தாராபுரம் இடைத்தேர்தல்: பிரச்சாரத்தின் போது பொதுமக்கள் கடும் எதிர்ப்பு - வாக்குவாதத்தில் சிக்கிய தவெக வேட்பாளர்

தாராபுரத்தில் தேர்தல் பிரச்சாரத்தில் ஈடுபட்ட தமிழக வெற்றிக் கழக வேட்பாளர் சத்யபாமாவை பொதுமக்கள் முற்றுகையிட்டு கேள்வி எழுப்பிய சம்பவம் பரபரப்பை ஏற்படுத்தியுள்ளது.

தாராபுரம் தொகுதிக்கான இடைத்தேர்தல் களம் சூடுபிடித்துள்ள நிலையில், தமிழக வெற்றிக் கழகத்தின் சார்பில் போட்டியிடும் வேட்பாளர் பி. சத்யபாமா தீவிர வாக்கு சேகரிப்பில் ஈடுபட்டிருந்தார். குண்டடம் ஊராட்சி ஒன்றியத்திற்கு உட்பட்ட பல்வேறு பகுதிகளில் அவர் ஆதரவு திரட்டிய போது, அப்பகுதி மக்கள் திடீரென அவரை முற்றுகையிட்டனர். இதனால் அப்பகுதியில் பெரும் பரபரப்பு ஏற்பட்டது. கடுமையான காவல்துறை பாதுகாப்புக்கு மத்தியில் பிரச்சாரத்தில் ஈடுபட்டிருந்த வேட்பாளரிடம், பொதுமக்கள் ஆவேசமாக கேள்வி எழுப்பியது அரசியல் வட்டாரத்தில் கவனத்தை ஈர்த்துள்ளது.

முன்னதாக, கடந்த ஏப்ரல் மாதம் நடைபெற்ற சட்டப்பேரவைத் தேர்தலில் அதிமுக சார்பில் போட்டியிட்டு வெற்றி பெற்ற சத்யபாமா, தனது எம்.எல்.ஏ பதவியை ராஜினாமா செய்துவிட்டு தமிழக வெற்றிக் கழகத்தில் இணைந்திருந்தார். இதுவே தற்போதைய இடைத்தேர்தலுக்கு முக்கிய காரணமாக அமைந்தது. இதனை சுட்டிக்காட்டிய கிராம மக்கள், தாங்கள் உழைத்து உங்களை வெற்றி பெறச் செய்த நிலையில், எந்தவித கலந்தாலோசனையும் இன்றி பதவியை ராஜினாமா செய்தது ஏன் என்று சரமாரியாக கேள்வி எழுப்பினர். மேலும், ஆளும் கட்சியிடமிருந்து 50 கோடி ரூபாய் பெற்றுக்கொண்டு கட்சி மாறியதாக அவர் மீது பகிரங்கமாக குற்றச்சாட்டுகளை முன்வைத்தனர்.

பொதுமக்களின் இந்தக் கடுமையான குற்றச்சாட்டுகளை வேட்பாளர் சத்யபாமா மறுத்தார். அதிமுக தலைமையிலான அணி, திமுகவுடன் கூட்டணி வைக்க முயற்சி செய்ததாலேயே தான் அந்த முடிவை எடுத்ததாக அவர் விளக்கம் அளித்தார். இருப்பினும், மக்கள் விடாமல் அவரிடம் அதற்கான ஆதாரங்களைக் கேட்டு வாக்குவாதத்தில் ஈடுபட்டனர். இதனால் நிலைமை மோசமடைவதைக் கண்ட காவல்துறையினர் உடனடியாக தலையிட்டு கூட்டத்தைக் கட்டுப்படுத்தினர். வாக்குவாதத்திற்கு மத்தியிலும், தான் தவறு செய்யவில்லை என்றும், மக்களுக்கான அடிப்படை வசதிகளை செய்து தருவதே தனது நோக்கம் என்றும் அவர் உறுதியளித்தார்.

தான் யாருடைய பணத்தையும் பெறவில்லை என்று திட்டவட்டமாகத் தெரிவித்த சத்யபாமா, இத்தகைய குற்றச்சாட்டுகளைப் புறக்கணித்து தனது பிரச்சாரத்தைத் தொடர்ந்து மேற்கொண்டார். முன்னதாக, தேர்தல் மை இன்னும் காய்வதற்கு முன்பே கட்சி மாறியது தங்களை ஏமாற்றியது போன்ற உணர்வை ஏற்படுத்தியுள்ளதாக மக்கள் வேதனை தெரிவித்தனர். தற்போது நடைபெறவுள்ள இடைத்தேர்தலில் வெற்றி பெற வேண்டிய கட்டாயத்தில் உள்ள தவெக வேட்பாளருக்கு, இத்தகைய மக்கள் எதிர்ப்பு சவாலாக அமைந்துள்ளது.