தமிழகத்தில் சிப் உற்பத்தி: மத்திய அரசின் ஒப்புதல் இன்றி மாநில மானியம் வழங்கும் புதிய திட்டம்

தமிழகத்தில் சிப் உற்பத்தி முதலீடுகளை ஈர்க்க மத்திய அரசின் ஒப்புதல் இல்லாமலேயே மானியம் வழங்கும் புதிய திட்டத்தை முதலமைச்சர் சி.ஜோசப் விஜய் தொடங்கி வைத்துள்ளார்.

தமிழகத்தில் குறைக்கடத்தி (Semiconductor) உற்பத்தித் துறையை ஊக்குவிக்கும் நோக்கில், முதலமைச்சர் சி.ஜோசப் விஜய் 'தமிழ்நாடு குறைக்கடத்தி சுற்றுச்சூழல் அமைப்புத் திட்டத்தை' (Tamil Nadu Semiconductor Ecosystem Scheme) தொடங்கி வைத்துள்ளார். இந்த புதிய திட்டத்தின் முக்கிய சிறப்பம்சமாக, மாநில அரசின் மானியங்கள் மத்திய அரசின் ஒப்புதலுடன் இணைக்கப்படாமல் தன்னிச்சையாக செயல்படும் வகையில் மாற்றப்பட்டுள்ளன. முன்னதாக, மாநில அரசு வழங்கும் மூலதன மானியம் மத்திய அரசின் உதவித் திட்டங்களுடன் பிணைக்கப்பட்டிருந்தது. ஆனால், தற்போது வெளியிடப்பட்டுள்ள புதிய அரசாணையின்படி, மத்திய அரசின் 'செமிகான் 2.0' திட்டத்தில் இடம் பெறாத அல்லது தேர்வு செய்யப்படாத திட்டங்களுக்கும் தமிழக அரசு தனது சொந்த நிதியில் இருந்து மானியங்களை வழங்க முடிவெடுத்துள்ளது.

இந்தத் திட்டம் இரண்டு வழித்தடங்களைக் கொண்டுள்ளது. முதல் வழித்தடத்தின் கீழ், மத்திய அரசால் அங்கீகரிக்கப்பட்ட திட்டங்களுக்கு கூடுதல் மாநில ஊக்கத்தொகைகள் வழங்கப்படும். இதில் 300 மிமீ சிலிக்கான் வேபர் ஃபேப்ரிகேஷன் மற்றும் மேம்பட்ட பேக்கேஜிங் திட்டங்களுக்கு 25 சதவீத மாநில ஆதரவும், இதர பேக்கேஜிங் திட்டங்களுக்கு 20 சதவீத ஆதரவும் வழங்கப்படுகிறது. செமிகண்டக்டர் தரம் வாய்ந்த மூலப்பொருட்கள், சோதனை மற்றும் ஆராய்ச்சி மேம்பாட்டு வசதிகள் கொண்ட திட்டங்களுக்கு 15 சதவீத மாநில ஆதரவு வழங்கப்பட உள்ளது. இத்திட்டத்தின் மூலம் முதலீட்டாளர்கள் தங்களுக்கு சாதகமான வழித்தடத்தைத் தேர்வு செய்யும் வாய்ப்பு வழங்கப்பட்டுள்ளது.

இரண்டாவது வழித்தடமானது மத்திய அரசின் உதவி கோராத அல்லது மத்திய அரசின் திட்டத்தில் தேர்வு செய்யப்படாத நிறுவனங்களுக்காக பிரத்யேகமாக உருவாக்கப்பட்டுள்ளது. இத்திட்டத்தில் சேரும் நிறுவனங்களுக்கு, தகுதியான நிலையான சொத்து மதிப்பில் 15 முதல் 25 சதவீதம் வரை மூலதன மானியம் வழங்கப்படும். கூடுதலாக, நிறுவனத்தின் விற்றுமுதல் அடிப்படையில் ஆண்டுக்கு 2 சதவீதம் வரை ஐந்து ஆண்டுகளுக்கு மானியம் கிடைக்கும். இந்த சலுகைகளைப் பெறுவதற்கு, குறைக்கடத்தி மூலப்பொருட்கள் மற்றும் பேக்கேஜிங் சார்ந்த தயாரிப்புகளுக்கு குறைந்தபட்சம் 50 கோடி ரூபாயும், மேம்பட்ட பேக்கேஜிங் திட்டங்களுக்கு 500 கோடி ரூபாயும் முதலீடு செய்வது கட்டாயமாக்கப்பட்டுள்ளது.

முதலீடுகளை ஈர்க்கும் இந்தத் திட்டத்தில் பங்கேற்க விரும்பும் நிறுவனங்கள், தமிழக அரசின் முதலீட்டு ஊக்குவிப்பு முகமையான 'கைடன்ஸ் தமிழ்நாடு' அமைப்பிடம் செப்டம்பர் 30, 2027-க்குள் விண்ணப்பிக்க வேண்டும் என்று அரசு தரப்பில் தெரிவிக்கப்பட்டுள்ளது. இத்திட்டத்தின் மூலம் வேலைவாய்ப்பை உருவாக்கும் வகையில், நிறுவனங்களில் பணியமர்த்தப்படும் ஊழியர்களில் குறைந்தபட்சம் 50 சதவீதம் பேர் தமிழகத்தைச் சேர்ந்தவர்களாக இருக்க வேண்டும் என்பது முக்கிய நிபந்தனையாக விதிக்கப்பட்டுள்ளது. சிப் வடிவமைப்பு மற்றும் திறன் மேம்பாட்டுத் திட்டங்களுக்கான தனி ஊக்கத்தொகைகள் குறித்த அறிவிப்புகள் வரும் காலங்களில் வெளியிடப்படும் என்று எதிர்பார்க்கப்படுகிறது.