செய்யாறு சிப்காட் நிலம் கையகப்படுத்துதல்: 22.16 ஹெக்டேர் நிலத்திற்கான அறிவிப்பு ரத்து

திருவண்ணாமலை மாவட்டம் செய்யாறு சிப்காட் விரிவாக்கத்திற்காக கையகப்படுத்தப்படவிருந்த 22.16 ஹெக்டேர் நிலத்திற்கான அறிவிப்பை தமிழ்நாடு அரசு திரும்பப் பெற்றுள்ளது.

திருவண்ணாமலை மாவட்டம், செய்யாறு பகுதியில் சிப்காட் தொழிற்பூங்கா விரிவாக்கத் திட்டத்தின் மூன்றாம் கட்டத்திற்காக நிலம் கையகப்படுத்தும் நடவடிக்கையில் முக்கிய மாற்றத்தை தமிழ்நாடு அரசு மேற்கொண்டுள்ளது. கடந்த செப்டம்பர் 1-ஆம் தேதி வெளியிடப்பட்ட நிலம் கையகப்படுத்துதல் குறித்த அறிவிக்கையை மாநில அரசு அதிகாரப்பூர்வமாகத் திரும்பப் பெற்றுள்ளது. இதன் மூலம் மேல்படை கிராமத்தில் கையகப்படுத்தத் திட்டமிடப்பட்டிருந்த 22.16 ஹெக்டேர் நிலம் தொடர்பான நடவடிக்கைகள் தற்காலிகமாக நிறுத்தப்பட்டுள்ளன.

தமிழ்நாடு தொழில் வளர்ச்சி நிறுவனமான சிப்காட் நிர்வாக இயக்குநரின் அறிக்கையின்படி, இந்த முடிவானது திருவண்ணாமலை மாவட்ட ஆட்சியரின் பரிந்துரையின் அடிப்படையில் எடுக்கப்பட்டுள்ளது. கடந்த செப்டம்பர் 1-ஆம் தேதி தமிழ்நாடு அரசு இதழில் எண் 369-இன் கீழ், தமிழ்நாடு தொழில் நோக்கங்களுக்கான நிலம் கையகப்படுத்துதல் சட்டத்தின் பிரிவு 3(1)-இன் கீழ் வெளியிடப்பட்டிருந்த அறிவிக்கை தற்போது ரத்து செய்யப்படுவதாக அறிவிக்கப்பட்டுள்ளது. இது செய்யாறு வட்டத்தில் உள்ள யூனிட் 1, பிளாக் 2 பகுதியில் அமைந்துள்ள நிலங்களைக் குறிப்பதாக அமைகிறது.

செய்யாறு சிப்காட் தொழிற்பூங்காவை விரிவாக்கம் செய்வதற்காக சுமார் 3,174 ஏக்கர் நிலங்களை கையகப்படுத்த அரசு திட்டமிட்டிருந்தது. இந்தத் திட்டத்திற்கு எதிர்ப்பு தெரிவித்து மேல்படை மற்றும் அதன் சுற்றுவட்டாரக் கிராமங்களைச் சேர்ந்த விவசாயிகள் ஜூலை 2023 முதல் தொடர்ச்சியான போராட்டங்களில் ஈடுபட்டு வந்தனர். விவசாய நிலங்களை இழக்க நேரிடும் என்ற அச்சத்தில், தங்களின் வாழ்வாதாரத்தைப் பாதுகாக்கக் கோரி விவசாயிகள் பல கட்டப் போராட்டங்களையும், உண்ணாவிரதங்களையும் முன்னெடுத்தனர். இந்த நீண்டகால போராட்டத்தின் விளைவாக பல வழக்குகள் மற்றும் கைது நடவடிக்கைகளும் அப்பகுதியில் பதிவாகின.

இந்த புதிய அறிவிப்பின் மூலம் மேல்படை கிராமத்தில் குறிப்பிட்ட 22.16 ஹெக்டேர் நிலத்தை கையகப்படுத்தும் முயற்சி கைவிடப்பட்டுள்ளது. தொழிற்பூங்கா விரிவாக்கத் திட்டத்தை எதிர்த்து விவசாயிகள் முன்னெடுத்த வலுவான போராட்டங்களும், அது தொடர்பான சமூகத் தாக்கங்களும் இந்த அரசு நடவடிக்கைக்கு மிக முக்கியக் காரணமாக அமைந்ததாகக் கருதப்படுகிறது. அரசு நிர்வாகத்தின் இந்த முடிவு அப்பகுதி மக்களிடையே பெரும் எதிர்பார்ப்பையும், விவாதங்களையும் ஏற்படுத்தியுள்ளது.