பிரபல இசையமைப்பாளர் தேனிசைத் தென்றல் தேவா உடல் அரசு மரியாதையுடன் நல்லடக்கம்

தமிழ் சினிமாவின் மூத்த இசையமைப்பாளர் 'தேனிசைத் தென்றல்' தேவா, அரசு மரியாதையுடன் ராணிப்பேட்டையில் நல்லடக்கம் செய்யப்பட்டார்.

தமிழ் திரையுலகின் புகழ்பெற்ற இசையமைப்பாளரும் பாடகருமான 'தேனிசைத் தென்றல்' தேவா, மாரடைப்பு காரணமாக சென்னையில் காலமானார். அவரது மறைவு ஒட்டுமொத்த திரையுலகையும் சோகத்தில் ஆழ்த்தியுள்ளது. தமிழ்நாடு அரசு அவரது கலைச் சேவையை கௌரவிக்கும் விதமாக, அரசு மரியாதையுடன் அவரது இறுதிச்சடங்குகள் நடைபெறும் என்று அறிவித்திருந்தது. இதனைத் தொடர்ந்து, அவரது உடல் சென்னையில் இருந்து ராணிப்பேட்டை மாவட்டம், ஆற்காடு வட்டம், பழைய மங்காடு கிராமத்தில் உள்ள அவரது பண்ணை வீட்டிற்கு கொண்டு வரப்பட்டது.

ஞாயிற்றுக்கிழமை மாலை 3 மணி அளவில் அவரது சொந்த கிராமத்திற்கு கொண்டு வரப்பட்ட தேவா அவர்களின் உடல், பொதுமக்கள் அஞ்சலிக்காக வைக்கப்பட்டது. அவரது இறுதி ஊர்வலத்தின் போது, பாரம்பரிய இசைக்கருவிகள் முழங்க, அப்பகுதி மக்கள் மற்றும் உறவினர்கள் திரண்டு வந்து கண்ணீர் அஞ்சலி செலுத்தினர். அவரது இறுதிச் சடங்கின் போது, ராணிப்பேட்டை ஆயுதப்படை காவலர்கள் சார்பில் 72 குண்டுகள் முழங்க அரசு மரியாதை செலுத்தப்பட்டது. தேக்கு மரத்தாலான பேழையில் வைக்கப்பட்டிருந்த அவரது உடல், பண்ணையில் ஒதுக்கப்பட்ட இடத்தில் நல்லடக்கம் செய்யப்பட்டது.

முன்னதாக, சென்னையில் வைக்கப்பட்டிருந்த தேவாவின் உடலுக்கு தமிழக முதல்வர் சி. ஜோசப் விஜய், திமுக தலைவர் மு.க. ஸ்டாலின், நடிகர்கள் ரஜினிகாந்த் மற்றும் கமல்ஹாசன் உள்ளிட்ட பல்வேறு முக்கிய பிரமுகர்கள் நேரில் சென்று அஞ்சலி செலுத்தினர். ராணிப்பேட்டையில் நடைபெற்ற இறுதிச்சடங்கில் கூட்டுறவுத்துறை அமைச்சர் வி. காந்திராஜ், ராணிப்பேட்டை மாவட்ட ஆட்சியர் என். பிரியா ரவிச்சந்திரன், மாவட்ட வருவாய் அலுவலர் என். சரவணன் மற்றும் சட்டமன்ற உறுப்பினர்கள் எம். சுகுமார், எம்.எம். வினோத் கண்ணன், எம். சுதாகர் ஆகியோர் கலந்துகொண்டு மரியாதை செலுத்தினர். ராணிப்பேட்டை மாவட்ட காவல் கண்காணிப்பாளர் பி. சிபின் தலைமையில் காவல்துறையினர் பாதுகாப்பு மற்றும் அரசு மரியாதைக்கான ஏற்பாடுகளைச் செய்தனர்.

தேவனேசன் சொக்கலிங்கம் என்ற இயற்பெயரைக் கொண்ட தேவா, 1950-ஆம் ஆண்டு நவம்பர் 20-ஆம் தேதி பிறந்தார். எண்பதுகளின் இறுதியில் தமிழ் சினிமாவில் அறிமுகமான இவர், கானா இசைப் பாடல்களை மக்களிடையே கொண்டு சென்றதில் முக்கிய பங்கு வகித்தார். அண்ணாமலை, பாட்ஷா, ஆசை, காதல் கோட்டை மற்றும் வாலி உள்ளிட்ட நூற்றுக்கணக்கான திரைப்படங்களுக்கு இசையமைத்த அவர், தென்னிந்தியாவின் நான்கு மொழிகளிலும் தனது முத்திரையைப் பதித்தார். தமிழக அரசின் கலைமாமணி விருதினையும், ஆசை படத்திற்காக சிறந்த இசையமைப்பாளருக்கான மாநில அரசின் விருதினையும் பெற்றுள்ளார். இசைத்துறையில் அவர் விட்டுச் சென்ற வெற்றிடம் ஈடுசெய்ய முடியாதது என்று திரையுலகினர் புகழஞ்சலி செலுத்தி வருகின்றனர்.