கோவை அன்னூரில் கொசு விரட்டி மருந்து தெளிப்பு: மூச்சுத்திணறலால் படுக்கையில் இருந்த முதியவர்கள் இருவர் உயிரிழப்பு

கோவை மாவட்டம் அன்னூர் பகுதியில் கொசு விரட்டி மருந்து தெளிக்கப்பட்டதால் மூச்சுத்திணறல் ஏற்பட்டு முதியவர்கள் இருவர் உயிரிழந்த சம்பவம் அதிர்ச்சியை ஏற்படுத்தியுள்ளது.

கோவை மாவட்டம் அன்னூர் பகுதியில் நடைபெற்ற துரதிர்ஷ்டவசமான சம்பவத்தில், கொசு விரட்டி மருந்து தெளிக்கப்பட்டதன் காரணமாக படுக்கையில் இருந்த முதியவர்கள் இருவர் பரிதாபமாக உயிரிழந்துள்ளனர். கடந்த செவ்வாய்க்கிழமை காலை 10 மணியளவில் அன்னூர் சக்தி சாலை பகுதியில் நகராட்சி நிர்வாகம் சார்பில் கொசுக்களைக் கட்டுப்படுத்துவதற்கான மருந்து தெளிக்கும் பணி மேற்கொள்ளப்பட்டது. இந்த மருந்து தெளிக்கப்பட்ட சிறிது நேரத்திலேயே அதே பகுதியில் வசித்து வந்த இரண்டு முதியவர்கள் உயிரிழந்த சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.

உயிரிழந்தவர்களில் ஒருவர் மோகன் (64) என்பவர் ஆவார். இவர் உடல்நலக் குறைவால் நீண்ட நாட்களாக படுக்கையில் இருந்து வந்துள்ளார். மதுப் பழக்கத்தினால் ஏற்பட்ட கல்லீரல் பாதிப்பு காரணமாக மருத்துவமனையில் அனுமதிக்கப்பட்டிருந்த அவர், குணமடைய வாய்ப்பில்லை என்று மருத்துவர்கள் தெரிவித்ததையடுத்து, வீட்டிற்கு அழைத்து வரப்பட்டு குடும்பத்தினரால் பராமரிக்கப்பட்டு வந்துள்ளார். மற்றொருவர் பிரேமா என்கிற ராணி (75) ஆவார். ஆஸ்துமா நோயால் பாதிக்கப்பட்டிருந்த இவர், உடல்நிலை மோசமான நிலையில் படுக்கையிலேயே சிகிச்சை பெற்று வந்துள்ளார்.

சம்பவம் நடந்த சமயம், அந்தப் பகுதியில் தெளிக்கப்பட்ட கொசு விரட்டி மருந்தின் அடர்த்தியான புகையும், அதன் கடுமையான வாசனையும் முதியவர்கள் இருவருக்கும் கடும் மூச்சுத்திணறலை ஏற்படுத்தியதாக அவர்களது உறவினர்கள் குற்றம் சாட்டியுள்ளனர். அந்த மருந்து தெளிக்கப்பட்ட குறுகிய கால இடைவெளியிலேயே இருவரது உயிரிழப்பும் நிகழ்ந்துள்ளதாகத் தெரிவிக்கப்படுகிறது. உடல்நிலை மிகவும் பலவீனமாக இருந்த முதியவர்களுக்கு, இந்த வேதிப்பொருள் கலந்த காற்றின் தாக்கம் சுவாசக் கோளாறுகளை தீவிரமாக்கியிருக்கலாம் என்று கூறப்படுகிறது.

இந்தச் சம்பவம் குறித்து உள்ளூர் காவல் துறையினர் தரப்பில் கூறுகையில், முதியவர்களின் மரணத்திற்குப் பிறகு உறவினர்கள் உடனடியாக இறுதிச் சடங்குகளை முடித்து, உடல்களை அடக்கம் செய்துவிட்டதாகத் தெரிவித்துள்ளனர். இதுவரை இந்த விபத்து தொடர்பாக காவல் துறையினருக்கு எந்தவிதமான முறையான புகாரும் அளிக்கப்படவில்லை. கொசு ஒழிப்பு மருந்து தெளிக்கும் பணியால் இத்தகைய உயிரிழப்புகள் நேரிட்டதாக உறவினர்கள் தெரிவித்துள்ள நிலையில், இது தொடர்பான கூடுதல் விசாரணை மற்றும் மருத்துவ பரிசோதனைகள் ஏதும் நடைபெறவில்லை என்பது குறிப்பிடத்தக்கது.