தர்மபுரி வனப்பகுதியில் முதன்முறையாக பிரம்மாண்ட வனவிலங்கு கணக்கெடுப்பு: என்.டி.சி.ஏ உடன் இணைந்து வனத்துறை அதிரடி

தர்மபுரி வனப்பகுதியில் வனவிலங்குகள் கணக்கெடுப்பை மேற்கொள்ள 1,274 கேமராக்கள் பொருத்தப்பட உள்ளன.

தர்மபுரி மாவட்டத்தில் உள்ள அடர்ந்த வனப்பகுதிகளில் வனவிலங்குகளின் எண்ணிக்கை மற்றும் நடமாட்டத்தை கண்டறியும் வகையில் விரிவான வனவிலங்கு கணக்கெடுப்பு நடத்தப்பட உள்ளது. தேசிய புலிகள் பாதுகாப்பு ஆணையத்துடன் (NTCA) இணைந்து தர்மபுரி மாவட்ட வனத்துறை இந்த முக்கிய முன்னெடுப்பை மேற்கொண்டுள்ளது. இதற்காக மாவட்டத்தின் வனப்பகுதிகளில் மொத்தம் 1,274 தானியங்கி கேமராக்கள் பொருத்தப்படவுள்ளன. இதன் மூலம் காடுகளின் பல்லுயிர் பெருக்கம் மற்றும் வனவிலங்குகளின் வாழ்விடங்கள் குறித்த துல்லியமான தரவுகள் திரட்டப்படவுள்ளன.

இந்த கணக்கெடுப்பு குறித்து தர்மபுரி மாவட்ட வன அலுவலர் கே. ராஜங்கம் தெரிவிக்கையில், மாவட்டத்தின் மொத்த பரப்பளவில் மூன்றில் ஒரு பங்கு, அதாவது சுமார் 1.72 லட்சம் ஹெக்டேர் நிலம் காடுகளால் சூழப்பட்டுள்ளது. குறிப்பாக ஒகேனக்கல், பென்னாகரம் மற்றும் பாலக்கோடு வனப்பகுதிகள் ஏற்கனவே காவிரி தெற்கு வனவிலங்கு சரணாலயத்தின் ஒரு பகுதியாக உள்ளன. இப்பகுதிகளில் யானைகள், சிறுத்தைகள், கரடிகள் மற்றும் காட்டு நாய்கள் போன்ற பல்வேறு முக்கிய வனவிலங்குகள் வாழ்ந்து வருகின்றன. இருப்பினும், இப்பகுதியில் உள்ள வனவிலங்குகளின் துல்லியமான எண்ணிக்கை குறித்த தரவுகள் இதுவரை முறையாக இல்லை. இந்த குறைபாட்டை நீக்கி, வனப்பகுதியின் வளமையை கண்டறியவே இந்த கணக்கெடுப்பு மேற்கொள்ளப்படுகிறது.

திட்டமிடப்பட்டுள்ள இந்த கணக்கெடுப்பின்படி, ஒவ்வொரு இரண்டு கிலோமீட்டர் தொலைவிற்கும் ஒரு கேமரா வீதம் மொத்தம் 1,274 கேமராக்கள் காடு முழுவதும் பொருத்தப்படும். இந்த நவீன தொழில்நுட்பம் மூலம் வனவிலங்குகளின் ஒவ்வொரு அசைவும் கண்காணிக்கப்பட்டு, அவற்றின் வாழ்விடங்கள் மற்றும் நடமாட்டம் கண்டறியப்படும். தர்மபுரி மாவட்டத்தில் இத்தகைய விரிவான கணக்கெடுப்பு நடைபெறுவது இதுவே முதல்முறையாகும். வனத்துறையின் இந்த முயற்சி, வனவிலங்குகளின் பாதுகாப்பை உறுதிப்படுத்துவதுடன், மக்கள்-வனவிலங்கு மோதல்களைத் தடுப்பதற்கும் பெரிதும் உதவும் என எதிர்பார்க்கப்படுகிறது.

இந்த கணக்கெடுப்பின் மிக முக்கியமான நோக்கமாக இப்பகுதியில் புலிகளின் நடமாட்டம் உள்ளதா என்பதை கண்டறிவதை தேசிய புலிகள் பாதுகாப்பு ஆணையம் முன்னிலைப்படுத்தியுள்ளது. இதுவரை இப்பகுதியில் புலிகள் இருப்பது உறுதி செய்யப்படவில்லை என்றாலும், இந்த வனப்பகுதியானது காவிரி வடக்கு வனவிலங்கு சரணாலயம் மற்றும் சத்தியமங்கலம் புலிகள் காப்பகத்துடன் இணைப்பில் உள்ளது. அங்கு ஏற்கனவே புலிகளின் நடமாட்டம் பதிவாகியுள்ளதால், தர்மபுரியிலும் புலிகள் இருக்கலாம் என்ற கோணத்தில் இந்த ஆய்வு நடத்தப்படுகிறது. தற்போது இதற்கான தீவிர பயிற்சியில் வனத்துறை பணியாளர்கள் ஈடுபட்டு வருகின்றனர்.