ஃபஹத் பாசில் எனக்கு மிகவும் பிடித்த நடிகர்: நெகிழ்ச்சியுடன் பகிர்ந்துகொண்ட ஜூனியர் என்.டி.ஆர்

டான்ட் டபுள் தி டபுள் திரைப்படத்தின் முன்னோட்ட விழாவில் நடிகர் ஜூனியர் என்.டி.ஆர் மற்றும் ஃபஹத் பாசில் பங்கேற்று நெகிழ்ச்சியை வெளிப்படுத்தினர்.

ஹைதராபாத்தில் நடைபெற்ற 'டான்ட் டபுள் தி டபுள்' (Don’t Trouble the Trouble) திரைப்படத்தின் முன்னோட்ட வெளியீட்டு விழாவில், தெலுங்கு சினிமாவின் முன்னணி நட்சத்திரமான ஜூனியர் என்.டி.ஆர் சிறப்பு விருந்தினராகக் கலந்துகொண்டார். இந்த விழாவில் அவர் தனது திரையுலகப் பயணம், குடும்ப உறவுகள் மற்றும் சக கலைஞர்கள் குறித்த நெகிழ்ச்சியான நினைவுகளைப் பகிர்ந்து கொண்டார். குறிப்பாக, நடிகர் ஃபஹத் பாசிலுடனான தனது நட்பு குறித்து அவர் பெருமிதத்துடன் பேசினார்.

கொரோனா பெருந்தொற்று காலத்தின் கடினமான தருணங்களில், ஃபஹத் பாசிலின் திரைப்படங்கள் தனக்கு ஒரு சிறந்த ஆறுதலாக இருந்ததாக ஜூனியர் என்.டி.ஆர் குறிப்பிட்டார். ஃபஹத் பாசிலின் 'பெங்களூர் டேஸ்' திரைப்படத்தைப் பார்த்த பிறகுதான், அவரது நடிப்புத் திறமையின் மீது தனக்கு ஈர்ப்பு ஏற்பட்டதாகவும், இன்று இந்தியாவே பெருமைப்படும் நடிகர்களில் அவர் முக்கியமானவர் என்றும் அவர் புகழ்ந்தார். ஃபஹத் பாசிலை தனது சகோதரராகவும், ஒரு சிறந்த முன்மாதிரியாகவும் கருதுவதாகக் கூறிய ஜூனியர் என்.டி.ஆர், அவர் முதன்முதலாக தெலுங்கில் நாயகனாக நடிக்கும் இந்தத் திரைப்படம் மிகப்பெரிய வெற்றி பெற வாழ்த்தினார்.

தனது சமீபத்திய உடல்நிலை குறித்தும் பட அறிவிப்பு குறித்தும் பேசிய ஜூனியர் என்.டி.ஆர், தோள்பட்டை அறுவை சிகிச்சைக்குப் பிறகு தான் தற்போது குணமடைந்து வருவதாகவும், தனது வரவிருக்கும் 'டிராகன்' (Dragon) திரைப்படத்தின் படப்பிடிப்பில் விரைவில் மீண்டும் பங்கேற்க உள்ளதாகவும் தெரிவித்தார். மேலும், திட்டமிட்டபடி அந்தத் திரைப்படம் வெளியாகும் என்றும், அதில் எவ்விதத் தாமதமும் இருக்காது என்றும் அவர் ரசிகர்களுக்கு உறுதி அளித்தார். இயக்குநர்கள் மீதான தனது அன்பையும் அவர் வெளிப்படுத்தத் தவறவில்லை.

இந்த நிகழ்ச்சியில் தயாரிப்பாளர் எஸ்.எஸ். கார்த்திகேயாவைப் பற்றிக் குறிப்பிடும்போது ஜூனியர் என்.டி.ஆர் மிகுந்த உணர்ச்சிவசப்பட்டார். தனது அறிமுகத் திரைப்படமான 'நின்னு சூடலானி' முதல் இன்று வரை, ராஜமௌலி குடும்பத்தினர் தனக்குக் கொடுத்து வரும் ஆதரவை அவர் நெகிழ்ச்சியுடன் நினைவு கூர்ந்தார். தனது 17 வயதில் 'ஸ்டூடண்ட் நம்பர் 1' திரைப்படத்தில் பணியாற்றிய காலம் முதல், இக்கட்டான சூழல்களில் தனக்குத் துணையாக இருந்த கார்த்திகேயாவை தனது சொந்த சகோதரனாகவே கருதுவதாக அவர் கூறினார். ராஜமௌலியின் பிரம்மாண்ட படைப்புகளான 'ஆர்.ஆர்.ஆர்' மற்றும் 'பாகுபலி' ஆகியவற்றில் கார்த்திகேயாவின் பங்களிப்பு அளப்பரியது என்றும் அவர் சுட்டிக்காட்டினார்.