கோவையில் அதிர்ச்சி: புலம்பெயர் தொழிலாளர்கள் குடியிருப்பு பகுதியில் 12 சமையல் எரிவாயு உருளைகள் வெடித்து விபத்து

கோவை நவா இந்தியா பகுதியில் புலம்பெயர் தொழிலாளர்கள் தங்கியிருந்த குடியிருப்பில் 12 சமையல் எரிவாயு உருளைகள் வெடித்து பெரும் தீ விபத்து ஏற்பட்டது.

கோயம்புத்தூர் மாநகரின் முக்கியப் பகுதியான நவா இந்தியா பகுதியில் சனிக்கிழமை பிற்பகல் நிகழ்ந்த பயங்கர தீ விபத்து அப்பகுதியில் பெரும் பரபரப்பை ஏற்படுத்தியது. புலம்பெயர் தொழிலாளர்கள் தங்கியிருந்த தற்காலிக குடியிருப்புகளில் அடுத்தடுத்து 12 சமையல் எரிவாயு உருளைகள் வெடித்ததால் இந்த விபத்து தீவிரமடைந்தது. கட்டுமானப் பணிகளில் ஈடுபட்டு வரும் தொழிலாளர்களுக்காக அமைக்கப்பட்டிருந்த அந்த தற்காலிக முகாமில், தேநீர் தயாரிப்பதற்காக தொழிலாளர் ஒருவர் எரிவாயு அடுப்பை பற்ற வைத்தபோது எதிர்பாராதவிதமாக இந்த விபத்து தொடங்கியதாக முதற்கட்ட விசாரணையில் தெரியவந்துள்ளது.

தீப்பிடித்த சில நிமிடங்களிலேயே அருகில் இருந்த இதர குடியிருப்புகளுக்கும் தீ மளமளவென பரவியது. இதனால் அங்கிருந்த மற்ற சமையல் எரிவாயு உருளைகளும் ஒன்றன்பின் ஒன்றாக வெடித்தன. இந்த சத்தத்தை கேட்டு அதிர்ச்சியடைந்த தொழிலாளர்கள் உடனடியாக அந்த இடத்திலிருந்து வெளியேறி உயிர் தப்பினர். விபத்து நடந்த நேரத்தில் அந்த பகுதியில் இருந்த தொழிலாளர்கள் அனைவரும் பாதுகாப்பாக வெளியேறியதால், பெரும் உயிர்ச்சேதம் தவிர்க்கப்பட்டது. இருப்பினும், இந்த தொடர் குண்டுவெடிப்பு போன்ற சத்தங்கள் மற்றும் கரும்புகை அப்பகுதி மக்களை அச்சத்தில் ஆழ்த்தியது.

தகவலறிந்து சம்பவ இடத்திற்கு விரைந்து வந்த தீயணைப்புத் துறையினர் சுமார் ஐந்திற்கும் மேற்பட்ட தீயணைப்பு வாகனங்களுடன் போராடி, இரண்டரை மணி நேர முயற்சிக்குப்பின் தீயை முழுமையாகக் கட்டுக்குள் கொண்டு வந்தனர். தீயணைப்பு வீரர்கள் மிகவும் சாமர்த்தியமாகச் செயல்பட்டு வெடிக்காத நிலையில் இருந்த சுமார் 14 சமையல் எரிவாயு உருளைகளை பத்திரமாக மீட்டனர். இது ஒரு பெரிய அளவிலான பேரிடரைத் தவிர்க்க உதவியது. முன்னெச்சரிக்கை நடவடிக்கையாக அப்பகுதியில் நான்கு அவசர சிகிச்சை ஊர்திகள் நிறுத்தப்பட்டு தொழிலாளர்கள் பாதுகாப்பான இடங்களுக்கு அப்புறப்படுத்தப்பட்டனர்.

இந்த விபத்தில் 127 தற்காலிகக் குடியிருப்புகளில் 67 குடிசைகள் முழுமையாகச் சேதமடைந்துள்ளதாக தீயணைப்புத் துறை அதிகாரிகள் தரப்பில் தெரிவிக்கப்பட்டுள்ளது. சம்பவம் குறித்து காவல்துறையினர் மற்றும் தீயணைப்புத் துறையினர் தொடர்ந்து விசாரணை மேற்கொண்டு வருகின்றனர். விபத்தில் அதிர்ஷ்டவசமாக எந்தவொரு காயமோ அல்லது உயிரிழப்போ ஏற்படவில்லை என்பது குறிப்பிடத்தக்கது. உரிய பாதுகாப்பு விதிமுறைகளை மீறி குடியிருப்புகள் அமைக்கப்பட்டிருந்ததா என்பது குறித்து அதிகாரிகள் தீவிரமாக ஆய்வு செய்து வருகின்றனர்.