கோயம்புத்தூரில் போலி ஐஎஸ்ஐ முத்திரை: ரூ. 2 லட்சம் மதிப்பிலான ஃபைபர் கம்பிகள் பறிமுதல்

கோயம்புத்தூரில் உரிய உரிமம் இன்றி ஐஎஸ்ஐ முத்திரையுடன் ஃபைபர் கம்பிகளை விற்பனை செய்த தனியார் நிறுவனத்தில் பிஐஎஸ் அதிகாரிகள் அதிரடி சோதனை நடத்தினர்.

கோயம்புத்தூரில் செயல்பட்டு வரும் ஒரு தனியார் நிறுவனம், உரிய அரசு உரிமம் பெறாமல் தனது தயாரிப்புகளில் ஐஎஸ்ஐ (ISI) முத்திரையைப் பயன்படுத்தி பொருட்களை விற்பனை செய்து வருவதாக இந்திய தர நிர்ணய அமைப்பிற்கு (BIS) ரகசியத் தகவல் கிடைத்தது. இந்தத் தகவலின் அடிப்படையில், இந்திய தர நிர்ணய அமைப்பின் கோயம்புத்தூர் கிளை அலுவலகத்தின் இயக்குநர் மற்றும் தலைவர் ரமேஷ் கே தலைமையிலான குழுவினர், மில் சாலையில் அமைந்துள்ள குறிப்பிட்ட அந்த நிறுவனத்தில் திடீர் ஆய்வு மேற்கொண்டனர்.

சோதனையின் போது, அந்த நிறுவனம் திடமான வட்ட வடிவ கண்ணாடி ஃபைபர் வலுவூட்டப்பட்ட பாலிமர் கம்பிகளை ஐஎஸ்ஐ முத்திரையுடன் சட்டவிரோதமாக இருப்பு வைத்து விற்பனை செய்தது உறுதி செய்யப்பட்டது. முறையான பிஐஎஸ் உரிமம் இன்றி இத்தகைய முத்திரையைப் பயன்படுத்தியதற்காக, அங்கு விற்பனைக்கு வைக்கப்பட்டிருந்த சுமார் 130 சுருள் ஃபைபர் கம்பிகள் உடனடியாக அதிகாரிகளால் பறிமுதல் செய்யப்பட்டன. இவற்றின் சந்தை மதிப்பு சுமார் ரூ. 2 லட்சம் என்று மதிப்பிடப்பட்டுள்ளது.

இந்த சட்டவிரோத நடவடிக்கை குறித்துப் பேசிய பிஐஎஸ் அதிகாரிகள், இந்திய தர நிர்ணய அமைப்பின் சட்டம் 2016-ன் பிரிவு 28-ன் கீழ் சம்பந்தப்பட்ட நிறுவனம் மீது சட்டப்பூர்வ நடவடிக்கைகள் எடுக்கப்படும் என்று தெரிவித்துள்ளனர். உரிய உரிமம் இன்றி ஐஎஸ்ஐ முத்திரையைப் பயன்படுத்துவது தண்டனைக்குரிய குற்றமாகும். முதல்முறை தவறு செய்பவர்களுக்கு இரண்டு ஆண்டுகள் வரை சிறைத்தண்டனையோ அல்லது குறைந்தபட்சம் ரூ. 2 லட்சம் அபராதமோ அல்லது பறிமுதல் செய்யப்பட்ட பொருட்களின் மதிப்பை விட பத்து மடங்கு வரை அபராதமோ விதிக்க வாய்ப்புள்ளது.

தரம் குறைந்த அல்லது சான்றிதழ் பெறாத பொருட்களைப் பயன்படுத்துவது பொதுமக்களின் பாதுகாப்பிற்கு பெரும் அச்சுறுத்தலாக அமையும் என்று பிஐஎஸ் எச்சரித்துள்ளது. எனவே, நுகர்வோர் எந்தவொரு பொருளையும் வாங்குவதற்கு முன்பாக, அதில் உள்ள ஐஎஸ்ஐ முத்திரை மற்றும் சிஎம்/எல் (CM/L) உரிம எண்ணின் நம்பகத்தன்மையை சரிபார்க்க வேண்டும் என்று கேட்டுக்கொள்ளப்பட்டுள்ளது. இதற்காக பிஐஎஸ் கேர் (BIS CARE) செயலியை பொதுமக்கள் பயன்படுத்தலாம் என்றும் அதிகாரிகள் அறிவுறுத்தியுள்ளனர்.