தமிழக அரசுப் பள்ளி மாணவர்களின் ராணுவக் கனவை நனவாக்கும் முன்னாள் மேஜர்: வீர தமிழ் நாடு இயக்கம் ஒரு பார்வை

முன்னாள் ராணுவ மேஜர் கௌரவ் மிஸ்ரா தமிழகம் மற்றும் புதுச்சேரி மாணவர்களுக்கு ராணுவத்தில் அதிகாரியாக சேர இலவசமாக வழிகாட்டி வருகிறார்.

இந்திய ராணுவத்தில் 11 ஆண்டுகள் பணியாற்றி ஓய்வுபெற்ற மேஜர் கௌரவ் மிஸ்ரா, தற்போது தமிழகம் மற்றும் புதுச்சேரி மாநிலத்தைச் சேர்ந்த அரசுப் பள்ளி மற்றும் கல்லூரி மாணவர்களின் ராணுவக் கனவை நனவாக்கும் உன்னத பணியில் ஈடுபட்டுள்ளார். மத்தியப் பிரதேச மாநிலத்தைச் சேர்ந்தவரான இவர், கடந்த பல ஆண்டுகளாக விழுப்புரம் மாவட்டம் பொம்மையார்பாளையத்தில் வசித்து வருகிறார். சென்னையில் தனது பள்ளி மற்றும் பொறியியல் படிப்பை முடித்த அவர், 2013 ஆம் ஆண்டு யுபிஎஸ்சி தேர்வினை எழுதி ராணுவத்தில் லெப்டினன்டாக இணைந்தார். ஜம்மு காஷ்மீர், வடகிழக்கு மாநிலங்கள் என நாட்டின் பல்வேறு சவாலான எல்லைகளில் பணியாற்றிய அவர், கடந்த 2024 ஆம் ஆண்டு மேஜர் அந்தஸ்திலிருந்து விருப்ப ஓய்வு பெற்றார்.

ராணுவத்தில் பணியாற்றிய காலத்தில் பெற்ற அனுபவங்களை மாணவர்களுக்குக் கொண்டு சேர்க்க வேண்டும் என்ற நோக்கில், 2022 ஆம் ஆண்டு முதல் அவர் விழிப்புணர்வுப் பணிகளைத் தொடங்கி நடத்தினார். குறிப்பாக, அரசுப் பள்ளிகளில் பயிலும் பொருளாதாரத்தில் பின்தங்கிய மற்றும் கிராமப்புற மாணவர்கள் ராணுவத்தில் சேர்வதற்கான வழிமுறைகளை அறியாமல் இருப்பதைக் கண்டறிந்த அவர், அதற்காகத் தனது முழு நேரத்தையும் அர்ப்பணித்துள்ளார். தான் வழங்கும் இந்த வழிகாட்டுதலுக்கு எந்தவிதக் கட்டணமும் வசூலிப்பதில்லை என்பது குறிப்பிடத்தக்கது. இதன் மூலம் ஏழை எளிய மாணவர்களும் ராணுவத்தின் உயர் பதவிகளுக்குச் செல்ல முடியும் என்ற நம்பிக்கையை அவர் விதைத்து வருகிறார்.

தனது இந்த முயற்சியை 'வீர தமிழ் நாடு இயக்கம்' எனப் பெயரிட்டு, அதன் மூலம் தமிழகம், புதுச்சேரி உள்ளிட்ட மாநிலங்களில் உள்ள 39 பள்ளிகள் மற்றும் 29 கல்லூரிகளில் இதுவரை விழிப்புணர்வு நிகழ்ச்சிகளை நடத்தியுள்ளார். இவரது வழிகாட்டுதலில் பயிற்சி பெற்ற 19 மாணவர்கள், தற்போது இந்திய ராணுவம், கடற்படை மற்றும் விமானப்படையில் அதிகாரிகளாகப் பணிபுரிகின்றனர். இவரது சிறந்த சேவைக்காக சைன்ய சேவா பதக்கம், ஆபரேஷன் ரக்‌ஷக் பதக்கம் உள்ளிட்ட பல கௌரவங்கள் வழங்கப்பட்டுள்ளன. மேலும், புதுச்சேரி துணைநிலை ஆளுநர் கே. கைலாஷ்நாதன் இவரை நேரில் அழைத்து பாராட்டியுள்ளார்.

எதிர்காலத் திட்டமாக தனது மனைவியும் விமானப்படை ஸ்குவாட்ரன் லீடருமான வைஷ்ணவி செல்லப்பாவுடன் இணைந்து 'வாயு பூமி' எனும் அரசு சாரா அமைப்பைத் தொடங்க மேஜர் கௌரவ் மிஸ்ரா திட்டமிட்டுள்ளார். இந்த அமைப்பு மூலம் ராணுவத்தில் சேர விரும்பும் மாணவர்களுக்கென பிரத்யேக அகாடமி ஒன்றை உருவாக்கி, அவர்களுக்குத் தேவையான முறையான பயிற்சிகளை வழங்க அவர் இலக்கு நிர்ணயித்துள்ளார். கிராமப்புற மற்றும் நடுத்தர வர்க்கக் குடும்பங்களைச் சேர்ந்த மாணவர்களும் நாட்டின் பாதுகாப்பில் உயர் பதவிகளை வகிக்க முடியும் என்ற அவரது இந்த முயற்சி, கல்வி மற்றும் பாதுகாப்புத் துறையில் புதிய மாற்றங்களை ஏற்படுத்தி வருகிறது.