தமிழ்நாடு சமூக நீதித்துறை விடுதிகளில் விரைவில் சிக்கன் பிரியாணி: அரசு அதிரடி முடிவு

தமிழ்நாடு சமூக நீதித்துறை விடுதிகளில் திங்கட்கிழமை தோறும் சிக்கன் பிரியாணி வழங்கப்படும் என்று அமைச்சர் வன்னி அரசு அறிவித்துள்ளார்.

தமிழ்நாட்டில் சமூக நீதித்துறையின் கீழ் இயங்கும் விடுதிகளில் தங்கிப் பயிலும் மாணவர்களின் உணவில் முக்கிய மாற்றங்களைக் கொண்டுவர தமிழக அரசு திட்டமிட்டுள்ளது. இதன்படி, வாரந்தோறும் திங்கட்கிழமைகளில் மாணவர்களுக்குச் சுவையான சிக்கன் பிரியாணி வழங்கப்படும் என்று சமூக நீதித்துறை அமைச்சர் வன்னி அரசு அறிவித்துள்ளார். இது தொடர்பாக முறையான அரசாணை அடுத்த இரண்டு வாரங்களுக்குள் வெளியிடப்படும் என்று எதிர்பார்க்கப்படுகிறது. விடுதி மாணவர்களுக்கு காலை வேளைகளில் தேநீர் வழங்கும் வழக்கமும் விரைவில் நடைமுறைக்கு வர உள்ளது.

சென்னையில் உள்ள சமூக நீதித்துறை விடுதி ஒன்றில் அமைச்சர் வன்னி அரசு திங்கள்கிழமை இரவு திடீர் ஆய்வு மேற்கொண்டார். இந்த ஆய்வின்போது மாணவர்களிடம் உணவுத் தரம் மற்றும் மெனு குறித்து கேட்டறிந்தார். முன்னதாக தாக்கல் செய்யப்பட்ட பட்ஜெட்டில், கல்லூரி விடுதி மாணவர்களுக்கான உணவுப் படியை தலா 500 ரூபாயும், பள்ளி விடுதி மாணவர்களுக்கு 400 ரூபாயும் உயர்த்தி அறிவிக்கப்பட்டு இருந்தது. இந்த நிதி ஒதுக்கீட்டைத் தொடர்ந்து தற்போது புதிய உணவுத் திட்டங்கள் அமல்படுத்தப்பட உள்ளன. ஏற்கனவே புதன்கிழமைகளில் மட்டன் மற்றும் சிக்கன் குழம்பு வழங்கப்பட்டு வரும் நிலையில், திங்கட்கிழமை பிரியாணி சேர்க்கப்படுவது மாணவர்களிடையே மகிழ்ச்சியை ஏற்படுத்தியுள்ளது.

விடுதி உணவில் மாட்டிறைச்சி சேர்ப்பது குறித்த கோரிக்கைகள் எழுந்துள்ள நிலையில், அது தொடர்பாக அதிகாரிகள் மற்றும் மாணவர்களுடன் ஆலோசித்து முடிவு எடுக்கப்படும் என்று அமைச்சர் வன்னி அரசு தெரிவித்துள்ளார். மாணவர்கள் தங்கள் விருப்பத்தைப் பொறுத்து உணவை வழங்கவே அரசு விரும்புகிறது என்றும், தானாக முடிவெடுக்காமல் அனைவரிடமும் கலந்து ஆலோசித்து இறுதி செய்யப்படும் என்றும் அவர் குறிப்பிட்டார். இதற்கிடையில், இந்த விவகாரம் அரசியல் ரீதியாக விவாதங்களை ஏற்படுத்தியுள்ளது. புதிய தமிழகம் கட்சியின் தலைவர் க. கிருஷ்ணசாமி உள்ளிட்ட சில தரப்பினர் இதற்கு எதிர்ப்பு தெரிவித்து கருத்துகளைப் பகிர்ந்துள்ளனர்.

மாணவர்களின் கருத்துகளுக்கு மதிப்பளித்து விடுதி உணவுகளில் ஏற்கனவே பல மாற்றங்கள் செய்யப்பட்டு வருவதாக அரசு தரப்பில் கூறப்படுகிறது. கிச்சடி, உப்புமா போன்ற உணவுகளுக்குப் பதிலாக இட்லி, தோசை போன்ற மாணவர்கள் விரும்பும் உணவுகள் மெனுவில் சேர்க்கப்பட்டுள்ளன. மாணவர்களின் உடல்நலம் மற்றும் விருப்பத்தை அடிப்படையாகக் கொண்டு, கலாச்சார மற்றும் மத உணர்வுகளையும் கருத்தில் கொண்டு இறுதி முடிவு எடுக்கப்படும் என்று எதிர்பார்க்கப்படுகிறது. சுமார் 1,400 விடுதிகளில் இந்த மாற்றங்கள் படிப்படியாகச் செயல்படுத்தப்பட உள்ளன.