மனைவியின் துன்புறுத்தலால் பாதிக்கப்பட்ட மாற்றுத்திறனாளி கணவருக்கு விவாகரத்து: சென்னை உயர்நீதிமன்றம் அதிரடி உத்தரவு

கேள்வி மற்றும் பேச்சுத்திறன் குறைபாடுள்ள கணவரை துன்புறுத்திய மனைவிக்கு விவாகரத்து வழங்கி சென்னை உயர்நீதிமன்றம் உத்தரவிட்டுள்ளது.

கேள்வி மற்றும் பேச்சுத்திறன் குறைபாடுள்ள கணவர் ஒருவரை அவரது மனைவி கடுமையாகத் துன்புறுத்திய நிலையில், அவர்களுக்கு விவாகரத்து வழங்கி சென்னை உயர்நீதிமன்றம் முக்கிய தீர்ப்பினை வழங்கியுள்ளது. புதுச்சேரி மாநிலம் காரைக்காலைச் சேர்ந்த கணவர் ஒருவர், தனது மனைவியிடமிருந்து விவாகரத்து கோரி தாக்கல் செய்த மனுவை காரைக்கால் குடும்ப நல நீதிமன்றம் கடந்த 2020-ஆம் ஆண்டு தள்ளுபடி செய்திருந்தது. இதனை எதிர்த்து அவர் சென்னை உயர்நீதிமன்றத்தில் மேல்முறையீடு செய்திருந்தார்.

இந்த வழக்கு நீதிபதிகள் எம்.தண்டபாணி மற்றும் ஏ.டி.மரியா கிளீட் ஆகியோர் அடங்கிய அமர்வு முன்னிலையில் விசாரணைக்கு வந்தது. மனுதாரரான கணவர், தனது மனைவி தன்னை குளியலறையில் பூட்டி வைத்தது உள்ளிட்ட பல்வேறு கொடுமைகளைச் செய்ததாக நீதிமன்றத்தில் குற்றம் சாட்டியிருந்தார். மேலும், குடும்ப உறவைத் தொடர அவர் விருப்பம் தெரிவித்த போதிலும், மனைவி அதற்கு ஒத்துழைக்க மறுத்ததோடு, குடும்ப அமைதியைச் சீர்குலைக்கும் வகையில் செயல்பட்டதாகக் கூறப்பட்டுள்ளது.

நீதிமன்ற விசாரணையின் போது, மனைவி தரப்பில் தாக்கல் செய்யப்பட்ட குறுக்கு விசாரணையின் போது, தனக்கு கணவருடன் சேர்ந்து வாழ விருப்பமில்லை என்பதை அவர் வெளிப்படையாக ஒப்புக்கொண்டார். இருப்பினும், மனைவி தரப்பு வழக்கறிஞர் இது கணவருடன் வாழ விருப்பமில்லை என்று அர்த்தமல்ல என்று வாதிட்டனர். ஆனால், இதை ஏற்க மறுத்த நீதிபதிகள், மனைவியே தான் சேர்ந்து வாழ விரும்பவில்லை என்று நீதிமன்றத்தில் வாக்குமூலம் அளித்துள்ள நிலையில், அவர்களைக் கட்டாயப்படுத்திச் சேர்த்து வைப்பது எவ்விதத்திலும் நியாயமற்றது என்று சுட்டிக்காட்டினர்.

கணவரை குளியலறையில் பூட்டி வைத்தது போன்ற கொடூரமான செயல்களில் ஈடுபட்ட மனைவியுடன் வாழக் கட்டாயப்படுத்துவது சட்டத்திற்குப் புறம்பானது என்றும், குடும்ப நல நீதிமன்றத்தின் முந்தைய தீர்ப்பு தவறானது என்றும் நீதிபதிகள் கருத்து தெரிவித்தனர். இதனால், கீழ் நீதிமன்றத்தின் உத்தரவை ரத்து செய்த உயர்நீதிமன்ற அமர்வு, அந்தத் தம்பதியினருக்கு விவாகரத்து வழங்கி உத்தரவிட்டது. மாற்றுத்திறனாளி கணவரின் கண்ணியமான வாழ்க்கையைப் பாதுகாக்கும் வகையில் அமைந்த இந்தத் தீர்ப்பு சட்ட வட்டாரங்களில் முக்கியத்துவம் பெற்றுள்ளது.