ஏரல் அரசு மருத்துவமனையில் நள்ளிரவு ஆய்வு: எம்.எல்.ஏ சரவணனுக்கு மருத்துவர் சங்கங்கள் கடும் எதிர்ப்பு

தூத்துக்குடி மாவட்டம் ஏரல் அரசு மருத்துவமனையில் நள்ளிரவில் ஆய்வு செய்த விசிக எம்.எல்.ஏ சரவணன் மீது மருத்துவர் சங்கங்கள் கடும் கண்டனம் தெரிவித்துள்ளன.

தூத்துக்குடி மாவட்டம் ஏரல் அரசு மருத்துவமனையில் தமிழக வெற்றிக் கழகத்தின் ஸ்ரீவைகுண்டம் தொகுதி சட்டப்பேரவை உறுப்பினர் ஜி. சரவணன் நள்ளிரவில் மேற்கொண்ட திடீர் ஆய்வு பெரும் சர்ச்சையை ஏற்படுத்தியுள்ளது. தமக்கு ஆதரவாளர்களுடன் மருத்துவமனைக்குள் நுழைந்த எம்.எல்.ஏ, பணி அறையில் ஓய்வெடுத்துக் கொண்டிருந்த மருத்துவரை எழுப்புவதற்காக அங்கிருந்த செவிலியரை வற்புறுத்திய காட்சிகள் சமூக வலைதளங்களில் வைரலாக பரவின. இந்தச் சம்பவம் மருத்துவ வட்டாரங்களில் பெரும் கொந்தளிப்பை ஏற்படுத்தியுள்ளது.

இந்தச் செயலை வன்மையாகக் கண்டித்துள்ள சேவை மருத்துவர்கள் மற்றும் முதுநிலை மருத்துவப் பட்டதாரிகள் சங்கம், பணியில் இருந்த மருத்துவரின் செயலை நியாயப்படுத்தியுள்ளது. கடந்த காலங்களில் மருத்துவமனையில் திருட்டு சம்பவங்கள் நிகழ்ந்துள்ளதால், பாதுகாப்பு கருதி மருத்துவர் கதவைத் தாழிட்டு உறங்கியதாக அவர்கள் விளக்கம் அளித்துள்ளனர். மேலும், இத்தகைய நிகழ்வுகள் மருத்துவர்களின் பணிச் சூழலை பாதிப்பதுடன், அவர்களை மன உளைச்சலுக்கு உள்ளாக்குவதாகவும் சங்கம் சுட்டிக்காட்டியுள்ளது.

தமிழ்நாடு மருத்துவ அலுவலர்கள் சங்கம் வெளியிட்டுள்ள அறிக்கையில், தேர்ந்தெடுக்கப்பட்ட மக்கள் பிரதிநிதிகள் மற்றும் அரசியல் கட்சியினர் அரசு சுகாதாரப் பணியாளர்கள் மீது இத்தகைய தலையீடுகளைச் செய்வது ஊழியர்களையும், அரசையும் அவமதிக்கும் செயல் எனத் தெரிவித்துள்ளது. மருத்துவமனைகளில் நிலவும் பாதுகாப்பற்ற சூழலைச் சரிசெய்யவும், அரசு நடவடிக்கை எடுக்க வேண்டும் என வலியுறுத்தப்பட்டுள்ளது.

நீண்ட காலமாகத் தொடரும் 24 மணி நேரப் பணி முறையை ஒழித்துவிட்டு, சுழற்சி முறை பணி நேரத்தை (Shift system) அறிமுகப்படுத்த வேண்டும் என மருத்துவ சங்கங்கள் சுகாதாரத் துறையிடம் கோரிக்கை விடுத்துள்ளன. இக்கோரிக்கையை அரசு ஏற்காவிட்டாலோ அல்லது இதுபோன்ற அத்துமீறல்கள் தொடர்ந்தாலோ, கடுமையான போராட்டங்களிலும் பணிப் புறக்கணிப்பிலும் ஈடுபடப்போவதாக மருத்துவர் சங்கங்கள் எச்சரித்துள்ளன. இந்த விவகாரம் அரசு மருத்துவமனைகளின் நிர்வாகச் செயல்பாடுகள் குறித்த விவாதத்தை மீண்டும் பொதுவெளியில் எழுப்பியுள்ளது.