கும்மிடிப்பூண்டி - கூடூர் புதிய ரயில் பாதை: ரூ. 2,229 கோடியில் முக்கியத் திட்டத்திற்கு மத்திய அரசு அனுமதி

கும்மிடிப்பூண்டி - கூடூர் இடையே ரூ. 2,229 கோடியில் மூன்றாவது மற்றும் நான்காவது ரயில் பாதை திட்டத்திற்கு மத்திய அமைச்சரவை ஒப்புதல் அளித்துள்ளது.

பிரதமர் நரேந்திர மோடி தலைமையிலான மத்திய அமைச்சரவைக் குழு, சென்னை மற்றும் விஜயவாடா இடையேயான ரயில் போக்குவரத்தை மேம்படுத்தும் நோக்கில் மிக முக்கியமான ரயில்வே திட்டத்திற்கு ஒப்புதல் அளித்துள்ளது. இதன்படி, தமிழ்நாட்டின் கும்மிடிப்பூண்டி முதல் ஆந்திர மாநிலத்தின் கூடூர் வரையிலான சுமார் 90 கிலோமீட்டர் தொலைவிற்கு மூன்றாவது மற்றும் நான்காவது ரயில் பாதைகளை அமைக்கும் திட்டத்திற்கு 2,229 கோடி ரூபாய் நிதி ஒதுக்கீடு செய்யப்பட்டுள்ளது. மத்திய அரசு அறிவித்துள்ள ஒட்டுமொத்தமாக 9,450 கோடி ரூபாய் மதிப்பிலான நான்கு ரயில்வே திட்டங்களில் இதுவும் ஒன்றாக இடம்பெற்றுள்ளது என்பது குறிப்பிடத்தக்கது.

தற்போதைய சூழலில் கும்மிடிப்பூண்டி மற்றும் கூடூர் இடையேயான ரயில் பாதைகளில் சுமை மற்றும் பயணிகளின் நெரிசல் 131 சதவீதத்திற்கும் அதிகமாக அதிகரித்துள்ளது. இதனால் எக்ஸ்பிரஸ் ரயில்கள் மற்றும் சரக்கு ரயில்களின் பயணத்தில் கடும் காலதாமதம் ஏற்பட்டு வருகிறது. இந்த புதிய ரயில் பாதைகள் அமைக்கப்படுவதன் மூலம் இந்த நெரிசல் குறையும் என்றும், திருவள்ளூர் மாவட்டத்திலுள்ள தொழிற்சாலைகளில் இருந்து சரக்கு போக்குவரத்து எளிதாகும் என்றும் ரயில்வே அமைச்சகம் தெரிவித்துள்ளது. குறிப்பாக எண்ணூர் மற்றும் கிருஷ்ணபட்னம் துறைமுகங்களுக்கான இணைப்பு பலப்படுத்தப்படுவதன் மூலம் ஆண்டுக்கு கூடுதலாக 21.24 மில்லியன் டன் சரக்குகளைக் கையாள முடியும் என்று கணிக்கப்பட்டுள்ளது.

இந்த பிரம்மாண்டமான ரயில்வே திட்டத்தில் 21 முக்கிய மேம்பாலங்கள் மற்றும் 127 சிறிய வகை பாலங்கள் கட்டப்பட உள்ளன. இதில் சுவர்ணமுகி ஆற்றின் குறுக்கே 360 மீட்டர் நீளத்தில் பிரம்மாண்டமான பாலம் ஒன்றும் அமைக்கப்படவுள்ளது. மேலும் 34 இடங்களில் சாலை மேம்பாலங்கள் மற்றும் கீழ்ப்பாலங்கள் கட்டப்படுவதன் மூலம் ரயில் போக்குவரத்து தடையில்லாமல் நடைபெற வழிவகை செய்யப்படும். ஏற்கனவே சென்னை - ஆத்திப்பட்டு பகுதியில் நான்கு வழிப்பாதைகள் உள்ள நிலையில், தற்போது ஆத்திப்பட்டு - கும்மிடிப்பூண்டி இடையேயான 23 கிலோமீட்டர் தூரத்திற்கு மூன்றாவது மற்றும் நான்காவது பாதை அமைக்கும் பணிகளும் விரைவில் தொடங்கப்படவுள்ளன.

இந்தத் திட்டத்தின் சிறப்பம்சமாக, கார்பன் வெளியேற்றம் சுமார் 17,000 டன் வரை குறையும் என்று மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார். இது சுமார் 68 லட்சம் மரங்களை நடுவதால் கிடைக்கும் சுற்றுச்சூழல் தாக்கத்திற்குச் சமமானதாகும். நிலம் கையகப்படுத்துவதில் தாமதம் ஏற்படாமல் இருக்க இந்தத் திட்டத்திற்கு ஏற்கனவே சிறப்பு அந்தஸ்து வழங்கப்பட்டுள்ளதால், நில உரிமையாளர்களுக்கு வழக்கமான தொகையை விட 30 முதல் 40 சதவீதம் வரை கூடுதல் இழப்பீடு வழங்கப்படும். கும்மிடிப்பூண்டி ரயில் பயணிகள் நலச் சங்கத்தினர் இத்திட்டத்தை வரவேற்றுள்ள நிலையில், இது திருவள்ளூர் மாவட்டத்தின் தொழில் வளர்ச்சிக்கு பெரும் ஊக்கமளிக்கும் என்று எதிர்பார்க்கப்படுகிறது.