ஜெம் கிரானைட்ஸ் வீரமணி விவகாரம்: சிபிஐ விசாரணை கோரிய மனு ஐகோர்ட்டில் வாபஸ்

சென்னை ஜெம் கிரானைட்ஸ் உரிமையாளர் ஆர்.வீரமணி மீதான பாலியல் வழக்கில் சிபிஐ விசாரணை கோரிய மனுவை மனுதாரர் திரும்பப் பெற்றார்.

சென்னை உயர்நீதிமன்றத்தில் ஜெம் கிரானைட்ஸ் நிறுவனத்தின் தலைவர் ஆர்.வீரமணி மீது சுமத்தப்பட்ட பாலியல் குற்றச்சாட்டுகள் குறித்த வழக்கு முக்கியத் திருப்பத்தைப் பெற்றுள்ளது. சிறார் மீதான பாலியல் வன்கொடுமை புகார்கள் தொடர்பான இந்த வழக்கை சிபிஐ (CBI) விசாரணைக்கு மாற்றக் கோரி தொடரப்பட்ட பொதுநல மனுவை, மனுதாரர் தரப்பு திரும்பப் பெற்றுக்கொண்டுள்ளது. இந்த மனுவானது தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள் முருகன் ஆகியோர் அடங்கிய முதல் அமர்வின் முன் விசாரணைக்கு வந்தது. மனுதாரர் தரப்பில் ஆஜரான வழக்கறிஞர், இந்த வழக்கை திரும்பப் பெற அனுமதி கோரியதையடுத்து, நீதிபதிகள் அதற்கு அனுமதி அளித்தனர்.

வழக்கறிஞர் சி. ராஜசேகரன் தாக்கல் செய்திருந்த இந்த பொதுநல மனுவில், கடந்த 2025-ம் ஆண்டு அக்டோபர் 6-ம் தேதி பதிவு செய்யப்பட்ட இந்த வழக்கில், சென்னை பெருநகர காவல்துறை மேற்கொண்ட விசாரணையில் பாதிக்கப்பட்டவர்களை கண்டறிவதிலோ அல்லது குற்றவாளிகளைக் கைது செய்வதிலோ போதுமான முன்னேற்றம் இல்லை என்று குற்றம் சாட்டப்பட்டிருந்தது. ஆர்.வீரமணியின் செல்வாக்கு, அரசியல் கட்சியினருடனான அவரது தொடர்பு மற்றும் மூத்த ஐபிஎஸ் அதிகாரிகளின் தலையீடு உள்ளிட்ட காரணங்களால், இந்த வழக்கின் நேர்மையான விசாரணைக்கு சிபிஐ தலையீடு அவசியம் என்று மனுவில் வலியுறுத்தப்பட்டிருந்தது.

மனுவை விசாரித்த நீதிபதிகள் அமர்வு, இந்த வழக்கை எதற்காகத் தாக்கல் செய்தீர்கள் என்ற கேள்வியை மனுதாரர் தரப்பிடம் எழுப்பியது. அதற்குப் பதிலளித்த மனுதாரர் தரப்பு வழக்கறிஞர், மனு தாக்கல் செய்த பின்னரே இந்த விவகாரம் தொடர்பாக சிறப்புப் புலனாய்வு குழு (SIT) அமைக்கப்பட்டது தங்களுக்குத் தெரியவந்ததாக விளக்கமளித்தனர். சிறப்புப் புலனாய்வு குழு விசாரணை நடந்து கொண்டிருக்கும் சூழலில், இந்த மனு தற்போது தேவையில்லை எனக் கருதி அதனைத் திரும்பப் பெறுவதாகத் தெரிவித்தனர்.

ஜெம் கிரானைட்ஸ் தலைவர் ஆர்.வீரமணி மீதான இந்த பாலியல் புகார் விவகாரம் கடந்த சில மாதங்களாகவே தமிழகத்தில் பெரும் பேசுபொருளாக இருந்து வருகிறது. இது தொடர்பாக ஏற்கனவே பல வழக்குகள் பதிவு செய்யப்பட்டுள்ள நிலையில், காவல்துறையின் விசாரணை மற்றும் அதன் செயல்பாடுகள் குறித்து நீதிமன்றத்தில் அவ்வப்போது விவாதங்கள் எழுப்பப்பட்டு வருகின்றன. தற்போது சிறப்புப் புலனாய்வு குழுவின் விசாரணையில் உள்ள இந்த வழக்கு குறித்த சட்டப்பூர்வ நடவடிக்கைகள் தொடர்ந்து கண்காணிக்கப்பட்டு வருகின்றன என்பது குறிப்பிடத்தக்கது.