வடகிழக்கு பருவமழை எதிரொலி: 16 மாவட்டங்களில் மேற்கொள்ளப்பட வேண்டிய பாதுகாப்பு நடவடிக்கைகள் குறித்து முதலமைச்சர் ஆலோசனை

வடகிழக்கு பருவமழை முன்னெச்சரிக்கை நடவடிக்கைகளை தமிழ்நாடு முதலமைச்சர் மு.க.ஸ்டாலின் ஆய்வு செய்தார்.

தமிழ்நாட்டில் வடகிழக்கு பருவமழை தீவிரமடைந்துள்ள நிலையில், மிக கனமழை பெய்யக்கூடும் என வானிலை ஆய்வு மையம் எச்சரிக்கை விடுத்துள்ள 16 மாவட்டங்களில் மேற்கொள்ளப்பட வேண்டிய முன்னெச்சரிக்கை நடவடிக்கைகள் குறித்து முதலமைச்சர் சி.ஜோசப் விஜய் வியாழக்கிழமை விரிவான ஆய்வு மேற்கொண்டார். சென்னை எழிலகத்தில் அமைந்துள்ள மாநில அவசர கால கட்டுப்பாட்டு மையத்திற்கு நேரில் சென்ற முதலமைச்சர், அங்குள்ள செயல்பாடுகளை நேரில் பார்வையிட்டு ஆய்வு செய்தார்.

இந்த ஆய்வின் போது, பருவமழை பாதிப்புக்கு உள்ளாக வாய்ப்புள்ள மாவட்டங்களின் ஆட்சியர்களுடன் காணொளி காட்சி வாயிலாக முதலமைச்சர் உரையாடினார். அப்போது கனமழை மற்றும் வெள்ளத்தினால் உயிரிழப்புகள் ஏதும் ஏற்படாத வண்ணம் அனைத்து பாதுகாப்பு நடவடிக்கைகளையும் மாவட்ட நிர்வாகங்கள் துரிதமாக மேற்கொள்ள வேண்டும் என்று அவர் உத்தரவிட்டார். பல்வேறு அரசு துறைகளுக்கு இடையே ஒருங்கிணைப்பை வலுப்படுத்தி, அவசர காலங்களில் பொதுமக்களுக்கு உடனடி உதவிகள் கிடைப்பதை உறுதி செய்ய வேண்டும் என்றும் அவர் வலியுறுத்தினார்.

முதலமைச்சர் ஆய்வின் போது, எழிலகத்தில் உள்ள ஒருங்கிணைந்த பல்முனை பேரிடர் கண்காணிப்பு பலகையை பார்வையிட்டார். இந்த நவீன தொழில்நுட்ப அமைப்பு மூலம் மழைப்பொழிவு நிலவரங்கள், வானிலை முன்னறிவிப்புகள், அணைகளின் நீர்மட்டம் மற்றும் செயற்கைக்கோள் தரவுகளை உடனுக்குடன் கண்காணிக்க முடியும் என்பது குறிப்பிடத்தக்கது. மேலும், புகார்களை பதிவு செய்ய அமைக்கப்பட்டுள்ள அழைப்பு மையத்தின் செயல்பாடுகள் குறித்தும் முதலமைச்சர் விரிவாக கேட்டறிந்தார்.

நீலகிரி, கோயம்புத்தூர், திண்டுக்கல், தேனி, மதுரை, விருதுநகர், தென்காசி, கன்னியாகுமரி, திருநெல்வேலி, தூத்துக்குடி, சிவகங்கை, புதுக்கோட்டை, திருவாரூர், தஞ்சாவூர், நாகப்பட்டினம் மற்றும் மயிலாடுதுறை ஆகிய மாவட்டங்களுக்கு மிக கனமழை எச்சரிக்கை விடுக்கப்பட்டுள்ள சூழலில் இந்த ஆய்வு முக்கியத்துவம் பெறுகிறது. இந்நிகழ்வின் போது அமைச்சர் கே.ஏ.செங்கோட்டையன், தலைமைச் செயலாளர் எம்.சாய் குமார் மற்றும் உயர் அரசு அதிகாரிகள் உடனிருந்தனர்.