தமிழகத்தில் மாற்றுத்திறனாளிகளுக்கு அரசுப் பேருந்துகளில் இலவசப் பயணம்: புதிய உத்தரவு வெளியீடு

மாற்றுத்திறனாளிகள் மற்றும் அவர்களுடன் வரும் ஒரு உதவியாளர் தமிழக அரசுப் பேருந்துகளில் இனி இலவசமாகப் பயணம் செய்யலாம் என அறிவிக்கப்பட்டுள்ளது.

தமிழ்நாட்டில் உள்ள மாற்றுத்திறனாளிகளின் பயணத்தை எளிதாக்கும் வகையில், மாநில அரசு முக்கிய அறிவிப்பு ஒன்றை வெளியிட்டுள்ளது. இதன்படி, மாற்றுத்திறனாளிகள் மற்றும் அவர்களுடன் பயணம் செய்யும் ஒரு உதவியாளர் என இருவருக்கும் தமிழக அரசுப் பேருந்துகளில் இலவசப் பயண சலுகை வழங்கப்படுகிறது. ‘வெற்றிப் பயணம்’ திட்டத்தின் கீழ் நடைமுறைப்படுத்தப்பட்டுள்ள இந்த புதிய அரசாணையின்படி, மாற்றுத்திறனாளிகள் எவ்வித கட்டணமும் இன்றி பயணம் செய்ய அனுமதிக்கப்படுவார்கள்.

இந்த சலுகையை பெறுவதற்கு மாநில அரசால் வழங்கப்பட்ட 16 இலக்க தனித்துவ அடையாள அட்டை (UDID) கட்டாயமாக்கப்பட்டுள்ளது. அரசுப் பேருந்து நடத்துனரிடம் இந்த அடையாள அட்டையை காண்பிப்பதன் மூலம், பயணச்சீட்டு ஏதுமின்றி பூஜ்ய மதிப்புள்ள டிக்கெட்டைப் பெற்று பயணிக்க முடியும். சாதாரண நகர மற்றும் புறநகர் பேருந்துகள், விரைவுப் பேருந்துகள், டீலக்ஸ் மற்றும் மலைப்பகுதி பேருந்துகள் என பல்வேறு வகையான பேருந்துகளில் இந்த சலுகை பொருந்தும். இருப்பினும், குளிர்சாதன வசதி கொண்ட பேருந்துகளுக்கு இந்த சலுகை வழங்கப்படவில்லை என்பது குறிப்பிடத்தக்கது.

கடந்த அக்டோபர் 27-ஆம் தேதி வெளியிடப்பட்ட இந்த அரசாணையின் மூலம், ஏற்கனவே வழக்கத்தில் இருந்த இலவச பேருந்து பயண அட்டைகள் செல்லாதவை என அறிவிக்கப்பட்டுள்ளது. எனவே, தகுதியுள்ள பயனாளிகள் அனைவரும் இனி UDID அட்டையை மட்டுமே பயணச்சீட்டாகப் பயன்படுத்த வேண்டும் என அறிவுறுத்தப்பட்டுள்ளது. இந்த மாற்றம் பயனாளிகளுக்கு பயணங்களை மேற்கொள்வதில் எவ்வித தடையுமின்றி செயல்பட உதவும் என அரசு தெரிவித்துள்ளது.

இந்தத் திட்டத்திற்காக தமிழ்நாடு அரசு தனது நிதி ஒதுக்கீட்டை அதிகரித்துள்ளது. ஏற்கனவே 2026-27 நிதியாண்டுக்கான பட்ஜெட்டில் 95 கோடி ரூபாய் ஒதுக்கீடு செய்யப்பட்டிருந்த நிலையில், தற்போது கூடுதலாக நிதி ஒதுக்கப்பட்டு மொத்தம் 114 கோடி ரூபாயாக உயர்த்தப்பட்டுள்ளது. கல்வி, வேலைவாய்ப்பு, சுயதொழில் மற்றும் மருத்துவத் தேவைகளுக்காகப் பயணம் செய்யும் மாற்றுத்திறனாளிகளுக்கு இந்த அரசு நடவடிக்கை பெரும் உதவியாக இருக்கும் என எதிர்பார்க்கப்படுகிறது. மேலும், இந்த உத்தரவு உடனடியாக நடைமுறைக்கு வருவதாகவும் தெரிவிக்கப்பட்டுள்ளது.