தமிழகத்தில் விரைவில் இ-சேவை 2.0 திட்டம்: ஒரே தளத்தில் 1,000 அரசுச் சேவைகள் கிடைக்க வழிவகை

தமிழக அரசு விரைவில் 1,000 அரசு சேவைகளை வழங்கும் வகையில் அதிநவீன 'இ-சேவை 2.0' தளத்தை அறிமுகம் செய்யத் திட்டமிட்டுள்ளது.

தமிழக அரசு தனது நிர்வாகச் செயல்பாடுகளை மேலும் எளிமைப்படுத்தும் நோக்கில், ஒரே குடையின் கீழ் 1,000 அரசுச் சேவைகளை வழங்கும் வகையில் 'இ-சேவை 2.0' என்ற புதிய டிஜிட்டல் தளத்தை உருவாக்குவதற்கான பணிகளில் தீவிரமாக ஈடுபட்டுள்ளது. இந்தத் திட்டம் செயல்படுத்தப்படும்போது, தற்போது வெவ்வேறு துறைகளில் சிதறிக் கிடக்கும் அரசு சேவைகள் அனைத்தும் ஒருங்கிணைக்கப்பட்டு, பொதுமக்களுக்கு மிகவும் எளிதான முறையில் கிடைக்கும். இதற்கான முதற்கட்ட நடவடிக்கையாக, மென்பொருள் தீர்வுகளை பரிந்துரைக்குமாறு தகவல் தொழில்நுட்ப நிறுவனங்களிடம் இருந்து தமிழ்நாடு மின்-ஆளுமை முகமை (TNeGA) கடந்த அக்டோபர் 23 அன்று விருப்பக் கோரல் (Expression of Interest) ஆவணத்தை வெளியிட்டது.

இந்த புதிய தளமானது சுமார் 15 பல்வேறு துறை சார்ந்த இணையதளங்களையும், 18 முக்கிய டிஜிட்டல் பொது உள்கட்டமைப்பு அமைப்புகளையும் ஒன்றிணைக்கும் வகையில் வடிவமைக்கப்பட உள்ளது. இத்திட்டத்தின் முக்கிய சிறப்பம்சமாக, இதுவரை சேமிக்கப்பட்டுள்ள 110 டெராபைட் (TB) அளவிலான பழைய தரவுகளை புதிய தொழில்நுட்பத்திற்கு மாற்றும் பணி மேற்கொள்ளப்பட உள்ளது. இது தவிர, குடிமக்களுக்கான பொது அடையாள எண் (Citizen Access Number) மற்றும் சிங்கிள் சைன்-ஆன் (Single Sign-on) வசதிகள் அறிமுகப்படுத்தப்பட உள்ளன. இதன் மூலம் ஆதார் மற்றும் மாநில அரசின் அடையாள எண்களை இணைத்து, போலிப் பதிவுகளைக் கண்டறிந்து நீக்கவும் வழிவகை செய்யப்படும்.

செயற்கை நுண்ணறிவு (AI) தொழில்நுட்பத்தின் உதவியுடன் செயல்படவுள்ள இந்த புதிய தளத்தில், தமிழ் மொழியில் உரையாடும் வசதி (Conversational Service Discovery) மற்றும் தமிழ் குரல் வழி இடைமுகம் (Voice Interface) ஆகியவை இடம்பெற உள்ளது. இதனால், சாதாரண மக்களும் எவ்வித சிரமமும் இன்றி அரசின் சேவைகளைப் பெற முடியும். மேலும், தானியங்கி முறையில் ஆவணங்களைச் சரிபார்த்தல், பொதுமக்களின் குறைகளை வகைப்படுத்துதல் மற்றும் அதிகாரிகள் விரைவாக முடிவெடுக்க உதவும் கருவிகள் எனப் பல்வேறு நவீன தொழில்நுட்ப வசதிகள் இந்த இ-சேவை 2.0 தளத்தில் சேர்க்கப்படவுள்ளன.

தற்போது நடைமுறையில் உள்ள இ-சேவை தளம் கடந்த 2016-ஆம் ஆண்டு மே 9 அன்று செயல்பாட்டுக்கு வந்தது. தற்போது வரை 38 துறைகளின் கீழ் 275 வகையான சேவைகள் 25,277 இ-சேவை மையங்கள் மற்றும் இணையதளம் வாயிலாக வழங்கப்பட்டு வருகின்றன. ஆண்டுக்கு சராசரியாக 1.4 கோடி பரிவர்த்தனைகளை கையாளும் இந்த தளம், தற்போது ஜாவா மற்றும் .நெட் (Java and .NET) எனப் பல்வேறு தொழில்நுட்ப அடுக்குகளில் இயங்குகிறது. புதிய இ-சேவை 2.0 தளமானது, இந்த சிக்கல்களைக் களைந்து அனைத்து சேவைகளையும் ஒரே பொதுவான தொழில்நுட்பக் கட்டமைப்பின் கீழ் கொண்டுவரும் என எதிர்பார்க்கப்படுகிறது.