தமிழகத்தில் போதைப்பொருள் கடத்தல் விவகாரம்: அமலாக்கத்துறை அதிரடி சோதனை

போதைப்பொருள் கடத்தல் மற்றும் பணமோசடி வழக்குகளில் அமலாக்கத்துறை தமிழகத்தில் 16 இடங்களில் அதிரடி சோதனை மேற்கொண்டது.

அமலாக்கத்துறை (ED) போதைப்பொருள் கடத்தல் தொடர்பான பணமோசடி வழக்குகளில் தமிழகம் உள்ளிட்ட தென்னிந்திய மாநிலங்களில் அதிரடி சோதனைகளை மேற்கொண்டது. நஷா முக்த் பாரத் திட்டத்தின் ஒரு பகுதியாக நடத்தப்பட்ட இந்த சோதனைகள், தமிழகத்தின் முக்கிய நகரங்களில் மேற்கொள்ளப்பட்டன. குறிப்பாக, சென்னை, இராமநாதபுரம், திருநெல்வேலி, நாகப்பட்டினம் மற்றும் வேளாங்கண்ணி ஆகிய பகுதிகளில் உள்ள மொத்தம் 16 இடங்களில் இந்த சோதனைகள் தீவிரமாக நடைபெற்றுள்ளன.

இந்த நடவடிக்கையானது மொத்தம் நான்கு வெவ்வேறு போதைப்பொருள் கடத்தல் வழக்குகளை மையமாகக் கொண்டு மேற்கொள்ளப்பட்டது. கடந்த காலங்களில் கைப்பற்றப்பட்ட மெத்தாம்பேட்டமைன் எனப்படும் போதைப்பொருள் விவகாரங்களில் தொடர்புடைய நபர்கள் மற்றும் ஹவாலா பணப் பரிமாற்றங்கள் குறித்து அமலாக்கத்துறை அதிகாரிகள் தீவிர விசாரணை மேற்கொண்டு வருகின்றனர். சென்னை மண்ணடி பகுதியில் உள்ள ஒரு இடத்தில் மட்டும் 1.29 கோடி ரூபாய் பணம் மற்றும் 30,000 அமெரிக்க டாலர்கள் கைப்பற்றப்பட்டிருப்பது விசாரணையில் முக்கியத் திருப்பமாகப் பார்க்கப்படுகிறது.

விசாரணையில் உள்ள ஒரு முக்கிய வழக்கில், கடந்த 2024 ஆம் ஆண்டு இரு இலங்கை நாட்டவர்களிடமிருந்து 1.47 கிலோ மெத்தாம்பேட்டமைன் கைப்பற்றப்பட்டது. அதனைத் தொடர்ந்து, அதே ஆண்டு கிளம்பாக்கம் அருகே 5.97 கிலோ போதைப்பொருள் பறிமுதல் செய்யப்பட்டது. மேலும், கடந்த 2023 ஆம் ஆண்டில் மண்ணடி பகுதியில் ஒரு இலங்கை நாட்டவரிடமிருந்து 2 கிலோவும், அம்பத்தூர் பகுதியில் ஒரு நபரிடமிருந்து 54.6 கிலோ போதைப்பொருளும் கைப்பற்றப்பட்ட வழக்குகள் அமலாக்கத்துறையின் தீவிர கண்காணிப்பில் உள்ளன. நான்காவது வழக்கில் 950 கிராம் போதைப்பொருள் கைப்பற்றப்பட்டதும் குறிப்பிடத்தக்கது.

தமிழகம் மட்டுமின்றி கேரளா, கர்நாடகா மற்றும் தெலுங்கானா ஆகிய மாநிலங்களிலும் ஒரே நேரத்தில் சுமார் 30 இடங்களில் அமலாக்கத்துறை அதிகாரிகள் சோதனை நடத்தினர். போதைப்பொருள் கடத்தலின் மூலம் ஈட்டப்பட்ட பணம், துபாய் மையமாகக் கொண்ட ஹவாலா நெட்வொர்க் மூலம் பரிமாற்றம் செய்யப்பட்டதா என்பது குறித்து விரிவான விசாரணை நடைபெற்று வருகிறது. இந்த அதிரடி சோதனைகள் மாநிலம் முழுவதும் பெரும் பரபரப்பை ஏற்படுத்தியுள்ளதுடன், போதைப்பொருள் கடத்தலுக்கு எதிரான மத்திய அரசின் கடும் நடவடிக்கையை வெளிப்படுத்துவதாக அமைந்துள்ளது.