தமிழகம் உள்ளிட்ட 19 மாநிலங்களில் போதை மாத்திரை விநியோகம்: ஹரியானாவில் இருவர் அதிரடி கைது

மதுரையை மையமாகக் கொண்டு இயங்கிய மாநிலங்களுக்கு இடையேயான போதை மாத்திரை கடத்தல் கும்பலைச் சேர்ந்த இரு முக்கிய தலைவர்களை ஹரியானாவில் தமிழக காவல்துறையினர் கைது செய்தனர்.

தமிழகத்தில் தடை செய்யப்பட்ட வலி நிவாரணி மாத்திரைகளை கடத்தி விற்பனை செய்து வந்த மாநிலங்களுக்கு இடையேயான மிகப்பெரிய கும்பலை தமிழக காவல்துறையினர் முறியடித்துள்ளனர். இது தொடர்பாக ஹரியானா மாநிலத்தைச் சேர்ந்த கே. மகேந்தர் சிங் பிஷ்ட் மற்றும் ஜம்மு காஷ்மீரைச் சேர்ந்த ஆர். சுனில் குமார் ஆகிய இரு முக்கிய குற்றவாளிகளை காவல்துறையினர் கைது செய்துள்ளனர். தெற்கு மண்டல காவல் துறைத் தலைவர் விஜயேந்திர பிதாரி வெளியிட்டுள்ள செய்திக்குறிப்பில், இந்த கும்பல் போலி முகவரிகள் மற்றும் அடையாளங்களைப் பயன்படுத்தி இந்திய அஞ்சல் துறை மற்றும் தனியார் கூரியர் சேவைகள் மூலம் போதை மாத்திரைகளைத் தமிழகம் உட்பட நாட்டின் 19 மாநிலங்கள் மற்றும் யூனியன் பிரதேசங்களுக்கு அனுப்பி வைத்தது கண்டறியப்பட்டுள்ளது.

கடந்த ஜூலை மாதம் கிடைத்த ரகசியத் தகவலின் அடிப்படையில் தொடங்கப்பட்ட இந்த நடவடிக்கையில், மதுரையைத் தலைமையிடமாகக் கொண்டு காவல் துறையினர் தீவிர விசாரணையில் ஈடுபட்டனர். குறிப்பாக, கடந்த ஆகஸ்ட் 18 அன்று தேனி மாவட்டம் கண்டமனூர் பகுதியில் சந்தேகத்திற்கிடமான அஞ்சல் பார்சல் சிக்கியது. அதனைத் தொடர்ந்து திண்டுக்கல் மற்றும் மதுரை பகுதிகளில் நடத்தப்பட்ட சோதனைகளில், கைப்பற்றப்பட்ட பார்சல்கள் அனைத்தும் ஹரியானா மாநிலம் அம்பாலாவிலிருந்து அனுப்பப்பட்டது தெரியவந்தது. இதன்பின்னர், இந்திய அஞ்சல் துறை மற்றும் தனியார் கூரியர் நிறுவனங்களுக்கு விழிப்புணர்வு ஏற்படுத்தப்பட்டு, சந்தேகத்திற்கிடமான பார்சல்கள் தொடர்ந்து கண்காணிக்கப்பட்டன.

இந்த விசாரணையின் அடுத்தகட்டமாக, அம்பாலாவில் பதுங்கியிருந்த முக்கிய குற்றவாளிகளான மகேந்தர் சிங் மற்றும் சுனில் குமார் ஆகிய இருவரையும் தமிழக தனிப்படை காவல்துறையினர் நவம்பர் 2 அன்று அதிரடியாகக் கைது செய்தனர். இது தொடர்பாக இதுவரை மதுரை, திண்டுக்கல் மற்றும் தேனி மாவட்டங்களில் ஏழு வழக்குகள் பதிவு செய்யப்பட்டு, சுமார் 18 சந்தேக நபர்கள் கைது செய்யப்பட்டுள்ளனர். மேலும், அவர்களிடம் இருந்து சுமார் 4,400 போதை மாத்திரைகள் பறிமுதல் செய்யப்பட்டுள்ளன. அம்பாலாவில் உள்ள வாடிக்கையாளர் கணக்குகளை ஆய்வு செய்ததில், கடந்த ஓராண்டில் மட்டும் 588 பார்சல்கள் இதுபோன்று நாடு முழுவதும் அனுப்பப்பட்டிருப்பது அம்பலமாகியுள்ளது.

தற்போது இந்த மோசடி கும்பலின் நிதி பரிவர்த்தனைகள், வங்கிக் கணக்குகள் மற்றும் அவர்கள் பயன்படுத்திய தொடர்பு சாதனங்கள் குறித்து விரிவான விசாரணை மேற்கொள்ளப்பட்டு வருகிறது. இந்த சட்டவிரோத செயலில் தொடர்புடைய மற்ற நபர்களைக் கண்டறியும் பணியும் தீவிரமடைந்துள்ளது. இது தொடர்பான தகவல்களை பிற மாநில காவல்துறை அதிகாரிகளுடன் பகிர்ந்து கொண்டு, மேல் நடவடிக்கை எடுக்கப்பட்டு வருவதாகவும் காவல் துறைத் தலைவர் விஜயேந்திர பிதாரி தெரிவித்துள்ளார். தமிழகத்தில் போதைப்பொருள் புழக்கத்தைக் கட்டுப்படுத்த காவல் துறை மேற்கொண்டு வரும் இந்த தீவிர நடவடிக்கை பொதுமக்கள் மத்தியில் வரவேற்பைப் பெற்றுள்ளது.