ஓசூரில் மூன்று புதிய யானை வழித்தடங்கள் அறிவிப்பு: தமிழக அரசின் முக்கிய சுற்றுச்சூழல் நடவடிக்கை

ஓசூர் வனக்கோட்டத்தில் 10,300 ஹெக்டேர் பரப்பளவில் மூன்று புதிய யானை வழித்தடங்களை அறிவித்து தமிழக அரசு அரசாணை வெளியிட்டுள்ளது.

தமிழக அரசு ஓசூர் வனக்கோட்டத்தில் அமைந்துள்ள காவிரி வடக்கு வனவிலங்கு சரணாலயப் பகுதியில் மூன்று புதிய யானை வழித்தடங்களை அதிகாரப்பூர்வமாக அறிவித்துள்ளது. சுற்றுச்சூழலியல் மற்றும் வனத்துறை கூடுதல் தலைமைச் செயலாளர் ககர்லா உஷா வெளியிட்டுள்ள இந்த அறிவிப்பின்படி, இந்த வழித்தடங்கள் தமிழ்நாடு மற்றும் கர்நாடகா மாநிலங்களுக்கு இடையேயான யானைகளின் பாதுகாப்பான இடப்பெயர்ச்சியை உறுதி செய்ய வழிவகை செய்கின்றன. ஒட்டுமொத்தமாக 10,300 ஹெக்டேர் பரப்பளவைக் கொண்ட இந்த வழித்தடங்கள், யானைகளின் வாழ்விடத் தொடர்பை மேம்படுத்தவும், அவற்றின் நீண்டகால உயிர்வாழ்விற்குத் தேவையான சூழலியல் பாதுகாப்பை வலுப்படுத்தவும் உதவும் என எதிர்பார்க்கப்படுகிறது.

இந்த அறிவிப்பில் குறிப்பிடப்பட்டுள்ள வழித்தடங்களில் ஜவலகிரி-பனை-அஞ்செட்டி வழித்தடம் மிகப்பெரியதாக உள்ளது. இது சுமார் 20.90 கிலோமீட்டர் நீளம் மற்றும் 6,881.47 ஹெக்டேர் பரப்பளவைக் கொண்டுள்ளது. மேலும், ஜவலகிரி-உலிபந்தா-தக்கட்டி வழித்தடம் 18.50 கிலோமீட்டர் நீளத்திலும் 3,241.53 ஹெக்டேர் பரப்பளவிலும் விரிந்து காணப்படுகிறது. மூன்றாவது வழித்தடமான பிலிக்கல் ஜவலகிரி வழித்தடம் சுமார் 2.20 கிலோமீட்டர் நீளம் மற்றும் 196 ஹெக்டேர் பரப்பளவைக் கொண்டது. இந்த வழித்தடங்கள் அனைத்தும் ஏற்கெனவே வனவிலங்கு சரணாலயங்கள் மற்றும் காப்புக்காடுகளுக்கு உட்பட்ட பகுதியில் அமைந்துள்ளதால், இந்த அரசாணை அவற்றுக்கு கூடுதல் சட்டப்பூர்வ அங்கீகாரத்தையும் பாதுகாப்பையும் வழங்குகிறது.

சென்னை உயர் நீதிமன்றத்தின் இடைக்கால உத்தரவுகள் மற்றும் யானை வழித்தடங்களை அடையாளம் கண்டு அவற்றில் உள்ள தடைகளை நீக்க அமைக்கப்பட்ட குழுக்களின் பரிந்துரைகளின் அடிப்படையில் இந்த அரசாணை பிறப்பிக்கப்பட்டுள்ளது. முதன்மைத் தலைமை வனப் பாதுகாவலர் மற்றும் தலைமை வனவிலங்கு காப்பாளர் சமர்ப்பித்த அறிக்கையின்படி, பருவமழை மாற்றங்கள் மற்றும் வாழ்விடத் தேவைகளுக்கு ஏற்ப யானைகள் தமிழ்நாடு மற்றும் கர்நாடகா எல்லைகளைக் கடந்து இடம்பெயர்வதற்கு இந்த வழித்தடங்கள் மிகவும் முக்கியமானவை எனக் கண்டறியப்பட்டுள்ளது. இந்த வழித்தடங்களின் பாதுகாப்பை உறுதி செய்வது பிராந்தியத்தில் உள்ள யானைகளின் எண்ணிக்கை ஸ்திரத்தன்மையைப் பேண உதவும் என்று அதிகாரிகள் தெரிவிக்கின்றனர்.

தற்போது அறிவிக்கப்பட்டுள்ள இந்த வழித்தடங்கள் ஏற்கனவே பாதுகாக்கப்பட்ட வனப்பகுதிகளில் அமைந்துள்ளதால், நிலத்தின் தற்போதைய சட்ட அந்தஸ்தில் எந்த மாற்றமும் இருக்காது என்றும், பொதுமக்களின் உரிமைகளில் புதிதாக எந்த கட்டுப்பாடுகளும் விதிக்கப்படாது என்றும் அரசு தெளிவுபடுத்தியுள்ளது. இருப்பினும், இந்த முறையான அங்கீகாரம் யானைகளின் வழித்தடங்கள் குறித்த விழிப்புணர்வை ஏற்படுத்தி, எதிர்காலத்தில் அவற்றின் நடமாட்டத்திற்கு இடையூறு ஏற்படுவதைத் தடுக்க உதவும் என்று கருதப்படுகிறது. இந்த அரசாணை தமிழக அரசு இதழிலும், கிருஷ்ணகிரி மாவட்ட இதழிலும் வெளியிடப்படும் என்று தெரிவிக்கப்பட்டுள்ளது.