கோவையில் ரயில் சேவைகளில் மாற்றம்: பராமரிப்புப் பணிகளால் ரயில் பயணிகள் கவனத்திற்கு

கோவை ரயில் நிலையத்தில் நடைபெறவுள்ள பராமரிப்புப் பணிகள் காரணமாக அக்டோபர் 13 முதல் 17 வரை ரயில் சேவைகளில் மாற்றம் செய்யப்பட்டுள்ளது.

கோவை ரயில் நிலையத்தின் யார்டு பகுதியில் தண்டவாளப் பராமரிப்புப் பணிகள் மேற்கொள்ளப்பட உள்ளதால், அவ்வழியாகச் செல்லும் ரயில் சேவைகளில் மாற்றம் செய்யப்படுவதாக தெற்கு ரயில்வே நிர்வாகம் அறிவித்துள்ளது. இந்த மாற்றங்கள் அக்டோபர் 13, 14, 15 மற்றும் 17 ஆகிய தேதிகளில் அமலில் இருக்கும். பராமரிப்புப் பணிகள் காரணமாக சில ரயில்கள் குறிப்பிட்ட ரயில் நிலையங்களிலேயே நிறுத்தப்பட உள்ளன, மேலும் சில ரயில்கள் வழக்கமான நிலையங்களுக்குப் பதிலாக மாற்று நிலையங்களில் இருந்து புறப்படும் எனத் தெரிவிக்கப்பட்டுள்ளது.

அக்டோபர் 13 மற்றும் 17 ஆகிய தேதிகளில் ஷொர்ணூர் - கோவை பயணிகள் ரயில் (56604) போத்தனூர் ரயில் நிலையம் வரை மட்டுமே இயக்கப்படும். அதே நாட்களில், மேட்டுப்பாளையம் - போத்தனூர் மெமு ரயில் (66615) கோவை சந்திப்பு ரயில் நிலையம் வரை மட்டுமே இயக்கப்படும். மேலும், அக்டோபர் 14 மற்றும் 15 ஆகிய தேதிகளில் மேட்டுப்பாளையம் - கோவை மெமு ரயில் (66613) கோவை வடக்கு ரயில் நிலையம் வரை மட்டுமே இயக்கப்படும் என்று ரயில்வே தரப்பில் விளக்கப்பட்டுள்ளது.

பயணிகளின் வசதிக்காக மாற்று ஏற்பாடுகளும் செய்யப்பட்டுள்ளன. அக்டோபர் 13 மற்றும் 17 தேதிகளில் கோவை - ஷொர்ணூர் பயணிகள் ரயில் (56603) கோவை சந்திப்பிற்குப் பதிலாக போத்தனூர் ரயில் நிலையத்திலிருந்து மாலை 4.38 மணிக்கு புறப்படும். அதே நாட்களில் போத்தனூர் - மேட்டுப்பாளையம் மெமு ரயில் (66616) மாலை 3.45 மணிக்கு கோவை சந்திப்பிலிருந்து புறப்படும். அக்டோபர் 14 மற்றும் 15 ஆகிய தேதிகளில் கோவை - மேட்டுப்பாளையம் மெமு ரயில் (66614) காலை 11.57 மணிக்கு கோவை வடக்கு ரயில் நிலையத்திலிருந்து புறப்படும்.

நீண்ட தூர விரைவு ரயில்களும் இந்த நாட்களில் இருகூர் மற்றும் போத்தனூர் வழியாக மாற்றுப் பாதையில் இயக்கப்பட உள்ளன. அக்டோபர் 13 அன்று பிலாஸ்பூர் - எர்ணாகுளம் வாராந்திர விரைவு ரயில் (22815) கோவை சந்திப்பு வழியாகச் செல்லாமல், போத்தனூர் நிலையத்தில் மாலை 3.42 மணிக்கு நின்று செல்லும். அக்டோபர் 14 அன்று செகந்திராபாத் - திருவனந்தபுரம் சபரி விரைவு ரயில் (20629), சென்னை எழும்பூர் - மங்களூரு சென்ட்ரல் விரைவு ரயில் (16159), தன்பாத் - போத்தனூர் அம்ரித் பாரத் விரைவு ரயில் (16620) மற்றும் திப்ருகார் - கன்னியாகுமரி விவேக் விரைவு ரயில் (22504) ஆகியவை மாற்றுப் பாதையில் இயக்கப்படும். குறிப்பாக சென்னை எழும்பூர் - மங்களூரு விரைவு ரயில், கோவை சந்திப்பு மட்டுமின்றி பீளமேடு மற்றும் கோவை வடக்கு நிலையங்களிலும் நிற்காது என்று தெரிவிக்கப்பட்டுள்ளது.