தமிழகத்தில் இனி ஜிஐஎஸ் (GIS) தொழில்நுட்பத்தில் நகரங்களின் முதன்மைத் திட்டங்கள்: அரசு அதிரடி உத்தரவு

தமிழகத்தில் உள்ள நகர்ப்புற உள்ளாட்சி அமைப்புகள் மற்றும் மேம்பாட்டு அதிகார அமைப்புகள் இனி புவிசார் தகவல் தொழில்நுட்ப (GIS) அடிப்படையிலான முதன்மைத் திட்டங்களைச் செயல்படுத்த தமிழக அரசு உத்தரவிட்டுள்ளது.

தமிழகத்தில் நகரங்களின் திட்டமிடல் முறையை நவீனப்படுத்தும் நோக்கில், இனி அனைத்து நகர்ப்புற உள்ளாட்சி அமைப்புகள் மற்றும் நகர்ப்புற மேம்பாட்டு அதிகார அமைப்புகள் கட்டாயமாக புவிசார் தகவல் தொழில்நுட்பம் எனப்படும் ஜிஐஎஸ் (GIS) முறையைப் பின்பற்றி முதன்மைத் திட்டங்களை (Master Plans) உருவாக்க வேண்டும் எனத் தமிழக அரசு உத்தரவிட்டுள்ளது. இது தொடர்பான அரசாணையை வீட்டுவசதி மற்றும் நகர்ப்புற வளர்ச்சித் துறை கடந்த ஆகஸ்ட் 11-ஆம் தேதி வெளியிட்டுள்ளது. இதன் மூலம் மாநிலத்தின் ஒட்டுமொத்த நகர்ப்புறக் கட்டமைப்பை டிஜிட்டல் மயமாக்கி, தரவு சார்ந்த திட்டமிடலை உறுதி செய்ய அரசு திட்டமிட்டுள்ளது.

தற்போது மாநிலத்தில் 130 நகரங்களுக்கான 123 முதன்மைத் திட்டங்கள் வழக்கமான பழைய முறைகளைப் பின்பற்றி உருவாக்கப்பட்டுள்ளன. இவை டிஜிட்டல் தளம் மற்றும் தரவு சார்ந்த அடித்தளம் இல்லாதவை என்பதால், எதிர்காலத் தேவைகளைப் பூர்த்தி செய்வதில் சவால்கள் நீடிக்கின்றன. இதனைக் கருத்தில் கொண்டு, இனி உருவாக்கப்படும் அனைத்து முதன்மைத் திட்டங்கள், மண்டலத் திட்டங்கள் மற்றும் நிலப் பயன்பாட்டுத் திட்டங்கள் அனைத்தும் சட்டப்பூர்வமாகச் செல்லுபடியாகும் வகையில் ஜிஐஎஸ் தொழில்நுட்பத்தைப் பயன்படுத்தி இருக்க வேண்டும் என்று அரசு கட்டாயமாக்கியுள்ளது. அனைத்து திட்டமிடல் அதிகார அமைப்புகளும் தரப்படுத்தப்பட்ட புவியியல் மற்றும் இடஞ்சார்ந்த தரவு கட்டமைப்புகளைப் பின்பற்றுமாறு அறிவுறுத்தப்பட்டுள்ளன.

இந்தத் திட்டத்தின் கீழ் உருவாக்கப்படும் இடஞ்சார்ந்த தரவுத் தளத்தில் நிர்வாக எல்லைகள், நில அளவை விவரங்கள், போக்குவரத்து நெட்வொர்க், தற்போதுள்ள மற்றும் முன்மொழியப்பட்ட நிலப் பயன்பாடு, கட்டிடங்களின் அமைவிடம், நீர்நிலைகள், வடிகால் வசதிகள், நிலப்பரப்பு வரைபடங்கள் மற்றும் பயன்பாட்டுச் சேவைகளான குடிநீர், கழிவுநீர், மழைநீர் வடிகால், மின்சாரம், எரிவாயு மற்றும் தொலைத்தொடர்பு உள்ளிட்ட முக்கியத் தகவல்கள் அடங்கும். மேலும், சுற்றுச்சூழல் அம்சங்கள், பாரம்பரியச் சின்னங்கள், பொதுக் கட்டமைப்பு வசதிகள், பசுமை மற்றும் திறந்தவெளி பகுதிகள், பேரிடர் பாதிப்புக்குள்ளாகும் பகுதிகள் மற்றும் மக்கள்தொகை புள்ளிவிவரங்கள் அனைத்தும் ஒருங்கிணைக்கப்பட வேண்டும் என்று அரசாணையில் தெரிவிக்கப்பட்டுள்ளது.

இந்த புதிய திட்டமிடல் முறையானது, அடிப்படை அளவீடுகள் மற்றும் வரைபடங்கள் தயாரிப்பது முதல் இறுதித் திட்ட வரைவு சமர்ப்பித்தல் வரை ஒரு கண்டிப்பான செயல்பாட்டு நடைமுறையைப் பின்பற்றி அமல்படுத்தப்பட உள்ளது. இவ்வாறு உருவாக்கப்படும் ஜிஐஎஸ் அடிப்படையிலான திட்டங்கள் அனைத்தும் ஆன்லைன் தளத்தில் பதிவேற்றம் செய்யப்பட வேண்டும் என்பது குறிப்பிடத்தக்கது. இந்த டிஜிட்டல் ஒருங்கிணைப்பு, பல்வேறு அரசுத் துறைகள் திட்டங்களைச் செயல்படுத்தும் போது ஒரே மாதிரியான தரவுகளைப் பயன்படுத்தி, பணிகளை வேகமாகவும் துல்லியமாகவும் முடிக்க உதவும் என்று நகர்ப்புற திட்டமிடல் நிபுணர்கள் தெரிவிக்கின்றனர்.