காமன்வெல்த் கியூ ஸ்போர்ட்ஸ் சாம்பியன்ஷிப்: அகமதாபாத்தில் இந்திய அணி களமிறங்குகிறது

அகமதாபாத்தில் நடைபெறவுள்ள காமன்வெல்த் கியூ ஸ்போர்ட்ஸ் சாம்பியன்ஷிப் போட்டியில் இந்தியா சார்பில் 13 பேர் கொண்ட அணி பங்கேற்கிறது.

குஜராத் மாநிலம் அகமதாபாத்தில் உள்ள வீர் சாவர்க்கர் விளையாட்டு வளாகத்தில், இரண்டாவது காமன்வெல்த் கியூ ஸ்போர்ட்ஸ் சாம்பியன்ஷிப் போட்டிகள் வரும் அக்டோபர் 7 முதல் 10-ஆம் தேதி வரை நடைபெற உள்ளன. நான்கு நாட்கள் நடைபெறும் இந்த சர்வதேச விளையாட்டுத் தொடரில், சுமார் 46 நாடுகளைச் சேர்ந்த வீரர்கள் பங்கேற்க உள்ளனர். பில்லியர்ட்ஸ், ஸ்னூக்கர், ஹேபால், 10-பால் பூல் மற்றும் பிளாக்பால் ஆகிய ஐந்து பிரிவுகளில் ஆண்கள் மற்றும் பெண்கள் பிரிவில் போட்டிகள் நடைபெறவுள்ளன. இதில் இந்த ஆண்டு புதிதாக சேர்க்கப்பட்டுள்ள பில்லியர்ட்ஸ் போட்டியில் மட்டும், ஒவ்வொரு பிரிவிலும் தலா எட்டு வீரர்கள் பங்கேற்க உள்ளனர்.

இந்த சாம்பியன்ஷிப் தொடரானது உலக பில்லியர்ட்ஸ் விளையாட்டு கூட்டமைப்பு மற்றும் இந்திய பில்லியர்ட்ஸ் மற்றும் ஸ்னூக்கர் கூட்டமைப்பின் (BSFI) வழிகாட்டுதலின் கீழ் நடைபெறுகிறது. அப்பெக்ஸ் ஸ்போர்ட்ஸ் இந்த பிரம்மாண்ட நிகழ்வை ஒருங்கிணைக்கிறது. சர்வதேச விளையாட்டு வரைபடத்தில் அகமதாபாத் நகரம் முக்கிய இடம் பெற்று வருவதைச் சுட்டிக்காட்டிய உலக பூல் சங்கத்தின் தலைவர் இஷான் சிங், 2030 காமன்வெல்த் விளையாட்டுப் போட்டிகளுக்குத் தயாராகும் இந்த நகரத்திற்கு, இந்த சாம்பியன்ஷிப் போட்டி ஒரு சிறந்த தொடக்கமாக அமையும் என்று குறிப்பிட்டுள்ளார்.

இந்திய பில்லியர்ட்ஸ் மற்றும் ஸ்னூக்கர் கூட்டமைப்பின் நூற்றாண்டு விழாவின் ஒரு பகுதியாக, நடத்தப்படவுள்ள மூன்று முக்கிய நிகழ்வுகளில் இது இரண்டாவது பெரிய போட்டியாகும் என்று அதன் தலைவர் எஸ். பாலசுப்பிரமணியம் தெரிவித்துள்ளார். பெங்களூருவில் உள்ள கர்நாடக மாநில பில்லியர்ட்ஸ் சங்கத்தில் நடைபெற்ற தகுதிச் சுற்றுகளுக்குப் பிறகு, இந்த சாம்பியன்ஷிப்பிற்கான இந்திய அணி தேர்வு செய்யப்பட்டது. இதில் மொத்தம் 13 வீரர்கள் (6 ஆண்கள், 7 பெண்கள்) இந்தியாவைப் பிரதிநிதித்துவப்படுத்த உள்ளனர்.

ஆண்கள் பிரிவில் சித்தார்த் பரிக், ரயான் ரஸ்மி, சிவம் அரோரா, லட்சுமண் ராவத், திவ்யா சர்மா மற்றும் சுந்தீப் குலாட்டி ஆகியோர் இடம்பெற்றுள்ளனர். பெண்கள் பிரிவில் அனுபமா ராமச்சந்திரன், கீர்த்தனா பாண்டியன், வித்யா பிள்ளை, அமி காமானி, சித்ரா மகிமிராஜ், நீனா பிரவீன் மற்றும் நடாஷா சேத்தன் ஆகியோர் தங்களது திறமையை வெளிப்படுத்த உள்ளனர். இந்த இந்திய அணிக்கு அசோக் சாண்டில்யா பயிற்சியாளராக நியமிக்கப்பட்டுள்ளார்.