கோவை பெரியார் அறிவுலகம் நூலகத்தில் மோசடி: 257 புத்தகங்கள் போலியானவை என ஆய்வாளர்கள் குற்றச்சாட்டு

கோவை பெரியார் அறிவுலகம் நூலகத்தில் சுமார் 257 போலி புத்தகங்கள் கண்டறியப்பட்ட விவகாரம் சர்ச்சையை ஏற்படுத்தியுள்ளது.
கோயம்புத்தூரில் அமைந்துள்ள பெரியார் அறிவுலகம் நூலகத்தில் புத்தக கொள்முதல் தொடர்பான முறைகேடு புகார்கள் மீண்டும் தீவிரமடைந்துள்ளன. இந்த நூலகத்தில் உள்ள புத்தகங்களின் நம்பகத்தன்மையை ஆய்வு செய்த ஆராய்ச்சியாளர்கள் மற்றும் புத்தக ஆர்வலர்கள், 'விண்டேஜ் பிரஸ் லிமிடெட்' (Vintage Press Ltd) எனும் பதிப்பகம் வெளியிட்ட 257 புத்தகங்கள் போலியானவை என அதிர்ச்சிகரமான தகவலை வெளியிட்டுள்ளனர். இது நூலக நிர்வாகம் மற்றும் புத்தகத் தேர்வில் உள்ள குளறுபடிகளை வெளிச்சம் போட்டுக் காட்டியுள்ளது.
ஆய்வுக்கு உட்படுத்தப்பட்ட புத்தகங்களில் சுமார் 60 சதவீதத்திற்கும் அதிகமான உள்ளடக்கங்கள் திருடப்பட்டவை (plagiarism) என்றும், 70 சதவீதத்திற்கும் மேலான தகவல்கள் செயற்கை நுண்ணறிவு (AI) மூலம் உருவாக்கப்பட்டவை என்றும் கண்டறியப்பட்டுள்ளது. குறிப்பாக, சுற்றுலாத்துறை தொடர்பான புத்தகங்களில் அதிகப்படியான போலித்தன்மைகள் இருப்பதை புத்தக ஆர்வலர் கே.சதீஷ் தலைமையிலான குழுவினர் தொழில்முறை மென்பொருட்களைப் பயன்படுத்தி உறுதி செய்துள்ளனர். சுமார் 16 பக்கங்களை மாதிரி ஆய்வுக்கு உட்படுத்தியதில், அதில் 64 சதவீத கருத்துத் திருட்டு மற்றும் 70 சதவீதத்திற்கு மேல் செயற்கை நுண்ணறிவு தயாரிப்பு இருப்பது கண்டறியப்பட்டுள்ளது.
இந்த புத்தகங்களின் தரம் குறித்த சந்தேகங்களைத் தாண்டி, பதிப்பகத்தின் நம்பகத்தன்மையும் கேள்விக்குறியாகியுள்ளது. லண்டனைத் தலைமையிடமாகக் கொண்டு செயல்படுவதாகக் கூறும் இந்த விண்டேஜ் பிரஸ் நிறுவனம், ஐக்கிய இராச்சியத்தின் அதிகாரப்பூர்வ அரசு தரவுத்தளத்தில் சரிபார்த்தபோது, அந்த முகவரியில் வேறு ஒரு நிறுவனம் இயங்குவது தெரியவந்துள்ளது. மேலும், புத்தகங்களில் அச்சிடப்பட்டுள்ள ஐஎஸ்பிஎன் (ISBN) எண்கள் மற்றும் இணையதள முகவரிகளின் உண்மைத்தன்மை மீதும் ஆராய்ச்சியாளர்கள் தீவிர சந்தேகம் எழுப்பியுள்ளனர்.
குறிப்பிடத்தக்க வகையில், இந்த 257 புத்தகங்களும் ஆங்கிலத்தில் எழுதப்பட்டவை மற்றும் 2025 முதல் 2026 ஜனவரி வரையிலான இடைவெளியில் வெளியிடப்பட்டவை ஆகும். ஒவ்வொரு புத்தகமும் 9,000 முதல் 10,000 ரூபாய் வரை மிக அதிக விலையில் விற்கப்பட்டுள்ளது. இவை அனைத்தும் முதல் பதிப்புகள் என்று குறிப்பிடப்பட்டுள்ளதும் முறைகேட்டின் தீவிரத்தை உணர்த்துகிறது. இது குறித்து விளக்கம் கோரி நூலக அதிகாரிகளைத் தொடர்பு கொண்டபோதும், தரப்பிலிருந்து எந்தவிதமான பதிலும் கிடைக்கவில்லை என்று கூறப்படுகிறது. இந்தத் தகவல்கள் வெளிவந்த பிறகும், சர்ச்சைக்குரிய அந்தப் புத்தகங்கள் இன்னும் நூலக அலமாரிகளிலிருந்து அகற்றப்படாமல் இருப்பது பொதுமக்களிடையே அதிருப்தியை ஏற்படுத்தியுள்ளது.









