ஹாரி பாட்டர் தொடரின் இரண்டாம் சீசன்: டாபி மற்றும் ஜின்னி விஸ்லி கதாபாத்திரத்தில் புதிய நடிகர்கள் அறிமுகம்

HBO நிறுவனத்தின் ஹாரி பாட்டர் தொடரின் இரண்டாம் சீசனுக்கான முக்கிய கதாபாத்திரங்களின் புதிய தேர்வு குறித்த அறிவிப்பு வெளியாகியுள்ளது.

பிரபலமான ஹாரி பாட்டர் நாவல் வரிசையை அடிப்படையாகக் கொண்டு, எச்பிஓ நிறுவனம் தயாரித்து வரும் புதிய தொலைக்காட்சித் தொடரின் இரண்டாம் சீசன் குறித்த எதிர்பார்ப்பு ரசிகர்களிடையே அதிகரித்துள்ளது. இந்தத் தொடரின் இரண்டாம் சீசன், ஹாரி பாட்டர் அண்ட் தி சேம்பர் ஆஃப் சீக்ரெட்ஸ் கதையை மையமாகக் கொண்டு உருவாக்கப்படுகிறது. தற்போது இந்தத் தொடரின் முக்கிய கதாபாத்திரங்களில் நடிக்கவுள்ள புதிய நடிகர்கள் குறித்த அதிகாரப்பூர்வ அறிவிப்புகள் வெளியாகியுள்ளன.

இந்த புதிய சீசனில் பிரபலமான டாபி கதாபாத்திரத்திற்கு பிரிட்டிஷ் நடிகர் லென்னி ரஷ் தேர்வு செய்யப்பட்டுள்ளார். ஹாரி பாட்டரின் மிக முக்கியமான விசுவாசமிக்க நண்பனான டாபி கதாபாத்திரத்தில் நடிப்பதற்கு அவர் பொருத்தமானவர் என்று எதிர்பார்க்கப்படுகிறது. ஏற்கனவே ஆப்பிள் டிவி தொடர் மற்றும் பிரிட்டிஷ் நகைச்சுவைத் தொடர்களில் நடித்து புகழ்பெற்ற லென்னி ரஷ், இந்த மாயாஜால உலகிற்கு கூடுதல் பலம் சேர்க்கவுள்ளார். மேலும், டாம் ரிடில் கதாபாத்திரத்தில் பில்லி பாரட் நடிக்கவுள்ளார் என்பது குறிப்பிடத்தக்கது.

இந்தத் தொடரின் முக்கிய கதாபாத்திரமான ஜின்னி விஸ்லி பாத்திரத்தில் ஏற்கனவே நடித்திருந்த கிரேசி கோக்ரேன் சில காரணங்களால் தொடரிலிருந்து விலகியுள்ளார். அவருக்குப் பதிலாக, இரண்டாம் சீசனில் பொன்னி ஹில் புதிய ஜின்னி விஸ்லியாக நடிக்க ஒப்பந்தம் செய்யப்பட்டுள்ளார். தொடரின் முதல் சீசன் தயாரிப்புப் பணிகள் நிறைவடைந்து, வரும் டிசம்பர் 25 ஆம் தேதி எச்பிஓ தளத்தில் ஒளிபரப்பாகவுள்ளது. இரண்டாம் சீசனுக்கான ஆரம்பகட்டப் பணிகள் லண்டனுக்கு அருகிலுள்ள லீவ்ஸ்டன் ஸ்டுடியோஸில் தற்போது விறுவிறுப்பாக நடைபெற்று வருகின்றன.

இந்த பிரம்மாண்ட தொடரில் டொமினிக் மெக்லாஃப்லின் ஹாரி பாட்டராகவும், அரபெல்லா ஸ்டான்டன் ஹெர்மாயினி கிரேஞ்சராகவும், அலாஸ்டெய்ர் ஸ்டவுட் ரான் விஸ்லியாகவும் நடிக்கின்றனர். மேலும் ஜான் லித்கோ, ஜேனட் மெக் டீயர், பாப்பா எஸீடு மற்றும் நிக் ஃபிராஸ்ட் உள்ளிட்ட பல முன்னணி நட்சத்திரங்கள் இணைந்து இந்த மாயாஜால உலகத்தை உருவாக்க உள்ளனர். பிரான்செஸ்கா கார்டினர் எழுதி தயாரிக்கும் இந்தத் தொடர், உலகப்புகழ் பெற்ற ஜே.கே. ரௌலிங்கின் படைப்பை மீண்டும் ஒரு புதிய பரிமாணத்தில் ரசிகர்களுக்குக் கொண்டு சேர்க்கும் முயற்சியாக அமைந்திருக்கிறது.