குட்கா முறைகேடு வழக்கு: முன்னாள் அமைச்சர் விஜயபாஸ்கரின் மனுவை தள்ளுபடி செய்தது சென்னை உயர் நீதிமன்றம்

குட்கா முறைகேடு வழக்கை ரத்து செய்யக் கோரிய முன்னாள் அமைச்சர் சி. விஜயபாஸ்கரின் மனுவை சென்னை உயர் நீதிமன்றம் தள்ளுபடி செய்தது.
தமிழக முன்னாள் சுகாதாரத்துறை அமைச்சரும், தற்போதைய தவெக கட்சி உறுப்பினருமான சி. விஜயபாஸ்கர் தொடர்ந்திருந்த முக்கிய வழக்கின் மனுவை சென்னை உயர் நீதிமன்றம் தள்ளுபடி செய்து உத்தரவிட்டுள்ளது. குட்கா முறைகேடு தொடர்பாக அவர் மீது சிறப்பு நீதிமன்றத்தில் நடைபெற்று வரும் வழக்கிலிருந்து தன்னை விடுவிக்க வேண்டும் என்றும், புகையிலை தொடர்பான சட்டத்தின் சில பிரிவுகளை அரசியலமைப்புக்கு விரோதமானது என அறிவிக்க வேண்டும் என்றும் கோரி அவர் இந்த மனுவைத் தாக்கல் செய்திருந்தார்.
தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் ஆகியோர் அடங்கிய முதன்மை அமர்வு இந்த வழக்கை விசாரித்தது. அப்போது மனுதாரர், குட்கா முறைகேடு வழக்கையும், புகையிலை தடுப்புச் சட்டத்தின் (COTPA) பிரிவுகளை சவாலுக்கு உட்படுத்தும் கோரிக்கையையும் ஒரே மனுவாக இணைத்திருப்பதை நீதிபதிகள் கடுமையாக விமர்சித்தனர். இத்தகைய செயல்களை சட்ட ரீதியாக ஏற்றுக்கொள்ள முடியாது என்றும், இரண்டு கோரிக்கைகளையும் தனித்தனி மனுக்களாகத் தாக்கல் செய்ய வேண்டும் என்றும் நீதிபதிகள் தெளிவுபடுத்தினர்.
சிபிஐ அமைப்பினால் 2018-ஆம் ஆண்டு பதிவு செய்யப்பட்ட இந்த புகழ்பெற்ற குட்கா முறைகேடு வழக்கில், முன்னாள் அமைச்சர்கள் சி. விஜயபாஸ்கர் மற்றும் பி.வி. ரமணா, ஓய்வுபெற்ற ஐபிஎஸ் அதிகாரிகள் டி.கே. ராஜேந்திரன், எஸ். ஜார்ஜ் உள்ளிட்ட 26 பேர் மீது குற்றம் சாட்டப்பட்டுள்ளது. தடை செய்யப்பட்ட புகையிலை பொருட்களை விற்க அனுமதி அளிப்பதற்காக லஞ்சம் பெற்றதாக இவர்கள் மீது குற்றச்சாட்டுகள் சுமத்தப்பட்டுள்ளன. இதில் விஜயபாஸ்கர் 16-வது குற்றவாளியாகச் சேர்க்கப்பட்டுள்ளார் என்பது குறிப்பிடத்தக்கது.
விஜயபாஸ்கரின் தரப்பில் தாக்கல் செய்யப்பட்ட மனுவில், உணவுப் பாதுகாப்பு மற்றும் தர நிர்ணயச் சட்டத்தின் கீழ் குட்கா மற்றும் பான் மசாலா பொருட்களைத் தடை செய்ய முடியாது என்றும், அவை சட்டத்திற்கு உட்பட்டவை என்றும் வாதிடப்பட்டது. இருப்பினும், நீதிமன்றத்தின் எச்சரிக்கையைத் தொடர்ந்து, அந்த மனுவைத் திரும்பப் பெறுவதாக மனுதாரரின் வழக்கறிஞர் தெரிவித்தார். இதனை ஏற்றுக்கொண்ட நீதிபதிகள், மனுவை திரும்பப் பெறுவதற்கு அனுமதி அளித்ததுடன், தேவைப்படின் முறையான சட்ட நடைமுறைகளைப் பின்பற்றி புதிய மனுவைத் தாக்கல் செய்யலாம் என்று உத்தரவிட்டனர்.









