கோவையில் டேட்டிங் செயலி மூலம் ஹனி டிராப்: 99,000 ரூபாய் பறித்த நான்கு பேர் கைது

கோவை வடவள்ளியில் டேட்டிங் செயலி மூலம் ஆண்களை வரவழைத்து பணம் பறித்த நான்கு பேர் கைது செய்யப்பட்டனர்.

கோயம்புத்தூர் மாநகரப் பகுதியில் டேட்டிங் செயலியைப் பயன்படுத்தி ஆண்களைக் குறிவைத்து பணம் பறிக்கும் கொடூர செயலில் ஈடுபட்டு வந்த நான்கு பேர் கொண்ட கும்பலை காவல்துறையினர் கைது செய்துள்ளனர். கிரைண்ட்ர் (Grindr) எனும் டேட்டிங் செயலியில் போலி கணக்குகளை உருவாக்கி, அதன் மூலம் அப்பாவி நபர்களுடன் நட்பை ஏற்படுத்தி அவர்களைத் தங்கள் வசப்படுத்தும் இந்த கும்பல், பிறகு அவர்களை மிரட்டி பணம் பறிப்பதை வாடிக்கையாகக் கொண்டுள்ளது. சமீபத்தில் வடவள்ளியைச் சேர்ந்த 36 வயது நபர் ஒருவரை இந்த கும்பல் குறிவைத்து பணம் பறித்த சம்பவம் பெரும் அதிர்ச்சியை ஏற்படுத்தியுள்ளது.

பாதிக்கப்பட்ட நபர் கடந்த அக்டோபர் 1-ஆம் தேதி அன்று இந்த கும்பலைச் சேர்ந்த ஒருவருடன் கிரைண்ட்ர் செயலியில் அறிமுகமாகியுள்ளார். கவியரசன் என்பவன் தன்னை அறிமுகப்படுத்திக் கொண்டு, அந்த நபரை வடவள்ளி அருகிலுள்ள வி.என்.ஆர் நகரில் உள்ள ஒரு வீட்டிற்கு நேரில் சந்திப்பதற்காக அழைத்துள்ளான். பாதிக்கப்பட்ட நபர் இதை உண்மை என்று நம்பி அந்த வீட்டிற்குச் சென்றபோது, அங்கு கவியரசனுடன் சேர்த்து மேலும் மூன்று பேர் மறைந்திருந்ததைக் கண்டு அதிர்ச்சியடைந்துள்ளார். அந்த கும்பல் அவரை கடுமையாகத் தாக்கி, உயிரைப் பறிப்பதாகக் கூறி மிரட்டியுள்ளது.

அவர் வைத்திருந்த அலைபேசியைப் பறித்துக்கொண்ட கும்பல், வற்புறுத்தி அதைத் திறக்கச் செய்து, கூகுள் பே (G-Pay) மூலமாக 99,000 ரூபாயைத் தங்கள் கணக்கிற்கு மாற்றிக்கொண்டு அவரை அங்கிருந்து மிரட்டி வெளியேற்றியுள்ளனர். பாதிக்கப்பட்ட நபர் அளித்த புகாரின் அடிப்படையில், காவல்துறையினர் தீவிர விசாரணை மேற்கொண்டனர். விசாரணையில், கைது செய்யப்பட்டவர்கள் சிவகங்கை மாவட்டத்தைச் சேர்ந்த கவியரசன் (22), இராமநாதபுரம் மாவட்டத்தைச் சேர்ந்த முத்துகுமார் (23), சிவகங்கை மாவட்டத்தைச் சேர்ந்த முகேஷ்குமார் (20) மற்றும் வினோத்குமார் (32) என்பது கண்டறியப்பட்டது.

இந்த கும்பல் இதே பாணியில் ஏற்கனவே ஆறு பேரை ஏமாற்றி பணம் பறித்திருப்பதை காவல்துறையினரின் விசாரணையில் ஒப்புக்கொண்டுள்ளனர். டேட்டிங் செயலிகளில் அதிக நேரம் செலவிடும் நபர்களைக் கண்டறிந்து, அவர்களை ஆசை வார்த்தை கூறி வரவழைத்து, பின்னர் தாக்குதல் நடத்தி கொள்ளையடிப்பதை இவர்கள் தொழிலாகக் கொண்டுள்ளனர். கைது செய்யப்பட்ட நால்வர் மீதும் வழக்கு பதிவு செய்யப்பட்டு நீதிமன்றக் காவலில் சிறையில் அடைக்கப்பட்டுள்ளனர். பொதுமக்களும், குறிப்பாக இணையதள செயலிகளைப் பயன்படுத்துபவர்களும் அறிமுகமில்லாத நபர்களுடன் தனிப்பட்ட முறையில் சந்திப்புகளை மேற்கொள்வதைத் தவிர்க்க வேண்டும் என்று காவல்துறையினர் எச்சரிக்கை விடுத்துள்ளனர்.