கொடைக்கானல் மலைப்பகுதிகளில் அகழாய்வு: 2,000 ஆண்டு பழமையான மர்மங்களை உடைக்கத் தயாராகும் ஐஐடி பம்பாய்

கொடைக்கானல் அருகே உள்ள 2,000 ஆண்டுகள் பழமையான பெருங்கற்கால ஈமச்சடங்கு தளங்களில் அகழாய்வு செய்ய ஐஐடி பம்பாய்க்கு இந்திய தொல்லியல் துறை அனுமதி அளித்துள்ளது.

திண்டுக்கல் மாவட்டம், கொடைக்கானல் பழனி மலைப்பகுதிகளில் உள்ள குந்தாடி (மாச்சூர்) பகுதியில், சுமார் 2,000 ஆண்டுகள் பழமையான இரும்புக்காலத்தைச் சேர்ந்த பெருங்கற்கால ஈமச்சடங்கு தளங்கள் கண்டறியப்பட்டுள்ளன. இந்த வரலாற்று முக்கியத்துவம் வாய்ந்த இடங்களில் அகழாய்வு பணிகளை மேற்கொள்வதற்கு இந்திய தொல்லியல் துறை (ASI) ஐஐடி பம்பாய்க்கு முறையான அனுமதி வழங்கியுள்ளது. தற்போது இந்த அகழாய்வுத் திட்டத்தை செயல்படுத்துவதற்கான இறுதி அனுமதியை பெறுவதற்காக தமிழக அரசின் தலைமை வன உயிரின காப்பாளர் அலுவலகத்தின் ஒப்புதலுக்கு கோப்பு அனுப்பப்பட்டுள்ளது.

இந்த ஆராய்ச்சித் திட்டத்திற்கு 'தென்னிந்தியாவின் ஈமச்சடங்கு நிலப்பரப்பு' என்று பெயரிடப்பட்டுள்ளது. சுமார் இரண்டு ஆயிரம் ஆண்டுகளுக்கு முன்பிருந்த மக்களின் ஈமச்சடங்கு முறைகள், நம்பிக்கைகள் மற்றும் அவர்களின் சமூக, கலாச்சார வாழ்க்கை முறை ஆகியவற்றை கண்டறிவதே இந்த ஆய்வின் முதன்மை நோக்கமாகும். மேற்குத் தொடர்ச்சி மலைப்பகுதிகளில் உள்ள பெருங்கற்கால ஈமச்சடங்கு தளங்கள் குறித்து இதுவரை மிகக் குறைந்த அளவிலான ஆய்வுகளே மேற்கொள்ளப்பட்டுள்ளதால், இந்த அகழாய்வு வரலாற்று ஆய்வாளர்கள் மத்தியில் மிகுந்த எதிர்பார்ப்பை ஏற்படுத்தியுள்ளது. ஐஐடி பம்பாயின் மனிதநேயம் மற்றும் சமூக அறிவியல் துறையைச் சேர்ந்த இணைப் பேராசிரியர் ஸ்மிருதி ஹரிச்சரன் இந்த அகழாய்வுப் பணிகளுக்கு இயக்குநராக நியமிக்கப்பட்டுள்ளார்.

இந்திய தொல்லியல் துறையின் நிபுணர் குழுவின் பரிந்துரையின் பேரில், கடந்த 2025-ம் ஆண்டு செப்டம்பர் 18-ம் தேதி இந்த அனுமதி வழங்கப்பட்டது. 1959-ம் ஆண்டு இயற்றப்பட்ட பழங்கால நினைவுச் சின்னங்கள் மற்றும் தொல்பொருள் தளங்கள் மற்றும் எஞ்சியிருப்பவை தொடர்பான விதிகளின்படி இந்த பணிகள் மேற்கொள்ளப்பட உள்ளன. அகழாய்வு பணிக்காக தலா 5 மீட்டர் நீளம் மற்றும் அகலம் கொண்ட சிறிய பரப்பளவே தேர்ந்தெடுக்கப்பட்டுள்ளது. பணி முடிந்ததும் தோண்டப்பட்ட மண் மீண்டும் அதே இடத்தில் நிரப்பப்பட்டு, தளத்தின் தன்மை மாறாமல் பாதுகாக்கப்படும். நவீன அறிவியல் தொழில்நுட்பங்களைப் பயன்படுத்தி, தளத்தில் உள்ள புதைகுழிகளின் அமைப்பை வரைபடமாக்கவும், அதன் பரவல் முறைகளைப் புரிந்துகொள்ளவும் ஆராய்ச்சியாளர்கள் திட்டமிட்டுள்ளனர்.

இந்திய தொல்லியல் துறையின் தொல்லியல் இயக்குநர் ஹேமசாகர் ஏ நாயக், இந்த அகழாய்வுப் பணிகள் ஸ்மிருதி ஹரிச்சரனின் நேரடி மேற்பார்வையில் மட்டுமே நடைபெற வேண்டும் என்று அறிவுறுத்தியுள்ளார். அகழாய்வின் போது கண்டெடுக்கப்படும் பழங்கால பொருட்கள் மற்றும் கலைப்பொருட்களின் விவரங்களை முறையாகப் பட்டியலிட்டு, அவற்றை டெல்லியில் உள்ள இந்திய தொல்லியல் துறையின் தலைமை அலுவலகத்தில் சமர்ப்பிக்க வேண்டும் என்றும் உத்தரவிடப்பட்டுள்ளது. மேலும், திருச்சி வட்டத்தைச் சேர்ந்த தொல்லியல் ஆய்வாளர்கள் அவ்வப்போது களத்திற்குச் சென்று பணிகளை ஆய்வு செய்யுமாறு அறிவுறுத்தப்பட்டுள்ளனர். அடர்ந்த வனப்பகுதிகளில் அமைந்துள்ள இந்த புதைகுழிகள், தாவரங்கள் மற்றும் மரங்களின் பாதுகாப்பால் மனித தலையீடு இன்றி இத்தனை காலம் சிதையாமல் பாதுகாக்கப்பட்டுள்ளன என்பது குறிப்பிடத்தக்கது.