கோவை இளைஞர் படுகொலை: கொடூர செயலை செல்பி எடுத்து சமூக வலைதளத்தில் பதிவிட்ட இருவர் கைது

கோவை மாவட்டம் கிணத்துக்கடவு அருகே இளைஞரை கொன்று செல்பி எடுத்து சமூக வலைதளத்தில் பதிவிட்ட வழக்கில் இருவர் கைது செய்யப்பட்டுள்ளனர்.

கோவை மாவட்டம் கிணத்துக்கடவு அருகே இளைஞர் ஒருவரை கொடூரமாக கொலை செய்து, அந்த காட்சியை செல்பி எடுத்து சமூக வலைதளங்களில் பதிவிட்ட சம்பவத்தில் இருவரை காவல்துறையினர் கைது செய்துள்ளனர். இந்த வழக்கில் சம்பந்தப்பட்ட முக்கிய குற்றவாளியான எஸ்.மாதேஷ் (21) மற்றும் 17 வயதுடைய சிறுவன் ஆகிய இருவரும் காவல் துறையினரால் பிடிக்கப்பட்டுள்ளனர். அரசாம்பாளையம் பகுதியைச் சேர்ந்த இவர்கள், முன்விரோதம் காரணமாக இந்த கொலையை அரங்கேற்றியது விசாரணையில் தெரியவந்துள்ளது.

கொலை செய்யப்பட்டவர் சோளவம்பாளையம் பகுதியைச் சேர்ந்த தினக்கூலி தொழிலாளி எஸ்.அஸ்வின் (22) என்பது கண்டறியப்பட்டது. கடந்த வியாழக்கிழமை அதிகாலை சிகளாம்பாளையம் கிராமத்தில் உள்ள தனது நண்பரின் வீட்டில் அஸ்வின் உறங்கிக் கொண்டிருந்தபோது, மறைந்திருந்து வந்த இந்த நபர்கள் அவரை படுகொலை செய்துள்ளனர். கொலை செய்த பிறகு, தாங்கள் செய்த கொடூரத்தை அலைபேசியில் காணொலியாகவும் புகைப்படங்களாகவும் பதிவு செய்ததோடு, அதனுடன் செல்பி எடுத்து சமூக வலைதளங்களில் பகிர்ந்துள்ளனர். இந்த செயலை செய்த பின்னர், தாங்கள் பயன்படுத்திய அலைபேசிகளை வீசிவிட்டு தலைமறைவாகியதால் விசாரணை மேற்கொள்வதில் காவல்துறையினருக்கு சவால்கள் எழுந்தன.

வெள்ளிக்கிழமை மதியம் கொத்தவாடி பிரிவு அருகே உள்ள ரயில்வே மேம்பாலத்தில் சந்தேகத்திற்குரிய வகையில் இந்த இருவரையும் காவல்துறை தனிப்படை கண்டறிந்தது. காவல்துறையினரைக் கண்டதும் தப்பிக்க முயன்ற அவர்கள், மேம்பாலத்திலிருந்து கீழே குதித்தனர். இதில் மாதேஷின் வலது கையில் எலும்பு முறிவு ஏற்பட்டது. காயமடைந்த மாதேஷ் பொள்ளாச்சி அரசு மாவட்ட தலைமை மருத்துவமனைக்கு கொண்டு செல்லப்பட்டு சிகிச்சை பெற்று வருகிறார். மேலும், அவர்களுடன் இருந்த 17 வயது சிறுவன் கோவையில் உள்ள சிறுவர் சீர்திருத்தப் பள்ளியில் அடைக்கப்பட்டுள்ளார். இவர்கள் மீது பி.என்.எஸ் பிரிவு 103-ன் கீழ் வழக்கு பதிவு செய்யப்பட்டுள்ளது.

கொலைக்கான பின்னணி குறித்து காவல் அதிகாரிகள் நடத்திய முதற்கட்ட விசாரணையில் பல்வேறு அதிர்ச்சிகரமான தகவல்கள் வெளியாகி உள்ளன. கடந்த புதன்கிழமை மாலை வேலை முடிந்து திரும்பிய அஸ்வின், இந்த இருவரிடமும் தனக்கு மது வாங்கி வருமாறு கேட்டுள்ளார். அவர்கள் மறுத்ததால் ஏற்பட்ட வாக்குவாதத்தில் அஸ்வின் அவர்களை தாக்கியதாக கூறப்படுகிறது. மேலும், கடந்த காலங்களில் அஸ்வின் அந்த சிறுவனை பள்ளி படிப்பை பாதியில் விட்டதற்காக பொதுவெளியில் வைத்து திட்டியதும், அவ்வப்போது அவர்களை தாக்கியதும் அவர்களுக்குள் கடுமையான முன்விரோதத்தை வளர்த்துள்ளது. இந்த அவமானங்களுக்கு பழிவாங்கும் நோக்கிலேயே அவர்கள் அஸ்வினை கொலை செய்தது விசாரணையில் உறுதி செய்யப்பட்டுள்ளது.