மத்திய அரசுக்கு திமுக அடிபணிந்து செயல்படுகிறது: அமைச்சர் சி.டி.ஆர். நிர்மல் குமார் காட்டமான விமர்சனம்

திமுக தனது சுயநலத்திற்காக மத்திய அரசுக்கு அடிபணிந்து செயல்படுவதாக அமைச்சர் சி.டி.ஆர். நிர்மல் குமார் குற்றம் சாட்டியுள்ளார்.

மத்தியில் கொண்டுவரப்பட உள்ள தொகுதி மறுவரையறை மசோதாவை எதிர்த்து ஏன் திமுக இதுவரை உறுதியான நிலைப்பாட்டை எடுக்கவில்லை என்று எரிசக்தி மற்றும் சட்டத்துறை அமைச்சர் சி.டி.ஆர். நிர்மல் குமார் கேள்வி எழுப்பியுள்ளார். சென்னையில் செய்தியாளர்களிடம் பேசிய அவர், தமிழ்நாட்டின் நலன்களைப் புறக்கணித்துவிட்டு, பல்வேறு வழக்குகளில் இருந்து தங்களைக் காத்துக்கொள்ள திமுக மத்திய அரசுடன் கைகோர்த்திருப்பதாகக் குற்றம் சாட்டினார். இது தொடர்பாக அவர் குறிப்பிடுகையில், கடந்த ஏப்ரல் மாதத்திற்கும் தற்போதைய சூழலுக்கும் இடையே என்ன மாற்றம் நிகழ்ந்தது என்பதை திமுக விளக்க வேண்டும் என்றும், மசோதா கொண்டுவரப்பட்டால் அதற்கு எதிராக வாக்களிப்போம் என்று ஏன் இதுவரை திமுக உறுதியாகத் தெரிவிக்கவில்லை என்றும் வினா எழுப்பினார்.

திமுகவிற்கும் பாஜகவிற்கும் இடையே நேரடி அரசியல் கூட்டணி உருவாகிவிட்டதாக அமைச்சர் நிர்மல் குமார் சுட்டிக்காட்டினார். குறிப்பாக திமுக எம்.எல்.ஏ அனிதா ராதாகிருஷ்ணன் மற்றும் முன்னாள் எம்.பி கனிமொழி என்.வி.என். சோமு ஆகியோரின் சமீபத்திய கருத்துகளை மேற்கோள் காட்டிய அவர், அரசியலில் நிரந்தர நண்பர்களும் இல்லை எதிரிகளும் இல்லை என்ற அடிப்படையில் இரு கட்சிகளும் ஏற்கனவே பேச்சுவார்த்தைகளை முடித்துவிட்டதாகக் குறிப்பிட்டார். 2001 ஆம் ஆண்டின் அரசியல் சூழலுக்கு திமுக தற்போது மீண்டும் தள்ளப்பட்டுள்ளதாகவும், தனது குடும்பத்தினரையும் சொத்துகளையும் காத்துக்கொள்ளும் நோக்கில் இத்தகைய கூட்டணியை நோக்கி திமுக நகர்வதாகவும் அவர் விமர்சித்தார்.

முன்னாள் திமுக அமைச்சர்கள் மீது பதியப்பட்டுள்ள வழக்குகள் குறித்து விளக்கம் அளித்த அமைச்சர் நிர்மல் குமார், அவை அனைத்தும் ஆதாரங்களின் அடிப்படையிலேயே தொடரப்பட்டுள்ளதாகத் தெரிவித்தார். டெண்டர் முறைகேடுகள் மற்றும் அரசுக்கு இழப்பு ஏற்படுத்தியதற்கான ஆவணங்கள் தன்னிடம் இருப்பதைச் சுட்டிக்காட்டிய அவர், சட்டத்தின் முன் அனைவரும் சமம் என்பதை வலியுறுத்தினார். முன்னாள் அமைச்சர் டி.ஆர்.பி. ராஜா முன்வைத்த விமர்சனங்களுக்குப் பதிலளித்த அவர், புதிய அரசு அமைந்த பிறகு முதலீடுகள் குவிந்ததற்குக் காரணம், நிர்வாகத்தில் வெளிப்படைத்தன்மையும், திட்டங்களுக்குத் தடையில்லாத அனுமதியும் வழங்கப்படுவதுதான் என்று விளக்கினார்.

முந்தைய ஆட்சிக்காலத்தில் முதலீட்டாளர்கள் பல்வேறு மறைமுக நெருக்கடிகளுக்கும், கட்சி நிதிக்காகவும், பங்குதாரர்களாக மாற வலியுறுத்தப்பட்டதாலும் தமிழகத்தில் முதலீடு செய்யத் தயங்கியதாக அவர் குற்றம் சாட்டினார். தற்போது அந்தத் தடைகள் நீக்கப்பட்டுள்ளதால் சூரியசக்தி உள்ளிட்ட பல்வேறு துறைகளில் பெரும் நிறுவனங்கள் தமிழகத்தில் முதலீடு செய்ய முன்வந்துள்ளதாக அவர் கூறினார். இதனிடையே, திமுக பாஜகவுடன் கூட்டணி வைக்கவில்லை என்று இந்திய கம்யூனிஸ்ட் கட்சியின் எம்.பி கே. சுப்பராயன் தெரிவித்துள்ள கருத்துக்குப் பதிலளித்த அமைச்சர், கனிமொழி தேநீர் விருந்தில் பங்கேற்றது வெறும் சடங்கு அல்ல, அது அரசியல் மாற்றத்தின் அறிகுறி என்றும் தெரிவித்தார்.