திருவண்ணாமலை அருகே பகீர் சம்பவம்: நிலுவை ஊதிய விவகாரத்தில் முதலாளியை வெட்டிக் கொன்ற ஓட்டுநர் கைது

திருவண்ணாமலையில் நிலுவை ஊதியம் வழங்கப்படாததால் ஓட்டுநர் தனது முதலாளியை வெட்டிக் கொலை செய்த சம்பவம் அதிர்ச்சியை ஏற்படுத்தியுள்ளது.
திருவண்ணாமலை மாவட்டம் ஆரணி பகுதியில் நிலுவை ஊதியம் தொடர்பாக ஓட்டுநர் தனது முதலாளியை வெட்டிக் கொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது. உயிரிழந்த நபர் அவியந்தாங்கல் கிராமத்தைச் சேர்ந்த கே. குணசேகரன் (எ) கட்டை குணசேகரன் (42) என்று அடையாளம் காணப்பட்டுள்ளார். இவர் மீது ஏற்கனவே செம்மரம் கடத்தல் உள்ளிட்ட பல்வேறு வழக்குகள் வனத்துறையினரால் பதிவு செய்யப்பட்டுள்ளன என்பது குறிப்பிடத்தக்கது.
பேரணமல்லூர் காவல்துறையினரின் முதற்கட்ட விசாரணையில், குணசேகரனின் ஓட்டுநராகப் பணியாற்றி வந்த வினோத் (33) என்பவர் இந்த கொடூர செயலில் ஈடுபட்டது தெரியவந்துள்ளது. சம்பவத்தன்று அதிகாலை, வினோத் தனது கூட்டாளிகளுடன் சேர்ந்து அப்பகுதியின் மின் இணைப்பைத் துண்டித்துள்ளார். பின்னர், வீட்டின் வெளியே தூங்கிக் கொண்டிருந்த குணசேகரனை மறைத்து வைத்திருந்த கூர்மையான ஆயுதங்களால் சரமாரியாகத் தாக்கியுள்ளனர். இதில் அவர் சம்பவ இடத்திலேயே உயிரிழந்தார்.
தகவலறிந்து விரைந்து வந்த ஆரணி காவல் துணை கண்காணிப்பாளர் சுரேஷ் சண்முகம் மற்றும் பேரணமல்லூர் காவல்துறையினர், உடலைக் கைப்பற்றி பிரேதப் பரிசோதனைக்காக திருவண்ணாமலை அரசு மருத்துவக் கல்லூரி மருத்துவமனைக்கு அனுப்பி வைத்தனர். கொலை செய்த சிறிது நேரத்தில், வினோத் கையில் காயங்களுடன் ஆரணி தாலுகா காவல் நிலையத்தில் சரணடைந்தார். அவருக்கு அரசு மருத்துவமனையில் முதலுதவி சிகிச்சை அளிக்கப்பட்டதைத் தொடர்ந்து, காவல்துறையினர் அவரை கைது செய்தனர்.
வினோத் கடந்த ஐந்து ஆண்டுகளாக குணசேகரனிடம் ஓட்டுநராகப் பணியாற்றி வந்துள்ளார். இவருக்கு வழங்க வேண்டிய ஊதியத்தை குணசேகரன் சரியாக வழங்கவில்லை என்றும், இது குறித்து பலமுறை கேட்டும் அவர் அலட்சியப்படுத்தியதே கொலைக்கு முக்கியக் காரணமாக அமைந்ததாகக் கூறப்படுகிறது. இந்த சம்பவம் தொடர்பாக வழக்குப்பதிவு செய்துள்ள போலீசார், வினோத்தை வேலூர் மத்திய சிறையில் அடைத்துள்ளனர். தொடர்ந்து விசாரணை நடைபெற்று வருகிறது.









