திண்டுக்கல் மாநகராட்சி அதிரடி: வரி பாக்கி வைத்துள்ள முதல் 100 நிறுவனங்கள் மற்றும் நபர்களின் பட்டியல் வெளியீடு

திண்டுக்கல் மாநகராட்சியில் சொத்துவரி பாக்கி வைத்துள்ள முதல் 100 நபர்கள் மற்றும் நிறுவனங்களின் பட்டியலை மாநகராட்சி நிர்வாகம் இணையதளத்தில் வெளியிட்டுள்ளது.

திண்டுக்கல் மாநகராட்சி நிர்வாகம் தனது வருவாய் இழப்பை ஈடுகட்டவும், வரி வசூலை தீவிரப்படுத்தவும் அதிரடி நடவடிக்கைகளை மேற்கொண்டுள்ளது. கடந்த இரண்டு நிதி ஆண்டுகளான 2024-25 மற்றும் 2025-26 ஆகிய காலக்கட்டங்களில் சொத்துவரி செலுத்தாத முதல் 100 முக்கிய நபர்கள் மற்றும் நிறுவனங்களின் பட்டியலை மாநகராட்சி தனது அதிகாரப்பூர்வ இணையதளத்தில் பொதுவெளியில் வெளியிட்டுள்ளது. இந்த நபர்கள் மற்றும் நிறுவனங்கள் சுமார் 11.65 கோடி ரூபாய் அளவிற்கு வரி பாக்கி வைத்துள்ளதாக மாநகராட்சி தரப்பில் தெரிவிக்கப்பட்டுள்ளது.

இந்த மொத்த வரி பாக்கியான 11.65 கோடி ரூபாயில், 11.48 கோடி ரூபாய் சொத்துவரியாகவும், 13.71 லட்சம் ரூபாய் அபராதமாகவும், 3.18 லட்சம் ரூபாய் குப்பை வரியாகவும் பிரிக்கப்பட்டுள்ளது. இந்தப் பட்டியலில் தனியார் பள்ளிகள், கல்வி அறக்கட்டளைகள் மற்றும் முக்கிய தனியார் மருத்துவமனைகள் இடம் பெற்றுள்ளன. பலமுறை எச்சரிக்கை நோட்டீஸ்கள் அனுப்பப்பட்டும், உரிய காலக்கெடுவிற்குள் வரியைச் செலுத்த தவறியதால், பொதுமக்களின் கவனத்திற்கு கொண்டுவரும் வகையில் இப்படியொரு நடவடிக்கையை மாநகராட்சி எடுத்துள்ளது.

குறிப்பாக, திண்டுக்கல் மாநகராட்சி அதிகாரிகளின் தகவல்படி, தாடிக்கொம்பு சாலை மற்றும் நேரு நகர் பகுதியில் உள்ள தனியார் மருத்துவமனைகள் பெருமளவிலான வரி பாக்கியை வைத்துள்ளன. ஒரு மருத்துவமனை மட்டும் சுமார் 4.5 கோடி ரூபாய் வரை பாக்கி வைத்துள்ளது. சமூக சேவையில் ஈடுபடுவதாகக் கூறிக்கொள்ளும் இத்தகைய நிறுவனங்கள், மாநகராட்சிக்குச் சேர வேண்டிய கடமைகளைச் செய்யத் தவறுவது வருத்தமளிப்பதாக அதிகாரிகள் சுட்டிக்காட்டுகின்றனர். மேலும், வரி விலக்கு கோரும் இவர்களது கோரிக்கைகள் நிராகரிக்கப்பட்டுள்ளதாகவும், அடுத்த மூன்று மாதங்களுக்குள் பாக்கியைச் செலுத்தத் தவறினால் நீர் இணைப்பு மற்றும் பாதாள சாக்கடை இணைப்புகளைத் துண்டிப்பது உள்ளிட்ட சட்ட ரீதியான கடும் நடவடிக்கைகள் எடுக்கப்படும் என்றும் எச்சரிக்கப்பட்டுள்ளது.

நடப்பு நிதியாண்டில் 32 கோடி ரூபாய் சொத்துவரி வசூலிக்க இலக்கு நிர்ணயிக்கப்பட்டுள்ள நிலையில், ஜூன் மாதம் முதல் மாநகராட்சி நிர்வாகம் வரி வசூலில் தீவிர கவனம் செலுத்தி வருகிறது. இதுவரை சொத்துவரி வாயிலாக 28 கோடி ரூபாயும், மத்திய அரசிடமிருந்து 11 கோடி ரூபாய் ஊக்கத்தொகையாகவும் பெறப்பட்டுள்ளது. ஒட்டுமொத்தமாக மாநகராட்சிக்குச் சேர வேண்டிய 55 கோடி ரூபாய் வரி பாக்கியில், இதுவரை 13.75 கோடி ரூபாய் மட்டுமே வசூலிக்கப்பட்டுள்ளது. வரி ஏய்ப்பு செய்பவர்கள் மீதான இத்தகைய கடுமையான நடவடிக்கைகள் மாநகராட்சியின் நிதிச் சுமையைக் குறைக்க உதவும் என எதிர்பார்க்கப்படுகிறது.