கோவை ஆனைக்கட்டி சாலையில் வனவிலங்குகள் பாதுகாப்பு: அமிக்கஸ் கியூரி ஆய்வு செய்ய நீதிமன்றம் உத்தரவு

கோவை - ஆனைக்கட்டி சாலையில் வனவிலங்குகளின் பாதுகாப்பை உறுதி செய்ய அமிக்கஸ் கியூரி ஆய்வு நடத்த சென்னை உயர் நீதிமன்றம் உத்தரவிட்டுள்ளது.

கோயம்புத்தூர் மற்றும் ஆனைக்கட்டி இடையே உள்ள சாலை வனவிலங்குகள் அடிக்கடி கடக்கும் முக்கியப் பாதையாக உள்ளது. இங்கு வாகனங்கள் வேகமாகச் செல்வதால் வனவிலங்குகள் பாதிக்கப்படுவதைத் தடுக்கவும், அவற்றின் பாதுகாப்பை உறுதி செய்யவும் சென்னை உயர் நீதிமன்றம் முக்கிய உத்தரவு ஒன்றைப் பிறப்பித்துள்ளது. இது தொடர்பான வழக்கு சென்னை உயர் நீதிமன்றத்தின் சுற்றுச்சூழல் மற்றும் வனத்துறை சார்ந்த வழக்குகளை விசாரிக்கும் சிறப்பு அமர்வின் நீதிபதிகள் என். சதீஷ்குமார் மற்றும் கே. ராஜசேகர் ஆகியோர் முன்னிலையில் விசாரணைக்கு வந்தது.

இந்த வழக்கில், அமிக்கஸ் கியூரி (நீதிமன்றத்திற்கு உதவும் வழக்கறிஞர்) நேரில் கள ஆய்வு செய்து, வாகனங்களின் வேகத்தைக் கட்டுப்படுத்துவதற்கான வழிமுறைகள் மற்றும் வனவிலங்குகளின் பாதுகாப்பிற்குத் தேவையான இதர நடவடிக்கைகள் குறித்து பரிந்துரைகளை வழங்க வேண்டும் என நீதிபதிகள் உத்தரவிட்டுள்ளனர். இந்த ஆய்வு அறிக்கையை வரும் நவம்பர் 6-ஆம் தேதி நடைபெறவுள்ள அடுத்தகட்ட விசாரணையின் போது தாக்கல் செய்ய வேண்டும் என்று அறிவுறுத்தப்பட்டுள்ளது. சென்னை சேர்ந்த எஸ். முரளிதரன் என்பவர் தாக்கல் செய்த மனுவின் அடிப்படையில் இந்த உத்தரவு பிறப்பிக்கப்பட்டுள்ளது.

முன்னதாக, செப்டம்பர் 18-ஆம் தேதி நடைபெற்ற விசாரணையின் போது, மாநில நெடுஞ்சாலைத் துறையினர் நீதிமன்றத்தில் அறிக்கை ஒன்றைத் தாக்கல் செய்திருந்தனர். அதில், ஆனைக்கட்டி மலைப்பாதையில் வனவிலங்குகள் நடமாட்டம் அதிகம் உள்ள ஐந்து இடங்களில் வாகனங்களின் வேகத்தைக் கட்டுப்படுத்த வேகத் தடைகள் அமைக்கப்பட்டுள்ளதாகத் தெரிவிக்கப்பட்டிருந்தது. மேலும், வனத்துறையின் ஆலோசனையைப் பெற்று, ஆனைக்கட்டி சாலையில் வனவிலங்குகள் எளிதாகக் கடந்து செல்வதற்காக நான்கு இடங்களில் இருந்த உலோகத்தாலான தடுப்புகள் அகற்றப்பட்ட தகவலையும் அதிகாரிகள் முன்வைத்தனர்.

வனவிலங்குகள் கடக்கும் பகுதிகள் என அடையாளம் காணப்பட்ட இடங்களில், வாகன ஓட்டிகளை எச்சரிக்கும் வகையில் தகவல் மற்றும் அறிவிப்புப் பலகைகள் நிறுவப்பட்டுள்ளதாக நெடுஞ்சாலைத் துறை தரப்பில் தெரிவிக்கப்பட்டது. சாலைப் பாதுகாப்பு நடவடிக்கைகளைப் பராமரிக்கும் பணிகள் தொடர்ந்து மேற்கொள்ளப்பட்டு வருவதாகவும், வனத்துறையினர் பரிந்துரைக்கும் மேலதிக பாதுகாப்பு நடவடிக்கைகள் எவை என்றாலும், அவற்றை உடனே பரிசீலித்து செயல்படுத்துவதற்கு நெடுஞ்சாலைத் துறை தயாராக இருப்பதாகவும் நீதிமன்றத்தில் உறுதியளிக்கப்பட்டது. நீதிமன்றத்தின் இந்த நடவடிக்கை வனவிலங்குகளின் பாதுகாப்பு மற்றும் சூழலியல் பாதுகாப்பில் முக்கிய மைல்கல்லாகக் கருதப்படுகிறது.