நெட்பிளிக்ஸின் புதிய தொடரில் களமிறங்கும் ஹாலிவுட் நட்சத்திரம் கிவெனத் பேல்ட்ரோ

ஹாலிவுட் நட்சத்திரம் கிவெனத் பேல்ட்ரோ முதன்முறையாக நெட்பிளிக்ஸின் 'தி அப்பாலஜி' தொடரில் முதன்மை கதாபாத்திரத்தில் நடிக்கிறார்.

ஹாலிவுட் திரையுலகின் முன்னணி நட்சத்திரமான கிவெனத் பேல்ட்ரோ, தனது நீண்டகால நடிப்புப் பயணத்தில் முதன்முறையாக ஒரு தொலைக்காட்சி தொடரில் முதன்மை கதாபாத்திரத்தில் நடிக்க ஒப்பந்தமாகியுள்ளார். நெட்பிளிக்ஸ் நிறுவனம் தயாரிக்கும் 'தி அப்பாலஜி' (The Apology) எனும் இந்த புதிய நாடகத் தொடர், இரண்டு சீசன்களாக உருவாக உள்ளதாக அதிகாரப்பூர்வமாக அறிவிக்கப்பட்டுள்ளது. இதற்கு முன்பாக 'கிளி' (Glee) மற்றும் 'தி பொலிட்டிஷியன்' (The Politician) போன்ற தொடர்களில் அவர் துணைக் கதாபாத்திரங்களில் மட்டுமே நடித்திருந்தது குறிப்பிடத்தக்கது.

இந்தத் தொடரின் கதைக்களம் மிகவும் விறுவிறுப்பாக அமைக்கப்பட்டுள்ளது. இதில் கிவெனத் பேல்ட்ரோ, 'எவ்லின் ஆம்ஸ்போக்கர்' எனும் கதாபாத்திரத்தில் நடிக்கிறார். தனது மகன் படுகொலை செய்யப்பட்ட சோகமான சம்பவத்திற்குப் பிறகு, 18 ஆண்டுகள் கடந்துள்ள நிலையில், ஒரு மர்ம நபர் அவரது வாழ்க்கையில் நுழையும்போது பழைய வழக்கு மீண்டும் உயிர் பெறுகிறது. குற்றவாளிக்குக் குறுகிய கால சிறைத்தண்டனை மட்டுமே வழங்கப்படுவதை அறியும் எவ்லினும் அவரது கணவரும், சட்டத்தை தங்கள் கையில் எடுத்துக்கொண்டு நீதி தேடும் போராட்டமே இந்தத் தொடரின் மையக்கருவாகும்.

இந்த பிரம்மாண்டமானத் தொடரை உருவாக்குவதில் திறமையான கலைஞர்கள் ஒன்றிணைந்துள்ளனர். 'தி வுமன் இன் தி வால்' தொடரின் படைப்பாளியான ஜோ முர்டாக், இந்தத் தொடரை எழுதியதுடன் அதன் ஷோ-ரன்னராகவும் செயல்படுகிறார். அதேபோல், உலகப் புகழ்பெற்ற 'அனதர் ரவுண்ட்' திரைப்படத்தை இயக்கிய தாமஸ் வின்டர்பெர்க் இந்தத் தொடரை இயக்குகிறார். உயர்தரமான திரைக்கதை மற்றும் அனுபவம் வாய்ந்த தொழில்நுட்பக் கலைஞர்களின் கூட்டணியால் இந்தத் தொடர் ரசிகர்களிடையே பெரும் எதிர்பார்ப்பை ஏற்படுத்தியுள்ளது.

கிவெனத் பேல்ட்ரோ ஏற்கனவே 'எம்மா', 'தி டேலன்டட் மிஸ்டர் ரிப்லி' மற்றும் 'ஸ்லைடிங் டோர்ஸ்' போன்ற பல வெற்றிப் படங்களில் நடித்து உலக ரசிகர்களின் கவனத்தை ஈர்த்தவர். சமீபத்தில் திமோதி சாலமேட் நடிப்பில் வெளியான 'மார்ட்டி சுப்ரீம்' திரைப்படத்திலும் அவர் நடித்திருந்தார். தனது திரைப்பயணத்தில் முதன்முறையாக ஒரு தொலைக்காட்சித் தொடரின் நாயகியாக அவர் களமிறங்குவது, அவரது ரசிகர்களுக்குப் பெரும் உற்சாகத்தை அளித்துள்ளது.