தொகுதி மறுசீரமைப்பு விவகாரம்: தமிழக அரசின் அனைத்துக் கட்சி கூட்டத்தை புறக்கணித்த திமுக - அதிமுக

தொகுதி மறுசீரமைப்பு தொடர்பான தமிழக அரசின் அனைத்துக் கட்சி கூட்டத்தை திமுக மற்றும் அதிமுக உள்ளிட்ட கட்சிகள் புறக்கணித்ததால் பரபரப்பு ஏற்பட்டுள்ளது.

சென்னை கலைவாணர் அரங்கத்தில் முதலமைச்சர் சி. ஜோசப் விஜய் தலைமையில் நடைபெற்ற தொகுதி மறுசீரமைப்பு தொடர்பான அனைத்துக் கட்சி நாடாளுமன்ற உறுப்பினர்கள் கூட்டத்தில், திமுக, அதிமுக உள்ளிட்ட பல்வேறு அரசியல் கட்சிகள் பங்கேற்காமல் புறக்கணித்தன. இந்த கூட்டத்தில் மொத்தம் 37 நாடாளுமன்ற உறுப்பினர்கள் கலந்து கொள்ளவில்லை. குறிப்பாக, திமுகவின் 30 உறுப்பினர்கள், அதிமுகவின் 4 உறுப்பினர்கள் மற்றும் மதிமுக, பாமக, மக்கள் நீதி மய்யம் ஆகிய கட்சிகளின் தலா ஒரு உறுப்பினர் என முக்கிய எதிர்க்கட்சிகள் இந்த நிகழ்வை புறக்கணித்தது அரசியல் வட்டாரத்தில் பெரும் விவாதத்தை ஏற்படுத்தியுள்ளது.

கூட்டத்தில் பங்கேற்காதது குறித்து கருத்து தெரிவித்த திமுக நாடாளுமன்ற குழு தலைவர் கனிமொழி கருணாநிதி, தொகுதி மறுசீரமைப்பு என்பது மக்கள்தொகையை மட்டுமே அடிப்படையாகக் கொண்டு இருக்கக்கூடாது என்பதில் திமுக உறுதியாக இருப்பதாகத் தெரிவித்தார். இது போன்ற நடைமுறைகள் தமிழ்நாட்டின் பிரதிநிதித்துவத்தைப் பாதிக்கும் என்று அவர் எச்சரித்தார். முன்னதாக, அப்போதைய முதலமைச்சர் மு.க. ஸ்டாலின் தலைமையில் அனைத்து மாநிலங்களின் பிரதிநிதிகள் பங்கேற்ற கூட்டத்தில் இது குறித்து ஒருமனதாகத் தீர்மானம் நிறைவேற்றப்பட்டதை அவர் சுட்டிக்காட்டினார். தற்போது மீண்டும் ஒரு கூட்டம் நடத்த வேண்டிய அவசியம் என்ன என்று கேள்வி எழுப்பிய அவர், மாநில அரசின் அழைப்பு நடைமுறை விதிகளுக்கு உட்பட்டு அனுப்பப்படவில்லை என்றும் குற்றம் சாட்டினார்.

அதிமுக தரப்பில் இருந்து கருத்து தெரிவித்த நாடாளுமன்ற உறுப்பினர் ஒருவர், முந்தைய ஆட்சிக் காலத்திலேயே தொகுதி மறுசீரமைப்பு குறித்த தங்கள் நிலைப்பாட்டைத் தெளிவாகத் தெரிவித்துவிட்டதாகவும், அதில் எந்த மாற்றமும் இல்லை என்றும் கூறினார். தமிழ்நாட்டின் நாடாளுமன்றப் பிரதிநிதித்துவ விகிதமான 7.2 சதவீதத்தில் எந்தவிதக் குறைவும் ஏற்படக்கூடாது என்பதில் தங்களது கட்சி உறுதியாக இருப்பதாக அவர் வலியுறுத்தினார். மத்திய அரசு இது குறித்து எந்தவித அதிகாரப்பூர்வ வரைவு மசோதாவையும் வெளியிடாத சூழலில், இத்தகைய கூட்டங்களை நடத்துவது பொதுமக்களின் கவனத்தைத் திசைதிருப்பும் முயற்சியே தவிர வேறில்லை என எதிர்க்கட்சிகள் குற்றம் சாட்டுகின்றன.

எதிர்க்கட்சிகளின் இந்த புறக்கணிப்பிற்குப் பதிலளித்த கல்வித்துறை அமைச்சர் ராஜமோகன், தொகுதி மறுசீரமைப்பு என்பது மாநிலத்தின் மிக முக்கியமான பிரச்சனை என்றும், இதில் பங்கேற்காதது சுயநல அரசியலின் வெளிப்பாடு என்றும் விமர்சித்தார். எதிர்க்கட்சிகள் தங்களின் புதிய அரசியல் கூட்டணிகளின் நலனுக்காக மாநிலத்தின் உரிமைகளைப் புறக்கணிப்பதாக அவர் குற்றம் சாட்டினார். மேலும், சுகாதாரத்துறை அமைச்சர் கே.ஜி. அருண்ராஜ், காவேரி விவகாரம் மற்றும் தொகுதி மறுசீரமைப்பு ஆகிய இரண்டுமே தமிழ்நாட்டின் இரு கண்கள் போன்றவை என்றும், இதில் திமுக மற்றும் அதிமுக போதிய அக்கறை காட்டவில்லை என்றும் காட்டமாகத் தெரிவித்தார்.