சத்ரபதி சிவாஜி மகாராஜ் வரலாற்று காவியம்: ரிஷப் ஷெட்டியுடன் கைகோர்த்தது டி-சீரிஸ் நிறுவனம்

சத்ரபதி சிவாஜி மகாராஜின் வரலாற்று காவியத்தை இரண்டு பாகங்களாகத் தயாரிக்கும் பணியில் டி-சீரிஸ் நிறுவனம் இணைந்துள்ளது.

மராட்டிய பேரரசர் சத்ரபதி சிவாஜி மகாராஜின் வீர வரலாற்றை மையமாகக் கொண்டு உருவாகும் 'தி பிரைட் ஆஃப் பாரத் – சத்ரபதி சிவாஜி மகாராஜ்' திரைப்படத்தின் தயாரிப்பு பணிகளில் முன்னணி தயாரிப்பு நிறுவனமான டி-சீரிஸ் இணைந்துள்ளது. சந்தீப் சிங் இயக்கத்தில் பிரம்மாண்டமாக உருவாகும் இந்தத் திரைப்படம் இரண்டு பாகங்களைக் கொண்ட வரலாற்று காவியமாகத் திட்டமிடப்பட்டுள்ளது. இதில் மராட்டிய மன்னர் சிவாஜியின் பாத்திரத்தில் நடிகர் ரிஷப் ஷெட்டி நடிக்கவுள்ளார் என்பது குறிப்பிடத்தக்கது.

இந்தக் கூட்டணியை உறுதிப்படுத்தும் விதமாக, தயாரிப்பாளர் பூஷன் குமார், நடிகர் ரிஷப் ஷெட்டிக்கு சுமார் நூறு ஆண்டுகள் பழமையான சத்ரபதி சிவாஜி மகாராஜின் ஓவியத்தை பரிசாக வழங்கினார். சிவாஜி மகாராஜின் போர்க்கள நுணுக்கங்கள், சுயராஜ்யத்தை நிறுவிய விதம் மற்றும் அவரது வாழ்வின் அறியப்படாத தியாகங்கள் ஆகியவற்றை இந்தத் திரைப்படம் விரிவாகப் பேசும் என படக்குழுவினர் தெரிவித்துள்ளனர். வரலாற்றுச் சிறப்புமிக்க இந்தத் திட்டத்தை உலக அரங்கிற்கு கொண்டு செல்வதில் மிகுந்த ஆர்வத்துடன் இருப்பதாக பூஷன் குமார் குறிப்பிட்டுள்ளார்.

திரைப்படத்தின் நோக்கம் குறித்துப் பேசிய பூஷன் குமார், மராட்டிய மண் மற்றும் சத்ரபதி சிவாஜி மகாராஜ் நமக்கு விட்டுச் சென்றுள்ள பாரம்பரியத்தை சினிமாவில் பிரதிபலிப்பது நமது பொறுப்பு என்று கூறியுள்ளார். ரிஷப் ஷெட்டியின் நடிப்புத் திறனும், திரையில் அவர் வெளிப்படுத்தும் கம்பீரமும் இந்த வரலாற்று நாயகனின் வீரத்தையும் தொலைநோக்குப் பார்வையையும் ரசிகர்களிடையே கொண்டு செல்ல சரியான கலவையாக அமையும் என அவர் நம்பிக்கை தெரிவித்தார். சுயராஜ்யத்தின் ஆத்மாவை அடுத்த தலைமுறைக்கும் கொண்டு செல்லும் முயற்சியில் இந்தத் திரைப்படம் ஒரு முக்கிய மைல்கல்லாக இருக்கும்.

தற்போது இத்திரைப்படத்தின் முன் தயாரிப்பு பணிகள் முழுவீச்சில் நடைபெற்று வருகின்றன. இந்தியா மற்றும் வெளிநாடுகளைச் சேர்ந்த சிறந்த தொழில்நுட்பக் கலைஞர்கள் மற்றும் நடிகர்களைத் திரட்டும் பணியில் படக்குழுவினர் ஈடுபட்டுள்ளனர். வரும் 2027-ஆம் ஆண்டின் தொடக்கத்தில் படப்பிடிப்பைத் தொடங்கத் திட்டமிடப்பட்டுள்ளது. குல்ஷன் குமார் மற்றும் டி-சீரிஸ் பிலிம்ஸ் வழங்க, டி-சீரிஸ் பிலிம்ஸ் மற்றும் லெஜண்ட் ஸ்டுடியோஸ் இணைந்து இந்தப் பிரம்மாண்ட தயாரிப்பை உருவாக்குகின்றன. ரிஷி விரமானி மற்றும் சந்தீப் சிங் திரைக்கதை எழுதியுள்ள இந்தப் படத்தில், ரிஷப் ஷெட்டி, சிவ் சனானா மற்றும் கபீர் சதானந்த் ஆகியோர் இணை தயாரிப்பாளர்களாகப் பணியாற்றுகின்றனர்.