நிலத்தை அளக்கச் சென்ற இடத்தில் அலட்சியம்: வருவாய் மற்றும் காவல்துறை அதிகாரிகள் மீது நடவடிக்கை எடுக்க உயர்நீதிமன்றம் உத்தரவு

நிலத்தை அளக்கத் தவறிய அதிகாரிகள் மற்றும் பணியில் கவனக்குறைவாக இருந்த காவல்துறை மீது நடவடிக்கை எடுக்க ராணிப்பேட்டை ஆட்சியருக்கு சென்னை உயர்நீதிமன்றம் உத்தரவு.

ராணிப்பேட்டை மாவட்டத்தில் நிலத்தை அளவீடு செய்யும் பணியில் தீவிர அலட்சியம் காட்டிய வருவாய் மற்றும் காவல்துறை அதிகாரிகள் மீது உரிய விசாரணை நடத்தி நடவடிக்கை எடுக்குமாறு சென்னை உயர்நீதிமன்றம் அதிரடியாக உத்தரவிட்டுள்ளது. சென்னை போரூரைச் சேர்ந்த ஈ. பார்வதி என்பவர் தாக்கல் செய்த மனுவை விசாரித்த நீதிபதி கிருஷ்ணன் ராமசாமி இந்த உத்தரவைப் பிறப்பித்தார். மனுதாரர் தனது நிலத்தை அளவீடு செய்ய கடந்த 2025-ஆம் ஆண்டு பிப்ரவரி மாதம் விண்ணப்பித்திருந்த நிலையில், நீண்ட இழுத்தடிப்புக்கு பிறகு சுமார் ஒன்றரை ஆண்டுகள் கழித்து அதிகாரிகள் களத்திற்குச் சென்றுள்ளனர்.

கடந்த ஜூலை 13, 2026 அன்று வருவாய் மற்றும் நில அளவைத்துறை அதிகாரிகள், பாதுகாப்புப் பணியில் இருந்த காவலருடன் இணைந்து நிலத்தை அளக்கச் சென்றனர். ஆனால், அங்கு வந்த ஆர். பாலமுருகன் என்பவர் எதிர்ப்பு தெரிவித்ததைத் தொடர்ந்து, அதிகாரிகள் பணியை பாதியிலேயே கைவிட்டுத் திரும்பியுள்ளனர். இந்தச் செயல் சட்டத்திற்குப் புறம்பானது என்றும், தனது உரிமையைப் பறிக்கும் வகையில் உள்ளதாகவும் மனுதாரர் நீதிமன்றத்தில் வாதிட்டார். இதனைத் தொடர்ந்து, அதிகாரிகளின் இந்தச் செயல் குறித்து நீதிபதி தனது அதிருப்தியைப் பதிவு செய்துள்ளார்.

நீதிமன்ற உத்தரவில் சுட்டிக்காட்டப்பட்டுள்ளதாவது, ஒரு தனிநபர் எதிர்ப்பு தெரிவித்தவுடன் அதிகாரிகளால் நிலத்தை அளக்க முடியாமல் போனது மிகுந்த வியப்பை ஏற்படுத்துகிறது. அதிகாரிகள் கூடுதல் போலீஸ் பாதுகாப்பிற்கு விண்ணப்பித்திருக்க வேண்டும் அல்லது அரசுப் பணியைத் தடுத்ததற்காக அந்த நபரின் மீது உடனடியாகக் காவல் நிலையத்தில் புகார் அளித்திருக்க வேண்டும். ஆனால், எந்த ஒரு முன்னெச்சரிக்கை நடவடிக்கையும் எடுக்காமல் அதிகாரிகள் திரும்பியது அவர்களது பணித்திறனின்மையைக் காட்டுகிறது என்று நீதிபதி விமர்சித்துள்ளார்.

மேலும், அங்கு பாதுகாப்புப் பணியில் இருந்த காவலர், அரசுப் பணியைத் தடுத்த நபரை முறையாகக் கட்டுப்படுத்தாமல் இருந்தது, காவல்துறை மற்றும் வருவாய்த்துறை அதிகாரிகளின் மெத்தனப் போக்கையே வெளிப்படுத்துவதாக நீதிமன்றம் சாடியுள்ளது. எனவே, இந்த விவகாரம் குறித்து ராணிப்பேட்டை மாவட்ட ஆட்சியர் மற்றும் மாவட்ட காவல் கண்காணிப்பாளர் ஆகியோர் உரிய விசாரணை நடத்தி, தவறிழைத்த சம்பந்தப்பட்ட அதிகாரிகள் மீது தகுந்த ஒழுங்கு நடவடிக்கை எடுக்க வேண்டும் என்று உத்தரவிடப்பட்டுள்ளது. நில உரிமையாளர்களின் சட்டபூர்வமான உரிமைகளைப் பாதுகாக்க அரசு அதிகாரிகள் கடமைப்பட்டவர்கள் என்பதை இந்தத் தீர்ப்பு மீண்டும் ஒருமுறை உறுதிப்படுத்தியுள்ளது.