும் சுமார் 126 மில்லியன் லிட்டர் (MLD) கழிவுநீர், மெட்ரோ வாட்டர் வாரியத்தின் சுத்திகரிப்பு நிலையங்களைச் சென்றடையாமல் வீணாவதாகத் தெரியவந்துள்ளது. இந்த பெரும் அளவிலான கழிவுநீர் நகரத்தின் பல்வேறு நீர்நிலைகளில் நேரடியாகக் கலக்கும் அபாயம் உள்ளதாக, தேசிய பசுமைத் தீர்ப்பாயத்திடம் (NGT) சமர்ப்பிக்கப்பட்ட அறிக்கையில் மெட்ரோ வாட்டர் நிர்வாகம் ஒப்புக்கொண்டுள்ளது. பாதாள சாக்கடை குழாய்களில் ஏற்பட்டுள்ள சேதங்களே இந்த சிக்கலுக்கு முதன்மைக் காரணமாகக் கண்டறியப்பட்டுள்ளது.

மெட்ரோ வாட்டர் மற்றும் தமிழ்நாடு மாசுக்கட்டுப்பாட்டு வாரியம் இணைந்து மேற்கொண்ட ஆய்வில், தண்டையார்பேட்டை, புரசைவாக்கம், திரு.வி.க. நகர் மற்றும் கொளத்தூர் ஆகிய பகுதிகளில் உள்ள குழாய்களில் கடும் சேதம் ஏற்பட்டுள்ளது உறுதியானது. மெட்ரோ வாட்டரின் அதிகார வரம்பிற்குள் தினசரி 830 மில்லியன் லிட்டர் கழிவுநீர் உந்தப்படுகிறது, ஆனால் அதில் 704 மில்லியன் லிட்டர் மட்டுமே சுத்திகரிப்பு நிலையங்களை வந்தடைகிறது. எஞ்சிய 126 மில்லியன் லிட்டர் கழிவுநீர் எங்கே செல்கிறது என்பது குறித்த அச்சம் தற்போது எழுந்துள்ளது.

மிகப்பெரிய இழப்பாக, புரசைவாக்கம் மற்றும் கொடுங்கையூர் கழிவுநீர் சுத்திகரிப்பு நிலையங்களை இணைக்கும் குழாய்களில் சுமார் 70 மில்லியன் லிட்டர் நீர் வெளியேறுகிறது. கணேசபுரம் சுரங்கப்பாதை மேம்பாலப் பணிகளின் போது குழாய்கள் சேதமடைந்ததே இதற்கு முக்கியக் காரணமாகக் கூறப்படுகிறது. இதனைச் சரிசெய்யும் பணிகள் நடைபெற்று வருவதாகவும், ஏப்ரல் 30, 2027-க்குள் பணிகளை முடிக்க இலக்கு நிர்ணயிக்கப்பட்டுள்ளதாகவும் மெட்ரோ வாட்டர் தரப்பில் தெரிவிக்கப்பட்டுள்ளது.

தண்டையார்பேட்டையில் 30 ஆண்டுகள் பழமையான 1,200 மிமீ விட்டம் கொண்ட குழாய்கள் பழுதடைந்துள்ளதால், கழிவுநீர் கால்வாய்களில் கசிகிறது. இதற்காக ரூ.70.45 கோடி மதிப்பீட்டில் மாற்றுப் பாதையில் குழாய் பதிக்கும் பணிகள் நடைபெற்று வருகின்றன, அதில் தற்போது 90 சதவீதப் பணிகள் நிறைவடைந்துள்ளன. இதற்கிடையில், ஜமாலியா நகர் மற்றும் ரெட்டேரி சந்திப்புகளில் காணப்பட்ட கசிவுகள் ஏற்கனவே சரிசெய்யப்பட்டுவிட்டதாக அதிகாரிகள் உறுதிப்படுத்தியுள்ளனர்.